euskal diaspora eta kultura
2013/04/15
Ekitaldi berezia egingo da bihar Mexiko DFko Euskal Etxean; izan ere, bertan aurkeztuko da Fractal aldizkariaren azken zenbakia. Gogoeta hiruhilabetekari mexikar honek ETAren ondoko Euskal Herriari buruzko ale monografikoa plazaratu du eta euskal elkartea aukeratu du berau ezagutzera emateko gune aproposena bezala. Aurkezpenean aldizkariaren zuzendari Ilan Semo eta ale honen koordinatzaile Joseba Buj izango dira, besteak beste.
2013/04/15
Urtero bezala, Euskal Herriarekiko engaiamendua berritu dute Argentinako hainbat euskal etxek Aberri Eguneko ospakizunen baitan. Euskal etxe eta ospakizun asko dira, eta ezin guztiak hemen aipatu, ezta hainbat artikulu idatzita ere. Esan dezagun, dena den, ekintzak mota askotakoak izan direla, euskal egoitzetan edota kalean eta komunitateari begira. Datei dagokienez, martxotik apirileraino egin izan dira. Datozen lerroetan, argazkiz hornituta, horietako batzuk, honako hiri eta herrietan eginak: Buenos Aires (Lizarraenea), Olavarria, Laprida, Arrecifes, San Miguel, Cordoba (Gerora) eta Bariloche.
2013/04/12
Venezuelako euskal diasporarekin harremana duen lagun taldeak urteroko euskal-venezuelarren topaketa datorren apirilaren 27a arte atzeratzea erabaki du aurten. Amaya Zenarutzabeitia antolatzaileak azaldu duenez, aldaketa honen arrazoia, "14ko asteburuan Venezuelako hauteskundeetarako botoa ematera Bilbora etorri behar dutenei bi asteburutan segidan erz etorraraztea" da, asteburu bat tartean utziz. Bilkura Galdakaon egingo da, urtero legez, eta aspaldiko lagunak elkar agurtzeko eta Venezuelako istorioak gogoratzeko aukera ederra izango da, otordu goxo baten inguruan.
2013/04/12
Iruñeko Bernart Etxepare eskola publikoak "Nik ere putz eginen dut!" kanpaina jarri du abian, euskararen aldeko mezua zabaltzeko. Eskolako ikasleek, irakasleek eta Euskal Herriko pertsonaia ezagunek bat egin dute jada kanpainarekin eta, orain, arduradunek Diasporako euskaldunei ere egitasmoarekin bat egiteko gonbitea luzatu diete. Parte hartzea oso erraza da; nahikoa da bideo labur bat grabatzea "Nik ere putz eginen dut!" esanez, eta ondoren putz egitea. Animatu, eskolako haurrek ikus dezaten euskarari hatsa emanez noraino hel daitekeen gure hizkuntza!
2013/04/12
Bata Rosario bertako euskalduna (Aguirre) eta bestea Donapaleutik etorria, Nafarroa Beherean (Etchegoyen). Sukaldaritza eta musika izango dira Rosarioko Ros Tower hotelean burutuko den ikuskizuneko protagonistak. Euskal kulturaren omenezko gauean, Itziar Aguirre chefak eta Anne Etchegoyen abeslariak euren artea zuzenean eskainiko diete bildutako lagunei. Hitzordua apirilaren 19an, Rosarioko Ros Tower hotelean. Baina Etchegoyenen beste bi emanaldi ekainiko ditu Argentinan datorren astean: apirilaren 18an Buenos Airesen, eta apirilaren 20an Zazpirak Bat euskal etxe rosariotarrean, Aberri Eguneko ospakizunaren baitan.
2013/04/11
Amsterdam euskal zinemaren erakusleiho bilakatuko da apirilaren 30etik maiatzaren 6ra. Epa! Film Week-ek Euskal Herrian ekoitzitako zortzi film eta hainbat film labur emango ditu Herbeheretako hiriburuan, bi gazteren ekimenez. Gogotsu eta ilusio handiz ari dira lanean euskal zinemaren aste hau arrakastatsua izan dadin eta datorren urtean ere Amsterdameko zinema aretoetan euskara entzun dezagun.
2013/04/11
"Longmire" telesaila Craig Johnson idazle estatubatuarrak sortu zuen Wyoming-eko sheriff-ean oinarritua da. Euskal jatorridun lagun asko ditu sheriff honek eta telesailaren sasoin berrian euskal jaialdi bat agertuko da. Hori dela eta, ekoizleak ehun bat euskaldunen bila ari dira, apirilaren 19an Santa Fen grabatuko den ataleko eszena batean estra gisa agertzeko. New Mexicoko Euskal Etxeko presidente Blas Uberuagak zabaldu du deialdia estatu horretako eta inguruko euskaldunen artean.
2013/04/11
Euskal Argentinar Erakundeen federazioak (FEVA) Pergaminoko Lagun Onak Euskal Etxearekin batera Buenos Aires probintziako herri horretan apirilaren 27 eta 28an antolatu duen euskal dantza tailerrean parte hartzera deitu die "dantza zuzendariei edo euskal etxeetan irakastera prest dauden dantzari aurreratuei". Izen-emateak apirilaren 19aren aurretik behar dira egin. Bestalde, federazioak buruzagientzako formakuntza ikastaro berri bat egingo du maiatzaren 11ean Rio Cuarton, Cordoban, xehetasunak aurki adieraziko dituela, esan du.
2013/04/11
Urtero legez, Nantesko Zinemaldiak leku zabala eskaini dio euskal zinemagintzari, "La Fenetre Basque" atalarekin. Aurten, horrez gain, bi euskal filmek saria jaso dute jaialdian: Oskar Alegria iruinsemearen “Emak bakia baita" filmak Dokumental Onenaren saria eskuratu du, eta Imanol Uriberen "Miel de Naranjas" lanak Ikusleen Saria. Etxepare Institutuak euskal film horien partehartzea sustatu du eta Aizpea Goenaga, erakundearen zuzendaria, bertan izan da.2013/04/11
118 urte bete berri dituela, Buenos Airesko Iparraldeko Euskal Etxea edo 'Centro Vasco Francés' --gaztelaniaz ere bi izenak erabiltzen ditu-- Argentina eta mundu osoko euskal etxe zaharrenetako bat da. Urtebetetzea ospatzeko, erakundeko Kultura Azpibatzordeko kideak bildu eta topa egin zuten. Kultura gaiak kezka eta ardura dituen taldeak, 2013an zehar garatuko dituen ekimenen egitaraua jakinarazi du aste honetan. Abiapuntua, gaur bertan, Aberri Egunari buruzko hitzaldi batekin, euskal etxearen egoitzan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
