euskal diaspora eta kultura
2013/06/03
Pasiotarren ordenak ehun urte bete ditu aurten Peruko misioetan eta hainbat ekitaldi antolatu dira Mendeurrena ospatzeko. Perura misiolari etorri zirenen artean euskaldun asko egon ziren eta, kari horretara, bertako euskal komunitateak jardueretan hartu du parte. Tartean, bertan atxikimendu handia bildu zuten Venancio Orbe eta Santos Iztueta apezpiku euskaldunen gorpuzkinen erromesaldian: Tarapototik probintziako hiriburu den Moyobambako Katedralera eraman zituzten, bertan lur emateko.
2013/05/31
New Yorkek txakolina maite du eta horren irudi da Txikifest jaialdiaren arrakasta. Aurten hirugarren edizioa izango du Manhattan-eko Txakolin Egunak, eta, aurrekoetan bezala, 500 bat lagun espero dituzte antolatzaileek. Festaren sustatzaileak Txikito jatetxeko jabeak dira: Eder Montero sukaldari bilbotarra eta Alex Raij newyorkatarra. Ekimenak Bizkaiko Foru Aldundiaren laguntza du eta aurten 16 txakolindegien ardoak izango dira dastagai.
2013/05/31
Ideia iaz urte erdialdean sortu zen, Arrecifeseko Euskaldunak Denak Bat Euskal Etxearen baitan. Proposamenak arrakasta berehala lortu eta lekuak berehala bete ziren gehienbat Arrecifes, San Pedro, Suipacha eta Buenos Aireseko –Euskaltzaleak– lagunekin. Orain, unea heldu da eta taldea gaur abiatuko da Euskal Herrira, bi asteko bidaian, bisitatzeko Gernika, Gaztelugatxe, Aralar, Biarritze, Bilbo, Donostia, Gasteiz, Iruñea, Donibane Garazi.... Gaur hasiko da abentura. Izan bidaia on, lagunok!
2013/05/31
Kern County-ko Euskal Etxeak euskal kulturaz zipriztindu du Kaliforniako Bakersfield beste urte batez, Euskal Besta edo Basque Festival deritzon jaialdiarekin. Bestaren 41. edizioa ospatu dute aurten inguruko euskal-amerikarrek maiatzaren 24tik 27ra bitartean. Lau eguneko programa aberatsa eskaini du euskal elkarteak: Bertsolari dokumentala, hitzaldia, mus txapelketa, bazkari-afariak, pilota partidak, dantzaldiak eta dantza erakustaldiak euskal etxearen frontoian.
2013/05/31
Beste hainat euskal etxerekin gertatu bezala, hiriburu venezuelarreko Eusko Etxea pertsona askoren eta belaunaldi diferentetako euskaltzale ugariren ekarpen baliosen emaitza da eta euskal elkartea saiatzen da urtean zehar guztian gogoan hartzen. Maiatzaren 18an, omenaldia eskaini zien amei, 'Amatxuren Eguna' ospatuz.
2013/05/30
Jose Mujica Uruguaiko presidentea Euskal Herrian izango da asteburuan, Txinara eta Europara egiten ari den bi asteko bidaiaren baitan. Bihar arratsaldean Gasteizera helduko da eta Iñigo Urkullu lehendakariarekin bilduko da. Ondoren, harrera ofiziala egingo zaio Lehendakaritzan. Etzi, Vaticanora joango da eta Frantzisko Aita Santuak hartuko du. Ondoren, Euskal Herrira itzuli eta arbasoen sorterrian, Muxikan, egingo du lo. XIX. mendean Bizkaiko herri honetatik abiatu ziren bere aitaren familiakoak Ameriketara. Etzidamu, Mondragon Kooperatiba Taldeari egingo dion bisitarekin amaituko da Euskal Herrira bisita.
2013/05/30
Berri onak dituzte Puerto Madryngo euskal erakundeko lagunek komunitatearekin partekatzeko. Garrantzitsuenetako bat, Argentinako euskal diaspora antolatuan instituzioaren egoera berriarena. Izan ere, FEVAren azken bileran ‘bazkide aktibo’ onartu du Federazioak Chubut probintziako euskal etxea, bertatik adierazi zaigunez. Hau eta beste gai batzuk garatuko dituzte euskal etxeko kide eta lagunek datorren igandean –ekainaren 2an- burutuko duten bazkari-elkarretaratzean.
2013/05/29
Eusko Jaurlaritzaren Gobernu Kontseiluak euskal elkarte berri bat onartzeko proposamena onartu zuen atzo, Kolonbiako Antioquian izan ere: "Fundación Centro de la Cultura Vasca Gure Mendietakoak" (Gure Mendietakoak Euskal Kulturaren Zentroa Fundazioa) da euskal etxeen erregistroan sartuko den elkarte berria. Honekin, hiru dira herrialdean ofizialki onetsita dauden euskal etxeak, Bogota hiriburuan bat eta Antioquiako Medellin-en bertan bestea.
2013/05/29
Berlingo Euskal Etxeak antolatuta Inaxio Lopez de Arana itzultzaile eta ikertzaileak hitzaldia eman zuen Alemaniako hiriburuan iragan astelehenean. Lopez de Aranak Rudolf Trebitsch etnologo austriarrak 1913ko udan egindako euskal grabazio musikalak aztertu ditu eta haiei buruz solastu zen. grabazio horien artean aipagarria da Gernikako Arbola abesti ezagunaren aurreneko grabazioa. Biharamunean, Leipzigeko Unibertsitatean eman zuen bigarren hitzaldia, hango Euskara eta Euskal Kultura irakurletzak gonbidatuta.
2013/05/29
Iralabarriko San Antonio abesbatzak taldeko kantari guztien ilusioa piztu duen ekimena jarri du abian: New Yorken kantaldia egitea, hiri horretako Euzko Etxea elkartearen Mendeurreneko ospakizunen baitan. Euskal etxea amerikarraren sorrerako ehun urteak urriaren 11tik 14ra ospatuko dira, hirian egingo diren zenbait ekitaldiekin. Abesbatzak finantziazio kanpaina jarri du abian, amets hori betetzen lagundu nahi dietenen artean bidaia ordaintzeko laguntza bat eskuratzeko asmoz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
