Ilusioz eta arrakastatsu estreinatu da Cañuelasen “Odol Berria”, Ayacuchoko Euskal Etxeko dantza talde gaztea

Ayacucho, Argentina. Cañuelasen, Aberri Eguneko ospakizunaren baitan, Ayacuchoko Euskal Odola Euskal Etxeko “Odol Berria” dantza taldea igo zen oholtzara apirilaren 13an eta arrakasta handiz inauguratu zuen 16. Dantzarien Topaketa. Sortu eta urtebetera, taldearen aurkezpena izan zen bere hiritik kanpo oholtza partekatuz euskal diasporako beste talde batzuekin. Belen Zabaleta zuzendari eta Clara Esteberena laguntzaile, Odol Berria 6 eta 14 urte bitarteko hamar bat neska-mutikok osatzen dute, eta txalo zaparrada edrra izan zuten emanaldiko lagun.

Buru diren bi lagunak dantzariak izan ziren txikitan eta baiezkoa eman zuten Euskal Etxeak dantza taldea berpiztea proposatu zienean. Odol Berriaren arrakasta eurei, haur eta gaztetxo dantzariei eta haien familiei zor zaie

2023an Ayacuchoko Euskal Etxeak ez zeukan dantzari talde aktiborik eta Mus Txapelketa zen jokatzekoa bertan. Euskal Odola-ko lehendakari María Nilda Ilarreguik agurra dantzarekin errezibitu nahi zituen partaideak eta karia horretara, etxeko bi dantzariri egin zien deia zituen: Belén Zabaletak, goi mailako ikasketak amaitzen ari zela Tandilgo Gure Etxean emanak zituen bere lehen urratsak dantzari gisa, eta Clara Esteberena, berriz, Euskal Odolako lehenengo dantza taldeko dantzaria izandakoa zen, 2004an, Soledad Elorriaga zuzendari izan zuela. Aurresku hura izan zen dantza Euskal Etxera itzultzeko abiarazlea, ilusioak neskak berriro ere dantza taldea osatzera bultzatu baitzituen.

Harro lekukoa jaso eta pasatzeaz

Belén Zabaletaren lanerako gogo biziari eta Clara Esteberenaren lankidetza baliotsuari esker, hilabete batzuetako entseguen ondoren, aurkezpen eguna iritsi zen. San Fermin eguna ospatzeko, Ayacuchoko Euskal Etxeak afaria antolatu zuen eta dantzari gazteek emanaldia eskaini zuten bertan, espektazio handipean. Euskal Odola Euskal Etxeko kideentzat benetako zirrara eta harrotasuna izan zen dantzari talde bat berriro izateko gogoa beteta ikustea. Belenek eta Clarak dioten bezala, "Gure helburua dantza euskal kulturara hurbiltzeko bitarteko gisa baliatzea da, dantzariak euskal etxeko zein diasporako parte senti daitezen, gure kulturaz dakiguna belaunaldi berriei erakustea, aurrekoek gurekin egin zuten bezala, eta neska-mutilengan dantzarako zaletasuna eta euskal sentipena sustatzea".

Honako dantzariek osatzen dute Ayacuchoko Odol Berria Dantza Taldea: Jazmín Bazterrecheak, Pilar Bazterrechea, Juan Pedro Bazterrechea, Justo Bazterrechea, Baldomero Bazterrechea, María Antonia Garay, María Jacinta Garay, Melany Guas, Leire Zabaleta eta Lisandro Zabaletak.

Zorionak Odol Berria!

Belén eta Clara, bi gazte engaiatu

Belén eta Clara gazteek ahalbidetzen dute Odol Gaztea, gaztetxo dantzari eta euren familiekin

Belén Zabaletak 2005ean eman zituen lehen urratsak euskal dantzan, Tandilgo Euskal Etxean, hirian hirugarren mailako ikasketak egiten ari zela. 2010ean Mercedes Martinen deia jaso zuen Ayacuchoko Euskal Odola-ko txiki eta gaztetxo talde batekin lanean hasi behar zuela-eta. Honela hasi zuen ibilbidea bere sorterrian. Bertan ezagutu zuen Clara, taldetxo hartako parte baitzen, eta bere irakasle izan zen. "Euskalduna naiz familiaz... Birraitona-amonak oso gazte zirela etorri ziren Argentinara eta belaunaldiz belaunaldi euren ohitura ederrak pasatzen joan gara", diosu Leitzako euskaldunen ondorengo den Belén-ek.

Clara Esteberenak, berriz, azaltzen digu: “Ayacuchoko Euskal Odola Euskal Etxera zortzi urte beteberriak nituela iritsi nintzen, EEko aurreneko dantza taldeko kide izan nintzen, 2004an abiatu zena, Maipú-ko Anaitasunan ikasitako Soledad Elorriaga zuzendari". Gero, barnealdeko hainbat herrietan gertatu ohi denez, gazteak hirietara ikasketak egitera joaten hasi ziren eta taldea desegiten joan zen, segida etenda.

"Orain, 25 urterekin, segitzen dut dantzari taldean aktiboki parte hartzen", aitortzen du Clarak. "Aurten, gainera, irakaslearen laguntzaile gisa... Euskalduna naiz sortzez eta hala aukeratu nuelako", diosku. Abizenek eman zidaten abiapuntua. Koskortzen joan ahala are gehiago joan nintzen identifikatzen euskaldun gisa kulturaren bidez, dantzaz, tradizioez eta musikaz gehiago ikastearen bidez..."

2023an taldea desagertuta zegoen, baina deia jaso zuten eta EEko Nilda Ilarregui lehendakariak eskaera egin zien Euskal Odola antolatzaile zuen Mus Txapelketa Nazionari hasiera eman eta partaideei aurreskua dantzatzeko. Bertaratu, bertan berriz ere elkartu eta handik sortu zen dantza taldea berreraikitzeko proiektua.

Begiak distiratsu mintzatzen zaizkigu euren planak aipatzen dizkigutela: "Haur eta gaztetxoen euskal dantza talde sendoa berriz ere martxaraztea... Dantza baliabide gisa erabiltzea haurrak euskal kulturara hurbildu eta euskal etxeko zein diasporako parte senti daitezen, erakutsiz gure kulturaz dakiguna, aurreko belaunaldiek gurekin egin zuten bezala, orain gaztetxo direnek izan dezaten guk bezala atxikimendua sakona euskal dantzaz eta euskaldun sentitzeaz..."

Aurten gainera taldeari izena jartzea erabaki dute, aitortzen du gogotsu Belén-ek: 'Odol Berria', horixe baikara... Clararekin batera bururatu zitzaigun identifikazio bat behar genuela talde bezala, eta Euskal Etxeak 'Euskal Odola' izena duenez, pentsatu genuen 'Odol Berria zinez' oso egokia dela, hasiera berria baikara, hosto berriak, Euskal Etxearen geroa..."

euskalkultura.eus

Albisteak

Ilusioz eta arrakastatsu estreinatu da Cañuelasen “Odol Berria”, Ayacuchoko Euskal Etxeko dantza talde gaztea

Erlazionatutakoak

Irakurrienak

Azken komentarioak