euskal diaspora eta kultura
2013/12/17
Euskararen Nazioarteko Eguneko ekitaldien berri ematen segitzen dugu. Maiz ENE eta urte amaiera ekitaldi berean ospatu ohi da Abenduan Hego Amerikako euskal erakundeetan. Kari horretara, hainbat lekutan abenduaren 3an bertan burutzen dira ospakizunak baina beste askotan hilean zehar ere gauzatzen dira. Proposamenak era askotakoak dira baina euskaraz egin daitezkeen jolas eta ongipasak gailentzen dira. Datozen lerroetara bildu dugu La Platatik Txileko Santiagora, Andeetako bi aldeetako euskara irakasle, ikasle eta zaleen zenbait ospakizun.
2013/12/16
EuskalKultura.com-ek egin zuen bezala, Deia egunkariak
ere jaso du Miamiko Euskal Etxeak Joseba Andoni mutiko bakioarraren aldeko sostengu kanpainaren berri. Zortzi urteko gazteak istripu larria izan zuen hamaika hilabete zituela eta harrezkero osasun eta garapen arazoak izan ditu. 2007az geroztik Miamin bizi da, hango ospitale batean tratamendu berezia egiten. Orain, terapia berri eta oso garesti bat egin behar du eta, horri aurre egin ahal izateko, Miamiko Euskal Etxeak diru-bilketa kanpaina abiatu du. Atlantikoz bestalde abian jarri den ahaleginaren berri eman zuen atzo Deiak, jarraian laburtuta eta euskaratuta jaso dugun artikuluan.
2013/12/16
Necocheako Ikastolak eta Mondragon Unibertsitateak sinatutako akordio bati esker, irakasleak izateko ikasten ari diren hiru gazte euskaldun Necochean aritu izan dira euren praktikak egiten, urria eta abendua bitartean. Eskarmentua arrakastatsua izan denez, bi erakundeen arteko elkar ekintza gehiago burutzeko asmoa azaldu dute Ikastolako arduradunek. Gogora dezagun Necochean Ikastola izena duen eskola hau lege argentinarraren eskakizunak betetzen dituen zentro bat dela, gaztelaniazkoa beraz, baina testuinguru euskaldunean, euskal kultura ikasgaietako bat izanik. Orain arte lehen mailako zikloa irakatsi du eta 2014tik aurrera bigarrena ere eskaintzen hasiko da, ekimenaren sustatzaile den Xabier Zubillagak EuskalKultura.com-i aitortu dionez.
2013/12/13
Sari batek beti ematen du plazera. Are gehiago erabat ezustean ematen badizute eta, Buber Saria bezala, internet alorreko Euskal Herriko zaharrena eta oihartzunik handiena duena bada. 2013ko Buber Saria, euskararen sustapenari dagokion atalean, EuskalKultura.com proiektuari eman zioten atzo Arabako Parke Teknologikoan egindako ekitaldian. Ohoratze hau, estuasun ekonomiko momentu berezi batean iritsi zaio, gainera, EuskalKultura.com-i. Diasporaren presentziari interneten eta Euskal Herri osoaren baitan Diasporaren ekarpenari emandako saritzat hartuta eman zituen atzo eskerrak Joseba Etxarri ekimeneko zuzendariak, saria, proiektua egunero-egunero kaleratzea posible egiten duten lankide, irakurle, sustatzaile, laguntzaile eta oro har lagun familia osoarena dela esanez.
2013/12/13
Astebeteko bira egin berri du Karmele Jaio idazleak Mexikon, Etxepare Euskal Institutuak gonbidatuta, herrialde honetan euskal literatura zabaltzeko eta ezagutzera emateko helburuarekin. Horren baitan, Guadalajarako Nazioarteko Liburu Azokan eta Mexiko Hirian hainbat irakurraldi, literatur topaketa eta ekimenetan parte hartu dute idazleak eta Etxepareko Euskararen Sustapenerako zuzendari Mari Jose Olaziregik.
