euskal diaspora eta kultura
2009/03/12
Buenos Aires probintziako Laprida hiriko Lagunen Etxea euskal elkarteak hogei urte bete zituen joan den abenduaren 3an, baina urteurreneko ekitaldiak asteburu honetan izango dira. Ekitaldiotan parte hartuko du Arturo Campion Euskal Ikasketetarako Zentruak, izan ere elkarte honetako kideak asteburuan Lapridan bertan egingo dute urteroko bilkura. Horrela, bihar lan bilera egingo dute Arturo Campionekoek eta gauean bi elkarteetako kideak bildu eta afaria egingo dute. Igandean ekitaldi gehiago izango dira.
2009/03/12
Antioquiako Euskal Ikasketa Zentrua Kolonbiako Medellin hirian dago, Antioquia departamentuan. Elkartearen helburua euskal kultura inguru hauetan zabaltzea da eta horretarako joan den martxoaren 9an, Medellineko Cementerio San Pedro Museoarekin batera, 36ko gudak Euskal Herrian utzi zuen arrastoari buruzko hitzaldia antolatu zuen. Hizlaria Santiago de Pablo Contreras, Euskal Herriko Unibertsitateko Historia Garaikideko katedraduna izan zen.
2009/03/11
Buenos Aireseko Laurak Bat Euskal Etxea ezbairik gabe ibilbide luzeena duen Ameriketako euskal elkarteetako bat da eta egun ere sasoi onean jarraitzen du. 1877. urtean sortu zen elkartea eta ostiral honetan bazkideek 132. urteurrena ospatuko dute, hainbat ekitaldirekin. Eguna, urtero legez, urtean zehar hil diren bazkideen oroimeneko meza batekin hasiko da, Laurak Batetik oso gertu dagoen Nuestra Señora de Montserrat elizan. Ondoren elkartearen egoitzan ohorezko brindis bat egingo da.
2009/03/11
Argentinako Tres Arroyos herriko Hiru Erreka Euskal Etxeak bat egin du aurten ere emakumeen egoerari buruzko ekimenekin eta Emakumeen Nazioarteko Eguna pasa eta egun batzuetara Emakumearen Aste bat antolatu du, hiritarrak gai honen inguruan kontzientziatzeko. Asteak egitarau zabala du, eta besteak beste, 'Emakumeak otsoekin korrika' liburuari buruzko lantegiak egingo diuzte, Tres Arroyoseko emakumeek hala eskatuta.
2009/03/10
Beti Aurrera Aberri Etxea elkarteak Argentinako bi herrietako euskaldunak biltzen ditu: Rio Negro probintziako Viedma herrikoak eta Buenos Aires probintziako Carmen de Patagonesekoak. Azken honetan izan zen preseski, elkartearen azken elkitaldietako bat, joan den martxoaren 7an herrian egiten de desfilean atera baitziren Beti Aurrerako ordezkariak, ikurrina eta guzti. Desfileak 1827 urtean herrian izan zen bataila gogoratzen du.
2009/03/10
Aita Martxel Tillous beka NABOk Renon egin zuen azken bilkuran sortu zen, eta bere helburua euskal kulturaz interesa duen edozein gaztek diru faltagatik programa eta ekimenetatik kanpo ez gelditzea ziurtatzea da. Hasieran beka NABOko diru propioekin finantzatu zen, baina azkenaldian partikular eta euskal etxeetako dohaintza eskuzabal asko jaso ditu. Beka eskatzeko epea martxoaren 20ean bukatuko da, esan nahi baita datorren asteko ostiralean.
2009/03/09
Buenos Aireseko Laurak Bat Euskal Etxeak zabaldu berria du elkarteak, argentinar hiriburu federaleko Belgrano hiribideko 1144ko bere lokaletan ematen dituen euskara eskoletara izena emateko epea. 2009 ikasturte honetan apirilaren 7an hasiko diren klaseok aurrez-aurrekoak dira, baina baita Boga sistema bidezkoak ere, internetez alegia, online tutore batez, aurrez-aurreko mintzapraktika barne. Klaseok kitorik izango dira bazkideei dagokienez.
2009/03/09
Euskal Herrian bizi eta lan egiten duen jende multzo batek 8H/Zortzigarren Herrialdea izeneko elkarte berria osatzeko dei irekia zabaldu datorren larunbaterako, talde eratzailearen aurkezpenaren ondoren sagardotegi batean bazkaldu eta ideia bultzatzeko interesa izan dezaketen pertsonek elkar ezagutu eta urrats berriak emateko moduan egon daitezen. Aurkezpena Herria Kultur Etxean izango da datorren larunbatean, eguerdiko hamabietan, eta bazkaria, berriz, ordu bietan Goiko-Lastola sagardotegian.
2009/03/06
Zu zeu euskaraduna bazara eta Estatu Batuetan bizi bazara, jakin ezazu AEBetako euskara koordinatzailea, Izaskun Kortazar, zeu bezalako pertsonen bila ari dela euskara irakasle bilakatzeko. Ez da gauza konplikatua eta oso lan ona egin dezakezu Estatu Batuetako euskal kulturaren alde. Formakuntza euren kontu. Ikasleek beti zuk baino gutxiago jakingo dute eta urtean dirulaguntza bat izan dezakezu klaseak emateko. Zu zeu egoera horretan bazaude, edota Estatu Batuetan inor ezagutzen baduzu ezaugarri horiekin, idatz iezaiozu e-maila Izaskun Kortazarri. Hasteko, haurrekin aritzeko irakasle bat falta da San Frantziskon. Baina aukerak askoz ere gehiago dira. Eskatu mesedez xehetasunak Izaskun Kortazarri.
2009/03/06
Gogo handiz ekin dio General Rodriguez herriko Eusko Aterpea Euskal Etxeak, Argentinako Buenos Aires probintzian, 10 urte beteko dituen urteari. Batetik, bere egoitzako eraikuntza lanei eutsi die eta ipar alderdiko pareta ari da goititzen. 12 metro falta zaizkio amaitzeko eta onartzen ditu lagungarri izango zaizkion doaitzak. Honi loturik, EEak 'ekarpen bono' batzuk ere atera ditu, apirilaren 11ean zozketatuko direnak. Elkarteko Ohiko Biltzar Nagusia hil honen 21ean egingo duen Eusko Aterpea ekitaldi proposamen zabala iragarriz sartu da bere urteurren urtean, tartean euskal dantza eskola eta taldea, 'Hitz Nagusiak' hitzaldi sorta, euskara tailerrak, Eguzkilore zine-kluba edo 'Nikomedes Iguain Azurza' liburutegia, 6.129 liburuki dituena.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
