euskal diaspora eta kultura
2013/04/10
Gogoratu zozketa paregabea dugula martxan! EuskalKultura.com-i esker Euskal Herriko paraje zoragarriez gozatzeko aukera izango duzu. Nekaturismo Elkartearekin bat eginik, bi gau zozketatuko ditugu zuk nahi duzun www.nekatur.net webguneko nekazalturismo edo landa-etxean! Parte hartzeko epea apirilaren 21ean amaitzen da, beraz, bidali zure datuak lehenbailehen info@euskalkultura.com helbidera zozketan parte hartzeko!
2013/04/10
Pozik dira Madrilgo Euskal Etxean iragan astean egin zen film laburren lehiaketarekin, ez bakarrik erantzuna aparta izan delako, bertan aurkeztutako lanek maila bikaina erakutsi dutelako ere baizik. "Oso ondo eginak zeuden denak, eta irabazlea, "Euskalbollywood" delakoa, oso barregarria zen, gainera!", azaldu dio EuskalKultura.com-i elkarteko presidente Julio Elejaldek. Hamar labur aurkeztu ziren orotara, eta Euskara txokoko txikiek ere egin zuten berea, hamaikagarrena.
2013/04/10
FEVAren Zuzendaritza Batzordeko hainbat kargu berrituko dira apirilaren 20an burutuko den Ohiko Biltzar Orokorrean, tartean bi lehendakariorde. Zerrenda bakarra aurkeztu da horretarako. Biltzarraren egunean, Eusko Jaurlaritzako Kanpoko Euskal Komunitateentzako Zuzendari berria den Asier Vallejo eta Argentina-Mercosurrerako Ordezkari berria den Sara Pagola FEVAko kideekin bilduko dira bilera bukatzean. Argentina bisitatzeaz gain, Txile, Uruguai eta Brasil ere b isitatuko ditu Asier Vallejko Hego Amerikarako bere lehenengo bira ofizialean. Uruguai eta Brasilerako bidaia Sara Pagola lagun egingo du.
2013/04/10
Datorren maiatzaren 15ean amaituko da Euskal Kultur Erakundeak eta Azkue Fundazioak antolatu duten "Irudimena" sormen lehiaketan parte hartzeko epea. Hirugarren edizioa du lehiaketak eta, oraingoan, proposamena zera da: Euskal Herriko soinuak oinarri hartuta, sorkuntza berri bat egitea. Sorkuntza hori izan daiteke soinu berri bat, euskarazko testu bat edo irudi bat. Sariak Fnac dendetan gastatzeko diru-txekeak izango dira: 300 eurotakoak modalitate bakoitzeko lehenengo postuan suertatzen direnentzat; 200 eurotakoak bigarrenentzat eta 100 eurotakoak hirugarrenentzat.
2013/04/09
Iragan larunbatean amaitu zen Mercomus 2013 mus txapelketa, Limako Euskal Etxeak antolatuta. Lehia handia izan da edizio honetako partidetan, eta azkenean, Txileko ordezkariak, Jorge eta Lukas Oyarzun aita-semeak, izan dira garaile. Bigarren postuan sailkatu zen Argentinako bikotea, Jose Luis Macchik eta Rolando Biascok osatua. Hirugarren postua, berriz, etxean gelditu zen, Peruko ordezkari Jose Luis Lopezek eta Carlos Lombardik eskuratu baitzuten (bikote hau izan zen iaz Txileko Santiagon egin zen Mercomuseko irabazlea).
2013/04/09
Martxa polita hartu du azkenaldian Valladolideko Gure Txoko elkarteak eta, apurka apurka, azaleratzen ari dira urteetako lan isilaren emaitzak. Horien artean aipagarriak dira elkartearen euskara klaseak, Sonia Hernandez irakaslea buru delarik, eta baita iragan astean abian jarri zen ikastaro berria ere: BOGA online metodoa, euskara etxetik ikasteko aukera ematen duena. Eskaintza berri honekin batera, elkarteak nagusientzako klase presentzialak eta haurrentzako euskara taldea ere sustatzen ditu.
2013/04/09
Euskal Etxearen diru sarrera garrantzitsuetakoa da. Hirugarren urtez jarraian, janari salmentarekin hasi dira aurten ere Gral. Rodriguezko Eusko Aterpea-ko lagunak. 2013ko hasiera honetan, baina, bezeroen eskaera inoiz baino handiagoa izan da eta 300 gora ano saldu dituzte. Hau Aste Santuan, egun batzuk beranduago, apirilaren 4ean, etxeko partaide eta lankide fin zen Gabriela Elizabeth Itcea-ren heriotzaren berriak Eusko Aterpea hunkitu baitu. Apirilaren 14rako, Aberri Eguna ospatzeko eginiko deia bertan behera geratu da. Dolumin zintzoenak familia eta lagunei.
2013/04/08
Ehun bat dantzari euskal-argentinar bildu ziren joan den asteburuan Cañuelasen bertako Aberri Eguneko hitzordura. Topaketak, ordea, kutsu gazi-gozoa ere izan zuen Buenos Aires probintziako hiriburuan gertatutakoa dela-eta, historiako uholde larrienak bizi baititu La Plata hiriak, 51 hildako eta ehundaka kaltetu eraginez. Alkartasun zeinuak islatu ziren plazan eta baita Argentinara iritsi berria den Sara Pagola Euskadiren Ordezkariak Cañuelaseko Marisa Fassi alkatearekin izan zuen bileran ere. Urtero bezala EuskalKultura.com bertan izan zen, irakurleekin konpartitu nahi duen segidako kronika egitearren.
2013/04/08
Iragan martxoaren 31n Santiagoko Gure Etorkia elkarteak laguntalde mardula bildu zuen Txileko hiriburuan, Aberri Eguna ospatzeko. Ohi duenez, elkarteak San Cristobal mendatera igoera egin zuen, eta hango Eusko Enparantza delakoan, egin ziren ospakizunak, Gernikako Arbolaren kimuaren ondoan. Ekimenera bildu ziren, besteak beste, Rafael Kutz, Euskadiko Ordezkaria Txilen; eta Rossana Arza, "Colectividad Vasca de Chile" euskal etxeko presidentea.
2013/04/08
Berrehun lagundik gora bildu ziren iragan martxoaren 31n Caracaseko Euskal Etxean Aberri Eguna ospatzeko. Festa hau Venezuelako euskal gizataldearen hitzordu nagusienetakoa da, eta horrela izan da urtero, 1939an gudako erbesteratuak heldu zirenez geroztik. Pedro Arriaga Aguirrek eguneko kronika eta argazkiak partekatu ditu EuskalKultura.com-eko irakurleekin. Halaber, Jazoera buletinaren blogaren sorreraren berri ere ematen du.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
