euskal diaspora eta kultura
2013/05/10
Berez 'Union Vasca Sociedad de Socorros Mutuos' (Euskal Batasuna Elkarri Laguntzeko Elkartea) izen ofizialtzat duen Bahia Blancako Euskal Etxeak, erakundeko araudiaren araberako urteko batzarra eginik Zuzendaritza Batzordea berritu du, epe berrian Mikel Xabier Irazustak segituko duelarik lehendakari, lankide dituela, besteak beste, Javier Ederra, lehendakariorde; Maria Amelia Irastorza, idazkari; Juan Alberto Sosa, idazkariorde; Maria Teresa Sorrarain, diruzain; eta Iñaki Ederra, diruzainorde.
2013/05/10
Euskal Etxeko Lucio Echaniz Liburutegiak antolatuta, ‘Biblioneta’ren laguntza izan zuten Arrecifeseko euskaldunek ‘Ipuinaren Ordua’ irakurketa zikloari hasiera emateko. Proposamena oso erakargarria suertatu zen eta herriko eskoletako 3 eta 11 urte arteko berrehun bat neska-mutil bertaratu ziren euskal etxera literaturaz gozatzera. Arrakastaren ondotik, ‘Ipuinaren Ordua’ zikloaren bigarren emanaldia bihar larunbata izango da. Eta hurrengo asteburuan, maiatzaren 18an, txistularien bilgune izango da Arrecifesko Euskaldunak Denak Bat, txistulariei zuzendutako 2013ko lehenengo FEVAren tailerrean.
2013/05/09
EuskalKultura.com-en euskal etxeek euren jardueren berri emateko egiten dituzte ekimenak zabaltzen lagundu nahi dugu, batez ere albistariak eta buletin elektronikoak egiten dituztenen ahalegina azpimarratuz. Halatan, jarraian eskuragarri jarri ditugu geurera heldu diren lau buletin: Arturo Campion Euskal Ikasketa Zentruko Guregandik aldizkaria, Caracaseko Euskal Etxeko Jazoera, Necocheako Euskal Etxeko Mezulari eta Astero, North American Basque Organizations federazioaren asteroko buletina.
2013/05/09
larunbatean hasiko da Valladolideko Gure Txoko elkartean espainiar estatuko euskal etxeen Mus Txapelketa. Iazko txapeldunak Gure Txokokoak izan ziren eta, hori dela, aurten elkarte honen ardura izan da bilkuraren antolakuntza. Mus partidekin batera, euskal etxeek topaketa baliatuko dute espainiar federazioaren urteroko bilkura egiteko. Gure Txokoko idazkari Jokin Oncaladak EuskalKultura.com-i agertu dionez, asteburuko jardueretako partehartzaileen artean honako euskal etxeen ordezkaritzak izango dira: Bartzelona, Valentzia, Salou, Madril eta Mallorca, Valladolideko antolatzaileekin batera.
2013/05/09
Deia ingelesa mintzo duten Diasporako euskaldunentzat da. "Au pair" bezala aritzea beti da esperientzia aberasgarria: haurrekin lanean trebetasunak garatzeaz gain, tokiko pertsonak, hizkuntza eta kultura ezagutzeko bide aparta da. Gasteizko familia euskaldun bat Diasporako "au pair" baten bila dabil, sei eta zortzi urteko bi neska-mutiko zaintzeko; delako pertsonak ingelesez egin beharko lieke haurrei, eta familiarekin euskara edo gaztelania ere ikas/praktikatuko luke. Aukera bat izan daiteke Euskal Herria ezagutu eta euskararekin aurrera egiteko.
2013/05/09
Gernikako Bonbardaketaren 76. urtemuga gogoratzerakoan Argentinako bandera eta ikurrina lehendabizikoz altxatu ziren Chivilcoyko Gernika Plazan. Euskal etxeko kideak ez ezik, auzokide ugari ere bertaratu ziren euskal pasealekura masta eta monolito berriak ikustera. Jauregui apaizaren bedeinkazioaren ostean, pintxoak partekatu zituzten bildutako lagunek euskal etxean. Egun batzuk lehenago, Beti Aurerra-ko areto nagusia Aberri Eguneko afariaren egoitza ere izan zela jakinarazi diote erakundetik EuskalKultura.com-i, 200 bat pertsona bildurik.
2013/05/08
Euskal Kultur Erakundeak eta Azkue Fundazioak “Irudimena” lehiaketa jarri dute abian hirugarrengoz Euskal Herriko zein Diasporako buru sortzaileei zuzenduta. Zertan datza erronka? Euskal Herriko soinumapatik hartutako zortzi soinuetatik abiatuta, soinu berri bat, testu bat edo irudi bat sortu behar da. Maiatzaren 15a da parte hartzeko azken eguna. Mugi!
2013/05/08
Iragan ostiralean, maiatzaren 3an, Asuncion hiriko Jasone Euskal Etxeak Ohiko Bilkura Orokorra egin zuen. Eguneko gai-zerrendak aldaketa garrantzitsu bat izan zuen azken orduan; izan ere, ordura arte presidenteorde zen Arturo Sasiainek kargua uzteko asmoa agertu zuen, osasun arazoak kari. Bere ordez Eddy Irigoitia bazkidea aukeratzea proposatu zuten bilerara bildu zirenek eta aho batez hautatu zuten buruzagi berria. Harekin batera zuzendaritzakide dira Hector Izaguirre presidente, Eddy Irigoitia presidenteorde eta Galo Egüez idazkari.
2013/05/08
Birmingham-eko Unibertsitateak bihar bertan jarriko du abian Euskal, Katalan eta Galiziar Zinema Sailaren hirugarren edizioa, bertan hiru hizkuntzok irakasten dituzten irakurletzek eta kultura sailek antolatuta. Zinemaldia euskal film batekin hasiko da: Jabi Elortegiren "Zorion Perfektua", Anjel Lertxundi idazlearen izen bereko eleberrian oinarritua. Zuzendaria emanaldian izango da eta lanari buruz hitz egingo du bertaratzen diren ikusleekin.
2013/05/08
Udaletxean burututako bileran Urkullu Lehendakariaren laguntzeko eskaintza transmititu zioten Asier Vallejo Kanpoan den Euskal Komunitatearentzako zuzendariak eta Sara Pagola Argentina-Mercosur-erako ordezkariak hiriko alkate Pablo Bruerari. Are gehiago, La Platara egindako bisitan, uholdeen kalteak jaso zituzten lagunekin ere bildu ziren mandatariak. Honekin batera, Gernikako Bonbardaketaren 75. Urteurrenari buruzko Erakusketaren baitan antolatutako ekitaldien berri helarazi digute Euzko Etxea-tik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
