euskal diaspora eta kultura
2007/11/20
Donostiako Saturraran Argitaletxeak interneten jarri du bere publikazioen katalogoa. Liburu gehienek euskal erbestea eta erbesteratuen lana dute gai nagusi. Halaber, katalogo bera paperezko formatoan ere argitaratu du argitaletxeak. Webgunearen helburu nagusia Saturraranek argitaratutako lanen berri hedatzea eta mundu osoko irakurleei eskuratzeko bideak erraztea izan da.
2007/11/20
Urtero legez, Chascomús-eko Euskal Etxeko kideek ohiko euskal festa nagusia antolatu zuten bertako Bochístico klubean eta 800 pertsona baino gehiago bertaratu ziren ospakizunetara. Hitzordu hau zinez errotuta dago herrian eta aukera ematen die euskal jatorrikoak ez diren chascomustarrei euren auzo eta lagun euskaldunekin biltzeko euskal kutsuko ekitaldi batean eta, baita ere, Euskal Etxearen baitan lanean ari diren taldeen lana hurbilagotik ezagutzeko, urtean zehar egindako hamaika saio eta ahaleginen emaitza baita EEko haur eta gazteen taldeek bertara ikusgai daramatena.
2007/11/19
Ekimenaren helburua Ameriketako egunkarietan azken 100 urteetan euskal Diasporari buruz agertu diren albisteak bildu eta digitalizatzea da. Asmo hori nola burutu finkatzeko Eusko Jaurlaritza, FEVA, Euskal Herriko Unibertsitatea eta Argentinako Hegoaldeko Unibertsitatea bildu ziren iaz. Orain Buenos Aires, La Plata, Rosario, Tandil, Mar del Plata eta Cordobako Unibertsitateek eta beste zenbait euskal etxeek ekimenean parte hartzeko gonbitea jaso dute. Erakunde hauetako gazteak izango dira bildutako materiala euskarri digitalera pasatzeko arduradunak eta horretarako trebakuntza ikastaro bat jasoko dute bi aste barru.
2007/11/19
Abenduaren 5etik 9ra bitartean irekiko ditu aurten ateak Durangoko Euskal Liburu eta Disko Azoka eta, iaz bezala, EuskalKultura.com-ek stand-a zabalduko du bere baitan, Diasporaz eta Pirineo magaleko Euskal Herritik kanpoko euskaldunei buruzko irudiak, materiala eta informazioa eskuragai ipiniz. Euskal etxeei eta Diasporako ekimenei eskaintza egin die EuskalKultura.com-ek, hala nahi badute stand-a euren produktu eta ekintzen erakuslehio gisa erabil dezaten, beti ere Diasporako euskaldunen lana Euskal Herrian gero eta ezagunagoa izan dadin laguntzearren.
2007/11/19
Patxi Baztarrika Eusko Jaurlaritzako Hizkuntza Politikarako sailburuordeak, Paquita Sanvicén, Kataluniako Generalitateko Hizkuntza Politikako Planifikazio eta Sustatze zuzendariak, eta Marisol Lopez Galiziako Xuntako Hizkuntza Politikako idazkari orokorrak parte hartu dute hizkuntzen nazioarteko azokaren itxiera-ekitaldian, asteburuan Alemaniako hiriburuan. Carlos Perez-Nievas Hezkuntza kontseilari nafarra ere Berlinen izan da, Euskararen Nafar Institutu sortu berriak Expolinguan ipinitako euskararen standa bisitatzen.
2007/11/19
Iñaki Abendibar eta Angel Rivero bikoteak, Euskadi ordezkatuz, irabazi du Mar del Platan egin berria den Nazioarteko XXX. Mus Txapelketa. Guztira hamaika herrialdetako ordezkariak bildu dituen norgehiagoka azaroaren 3tik 11ra gauzatu da Buenos Aires probintzia hegoaldeko bainutegi-zentru den hiri honetan. Txapeldunordeak Kanadako Txomin Azpiri eta Pedro Onaindia izan dira. Partehartzaileak zein antolatzaileak pozik agertu dira astebetean bizi izan duten giro eta esperientzia aberatsarekin.
2007/11/17
Tandileko Euskal Etxeak bere sorreraren 58. urteurrena betetzen du egunotan eta data hau ospatzeko prestatu dituzten ekitaldien artean, euskal elkarteak bosgarrenez antolatzen duen Abesbatz Topaketaren txanda heldu da gaur. Topaketan lau euskal etxetako koruek hartuko dute. Hauek dira: Tandileko Gure Abestiak, Coronel Pringleseko Eusko Alaiak abesbatza, Cañuelaseko Denak-Bat korua, eta Azuleko Euskal Bihotzak.
2007/11/16
Aurreko urteotan bezala, euskarak presentzia ukanen du gaur hasi eta datorren igandera arte Berlinen gauzatuko den Expolingua hizkuntzen Azokan. Honakoan, ordea, presentzia hori gutxienez bikoitza izango da, ohiko Eusko Jaurlaritzakoaz aparte --aurten Galiziako Xunta eta Kataluniako Lull Institutuarenarekin batera eratua-- Nafarroako Gobernuak ere bidali baitu ordezkaritza eta erakustokia ipiniko baitu bertan, Nafarroako Euskararen Institutu sortu berriak. Hezkuntza kontseilari nafarra ere, Carlos Perez-Nievas, bertaratuko da Azokara eta, Jaurlaritzaren aldetik, presentzia instituzionala Patxi Baztarrika Hizkuntza Politikarako sailburuordeak eta Lorea Bilbao Kultura aholkulariak ekarriko dute.
2007/11/16
Lagunt eta Maita Paueko Euskaldunen Elkarteak berrogei urte bete ditu eta Izar Bide ikuskizun berezia aurkeztuko du gaur urteurrena ospatzeko. Dantzek eta kantuek osatutako erakustaldia aurrera eramateko ehun pertsona baina gehiago aritu dira lanean ia urtebetez. Emaitza gaur ikusi ahal izango den ikuskizun landua izan da, erbesteratzearen aipamen poetikoa. Bertan oso modu berezian azalduko dute Euskal Herriko puntu desberdinetatik Diasporara emigratu zutenek bizitakoa eta nola zabaldu diren euskaldunak gaur egun arte.
2007/11/16
Joan den asteburuan, Maria Blanca Irusta irakasleak koordinaturik, FEVAk Kultura Tailer bat bideratu zuen Buenos Aireseko Laurak Bat-en. Tailerraren helburua, "euskal identitatea zabaldu eta honi buruzko gogoeta bultzatzea" zen. Taldeka eta bakarkako lana egin zuten ikastaroan parte hartu zutenek, hainbat gai aztergai. María Blanca Irustak positibo baloratu du esperientzia, "ideia ezberdinak errespetuz eztabaidatu ditugulako, gazte eta helduen ekarpenen aberastasunagatik eta ekimenak berak piztu zuen interesagatik", laburbildu dio EuskalKultura.com-i.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