2013/12/13
Oroimenez euskal etxeko lagunen eskutik, sanferminetako koloreak nabarmen nagusitu dira Los Toldosen egin berria den Gizataldeen Jaian. Izan ere, euskal etxeko kideak zuri eta gorriz jantzi ziren euren bizilagunei Euskal Herriko plater, dantza eta musika tipikoak aurkezteko. Jaialdia, gainera, baliagarria bilakatu zen euskararen berri emateko Euskararen Nazioarteko Eguna (ENE) tarteko. Euskaldunez gain, kolektibitate italiar, espainiar eta holandarra ere bildu ziren herriko Mitre kalean.
2013/12/12
Euskal Herriko Ikastolen Elkarteak dakar Gabonetarako zorion postalak egiteko aplikazio berria: "ZoriON" izena du eta sakelekoen bidez jaietan lagunei bidaltzeko txartelak egiteko aukera ematen du. Aukeratu nahi duzun hondoa, edo zure familia edo txikien argazki bat akaso; gehitu zure gustuko pertsonaia -- Olentzero eta Mari Domingi, Argitxo, Ttantto, Txirritx eta Xango, trikitilariak, neska-mutilak…--, idatzi mezua eta kitto! Prest duzu zorion postala, mugikorretik sare sozialen bitartez bidaltzeko prest. Eta gainera, doan!
2013/12/12
Erritmo onean hazten doa Buenos Aires probintziako Gral. Las Heraseko euskal etxe gaztea. Izan ere, oso urte gutxitan erakundearen egoera formalizatzeaz gain, dantza taldea, egoitza propioa eta eskualdean honezkero bere lekua egina duen euskal jai bat sortu du Zazpirak Bat-ek. Luis Echegaray lehendakariaren eskutik, III. Euskal Astea burutu berria dute euskal etxeko lagunek 2013ari azken agurra emateko. Urtez urte handituz doan festan aurtengo proposamen berri izan da Sega Txapelketa. Festak Cañuelas, San Miguel, Marcos Paz eta Buenos Aireseko euskal etxetako lagunen partaidetza ere b ildu zuen.
2013/12/11
Batzuetan sorpresa onak hartzen ditugu, eta iaz EuskalKultura.com Diario Vasco Sarietako webgune finalista izan bazen euskarari zegokion kategorian, aurten Euskal Herrian zaharrenak diren Buber Sarietan finalista hautatu dute gure webgunea, oraingoan ere euskarari dagozkion webgune eta aplikazioen kategorian. Mila esker gure izena proposatu eta gure alde bozkatu duten internautei. Orain epaimahai batek hautatuko du finalisten artean sariduna. "Bitxia da, baina oso egoera larrian gaudela iritsi zaigu berri hau", esan du EuskalKultura.com-eko zuzendari dugun Joseba Etxarrik. "Aste honetan eta urte amaiera honetan bertan erabaki latzak hartu beharko ditugu, erabat erori baitira gure diru sarrerak. Itxiera ekiditen badugu, oso mozketa gogorrak eginez izango da. Bihar emango dugu honen berri", aitortu du.
2013/12/11
Bozkarioa nagusi izan zen joan den larunbatean Buenos Airesen, Euskararen Eguna ospatzeko hiriko Euskaltzaleak euskaltegiak antolatutako jaian. Bertan, ordea, Euskararen Eguna baino gehiago ospatu zen. Izan ere, oso urte emankorra izan da 2013 euskaltegiarentzat, egoitzan egindako berritze lanei esker ekintza andana burutu baita. Baina zalantzarik gabe, kopa jaso eta topa egiteko arrazoi handiena ENE Saria irabazi izana izan zen. Eusko Ikaskuntzak ematen duen saria Buenos Aireseko Euskaltzaleak-entzat izan da aurten eta, erakundeko arduradunek esan dutenez, “elkartearen 70. urteurreneko urtean sartzeko era bikaina da”.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
