San Nicolas, Argentina. Euskara Munduan programaren atal berri bat idazten hasiko da pare bat aste barru Paraná ibaiaren ertzean, San Nicolas hirian. Urtarrilaren 13an, bertako Euzkal Etxeak ongi etorria emango dio euskara irakasle bihurtzeko asmoz euskalduntze prozesua hutsetik hasiko duen Argentinako euskal etxeetako ordezkari talde berri bati. Barnetegia amaitutakoan, partaideek euren euskal etxe eta herrietatik jarrituko dute formakuntza, Euskal Herritik kudeatutako online plataforma baten bidez, ekainean, Argentinako neguan, egingo den hurrengo barnetegira arte.
Ikastaro trinkoa urtarrilaren 13tik 20ra egingo da, eta Argentinako bi irakaslek, Cecilia Canzek eta Anabel Jaureguiberryk, emango dizkiete eskolak Argentinako hainbat hiritatik ilusio handiz bertaratuko diren 15 ikasleei. Ikastaroaren diseinua eta berau garatzeko material didaktikoak Lazkaoko Maizpide Euskaltegiko Jon Urdangarini zor zaizkio. FEVAren partetik, Gabriela Mendiak eta Etxepare Euskal Institutuko Euskara Munduan programaren arduradun Jose Francisco "Kinku" Zinkunegik koordinatuko dute barnetegia
Euskararen transmisio-kate sendoa
San Nicolasen kohorte berri hau euskararen munduaren parte izatera eramango duen ahalegin eta poztasun bidea egiten hasiko den bitartean, Euskara Munduaneko bere aurreko taldeak Gipuzkoako Goierrin burutuko du bere formakuntza prozesua. Urtarrilean eta otsailean zehar, Lazkaoko Maizpide barnetegian, euskal etxeetan dagoeneko irakasle lanetan ari diren dozena batek ikasle-irakaslek bizitza euskaraz garatzeko esperientzia bizi ahal izango du. Aldi berean, ezagutzak sakondu eta pilak kargatuko dituzte 2024ari gogo biziz aurre egiteko, euren jarduerak euskaltzale berri asko erakarriko baititu hego konoko euskal etxeetako ikasgeletara.
Biba zuek eta gora euskara!
Lagun bati bidali
Komentarioa gehitu
