euskal diaspora eta kultura
2013/10/11
Iñigo Urkullu lehendakaria gaur sartuko da New Yorken, AEBetara egiten ari den bidaiaren azken zatian. Goizean bilera eta aurkezpen bat izango ditu Columbia Unibertsitatean eta segidan beste bilkura bat Guggenheim Fundazioko buruzagitzarekin. Ondotik, New Yorkeko Eusko Etxearen Mendeurreneko ekitaldietara bilduko da. EENYen egoitzan, EHMG mintegiaren bigarren saioa izango da gaur, partaide direla Anna Aguirre, Argitxu Camus-Etchecopar eta Joseba Etxarri, EuskalKultura.com-en zuzendaria, eta ondoren Kalakan hirukotearen emanaldi bat. Astebururako dena dago prest Eusko Etxea of New York elkartearen Mendeurren ospakizun handirako.
2013/10/11
Quebec-eko Euskaldunak Euskal Etxeak ikasturtea hasi zuen irailaren hondarrean, eta gogo biziz hartu dituzte bazkideek euskara, dantza eta mus ikastaroak, besteak beste. Horiekin guztiekin batera, ikastaro berri bat izango dute aurten quebectar euskaldunek; izan ere, arraunketa klaseak abiatuko dituzte, Indianoak espedizioko kideek elkarteari oparitu zioten traineruarekin. Horrez gain, aste honetan New York-en izango da Quebec-eko euskaldun talde bat, New Yorkeko Euskal Etxearen Mendeurreneko ekitaldietan parte hartzeko.
2013/10/11
Misiones probintzia argentinarreko Posadas hiriburuko Euskal Jatorri euskal etxeak antolatuta, “Eusebio Zamacola Abrisqueta. Euskal bidelapur bat Chacon” bere liburua aurkeztuko du gaur, urriaren 11an, Fabio Echarrik Herriko Liburutegiko Auditoriumean. Hitzordua iluntzeko 8etan da, eta sarrera libre eta doakoa. Gogora dezagun liburutegi berean eta FEVAren kultur eskaintzaren baitan, Laura Nobile adituak genealogiari buruzko hitzaldi bat eskaini zuela joan den abuztuaren amaieran.
2013/10/10
Euskal Herria eta euskal kulturak ohi baino tarte zabalagoa dute egunotan AEBetan, batetik, Lehendakaria herrialde honetan delako eta, bestetik, New Yorken Euzko Etxearen Mendeurrena eta Atxaga katedraren lehen saioak abian direlako, aurtengoan aipatu Mendeurreneko egitarauarekin bat eginez. AEBetara --eta beste inora ere Europarik kanpo-- aurreneko bidaia ofiziala egiten ari da Urkullu eta atzo Washingtonen Kongresuko eta Senatuko ordezkariekin bildu zen. Washingtoneko Euskal Etxeko kideekin ere topaketa egin zuen Urkulluk. New Yorken, astelehenean jarri ziren abian, CUNY unibertsitatean, Atxaga Katedraren 2013ko saioak, eta arrakastaz, Etxepare Institutuak aditzera eman duenez. Gaur lekukoa hartuko dio Euskal Herria Mugaz Gaindi mintegiak, asteburuko Euzko Etxearen Mendeurreneko ekitaldien zain.
2013/10/10
Oso berri onak ditu Gral. Las Heraseko Zazpirak Bat-ek, Buenos Aires-tik 80 bat kilometro Mendebaldera, komunitatearekin konpartitzeko. Eraikinean egiten ari diren konpontze lanak bukatu bezain laster –berrogei bat egun barru– euskal etxearen egoitza eta Euskal Taberna inauguratuko ditu erakundeak Villa Mayor eta Lozano kaleetan. Horrekin batera, urte amaiera jai handi bat ari da antolatzen instituzioa: bazkari nagusia, abenduaren 1ean izango da. Eta herriko Udaberri Jaian burututako Auto Zaharren erakusketaren berri ere iritsi zaigu Gral. Las Heraseko euskal etxetik.
2013/10/09
Iragan irailaren 29an Ontario Basque Club elkarteak, AEBetako Oregon estatuan, aurreneko aldiz ospatu zuen Saint Michael's Festival izeneko jaialdia, San Migel egunaren karira. Euskal etxeko kideak ilusio biziz aritu ziren festa prestatzen irailean zehar, baina azken unean ezusteko gonbidatu bat bildu zen jaira: euria, eta ez nolanahikoa. Erauntsia bota zuen Ontarion, baina, hala eta guztiz ere, elkarteko kideek aldarte ona eta ondo pasatzeko gogoa erakutsi zuten eta egunaz gozatu zuten. Kalakan taldearen kontzertu batekin amaitu zen festa, giro ederrean.
2013/10/09
Antolatzaileak zein hizlariak oso pozik agertu dira deialdiak izandako erantzunarekin. Are gehiago, euskal kolektibitateak isilpean egiten duen lana ezagutarazteko hau bezalako ekintzak antolatzeko beharra eta garrantzia ere azpimarratu dute ‘Euskal erakundeak eta kultura’ hitzaldi sortako arduradunek. Eta esperientzia errepikatzeko asmoa iragarriz itxi zuten bi eguneko zikloa. Agintari batzuk bildu ziren La Platako Abokatuen Elkartean jardunaldien inaugurazioan, tartean, Euskadiren Ordezkari Sara Pagola.
2013/10/08
Iñigo Urkullu lehendakaria gaur abiatuko da AEBetara, bertan astebeteko bidaia ofiziala egiteko. Bidaiaren helburua Euskadiren garapen-arlo guztiak ezagutaraztea da: politikoa, ekonomikoa, soziala eta kulturala. Hori dela eta, Ekonomiaren Garapen eta Lehiakortasuneko sailburu Arantxa Tapia AEBetan da dagoeneko, ekonomia-arloko zereginetan. Asteburuan New Yorken izango da Urkullu, Euzko Etxea elkartearen Mendeurreneko ekitaldietan parte hartzeko, AEBetako euskal komunitatearekin batera.
2013/10/08
Argentinako EAJ-PNVren sorrera eta garapena azaltzen dituen ‘Euskal aberria Argentinan. Ehun urte Abertzaletasun’ liburua azaroaren 21ean aurkeztuko da ofizialki Bilboko Sabino Arana Fundazioaren egoitzan. Horren ostean, Euskal Herriko hainbat batzokitan eta Durangoko Euskal Liburu eta Disko Azokan presentatuko du bere lana idazle argentinarrak. Gogora dezagun liburua Magdalena
Mignaburu idazle argentinarraren ikerlana dela, EBBren (Euskadi Buru Batzar) eta Sabino Arana Fundazioaren babesean egina.
2013/10/07
New Yorkeko Euskal Etxeak Mendeurrena betetzen du aurten eta, ehun urte horien ospakizunekin batera, euskal Diasporaran erdigune bihurtuko da aste honetan hiri estatubatuarra. Hasteko, gaur bertan abiatuko da CUNY unibertsitatean Atxaga Katedra, Etxepare Euskal Institutuak sustatuta, eta asteazkenera arte zenbait hitzaldi eta ekitaldi ireki egingo dira bertan. Ostegunean, Euskal Herria Mugaz Gaindi mintegiak hartuko du lekukoa eta asteburuan euskal etxeak Mendeurreneko jai itzela egingo du. Jarraian, ekitaldi hauen guztien behin-betiko egitaraua.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
