euskal diaspora eta kultura
2008/03/12
San Frantziskotik internet bidez kantuan ariko diren bertsolariak, kantari euskal argentinar bat eta Ameriketako euskal artzainen esperientzia kontatzen duen 'Euskamerikan Artzain' pastoralaren estreinaldia dira, besteak beste, etzi hasiko den Xiru jaialdiaren 19. edizioak proposatzen dituen 'gutiziak'. Gotainen, Zuberoan, ospatzen da Xiru eta aurten 'Zazpiak ta Bat' izenburupean dator, euskal Diasporari begira. Jaialdiak Joseba Sarrionandiaren poema hartu du inspirazio iturri: "Itsasoaz bestaldera joan ziren, eta ez dira egundo itzuliko... Eta inoiz itzuliko balira ere, jadanik ez dira joan zirenak izango".
2008/03/12
Eusko Jaurlaritzak ofizialki onetsi zuen atzo eta, beraz, Euskal Etxeen Erregistroan sar araziko du datozen egunetan 'Hegoalde Argentinarra' Euskal Etxea, Argentinako Santa Cruz probintzia patagoniarreko Río Gallegos hiriburuan egoitza duen ezkero bere burua 'munduko euskal etxerik australena' gisa aurkezten duen euskal erakundea. 'Hegoalde Argentinarra'ko bazkideak munduko gainerako euskal etxeetako kideei onartzen zaizkien eskubide eta obligazio berberen jabe izango dira aurrerantzean. Zorionak erakunde onetsi berriari.
2008/03/12
Chaco probintzia argentinarreko Euskal Etxeak pilota ikastaro bat antolatu du, Club de Regatas Resistencia elkartearekin lankinde. Ikastaroa haur eta gaztetxoei zuzenduta dago eta doakoa da. Ikastaroko klaseak delako estropada klubeko trinketean egiten ari dira, astean bitan. Momentuz ekimenak izan duen erantzuna oso ona izan da eta dagoeneko neska-mutil talde polit bat ari da pilotako lehen pausoak ematen.
2008/03/12
Bere sorreraren 25. urteurrena ospatzeko, Zarautz Abesbatzako kideak larunbatean abiatuko dira Argentinarantz, Buenos Airesen bi kontzertu emateko. Lehena, martxoaren 18an, argentinar hiriburuko Laurak Bat Euskal Etxean eskainiko dute eta bigarrena, martxoaren 19an, San Frantzisko Basilikan. Bi emanaldi horietan batez ere euskal folkloreko kantak kantatuko dituzte, baina ez dute folklore argentinarra ahaztuko. Nahiz eta baieztatzeke egon, hirugarren kontzertu bat emateko aukera ere eduki dezaketela adierazi dute abesbatzatik.
2008/03/12
Suipatxako Gure Txokoa Euskal Etxeak, bere aldizkariaren 15. zenbakian, euskal etxearen kultur ekintzei buruz informatzen die bere bazkide eta lagunei. Azken buletinak Gure Txokoako 8. urteurrena ospatzeko --350 pertsonatik gora partaide-- egindako festari buruzko informazioa ematen du, Euskal Aste Nazionalaz, San Juan Gaueko euskal ekitaldiez, Euskaria Fundazioaren bisitaz, eta Hiriaren Urteurrenari buruz ere ari delarik, beste hainbat gairen artean, hamasei orrialdetan zehar. Argazkiz hornituta, artikuluek Suipatxako makina bat denda eta enpresaren iragarkien sostengua ere badakar, euskal etxeak herria dinamizatzearen alde egiten duen ahalegin garrantzitsuarekiko esker ona adieraziz.
2008/03/11
Etzi Sao Pauloko bidean izango dira Paya anaiak --Fredi eta Xabi-- eta Maialen Lujanbio bertsolaria Brasil, Argentina eta Uruguaien bira egiteko asmoz. Hilaren 22tik 29ra emanaldiak eskainiko dituzte herri hauetako inprobisatzaileekin batera, horien artean Wilson Saliwoncyk payadore argentinar gaztearekin. Musikaz girotutako ikuskizun moderno eta dinamikoa eskaintzeko asmoa dute, tradizio desberdinak uztartuz: euskaldun batek bertsoa euskaraz bota, besteak gaztelerara itzuli eta payadoreek erantzun egingo diote. Bertsolaritzaren munduan sartzeko aukera aparta, euskaraz egiten ez dutenentzat ere.
2008/03/11
Josetxo Silguero euskal saxoak Argentinara egiten duen bigarren bisita izango da oraingoa. Bihar hasi eta martxoaren 16ra bitartean Buenos Aires eta Rosariotik luzatuko den 2008ko biran, musikariak mintegiak, hitzaldiak, tailerrak eta kontzertuak eskainiko ditu, besteak beste. Emanaldietan, Gabriel Erkoreka, Alberto Posadas, Giacinti Scelsi edo Christian Lauba konpositoreen lanak eramango ditu. Klaseetan, bertako konpositore den Jorge Sadekin batera, teknika eta azterketa-lana eskainiko du.
2008/03/11
Sao Pauloko Eusko Alkartasuna elkarteak Batzar Orokorra egin zuen joan den igandean zuzendaritza berria aukeratzeko. Kideek Jon Andoni Lizarzaburu lehendakari gisa eta Francisco Alava lehendakariorde postuan hautatu zituzten. Bestalde elkarteak Estebe Ormazabal lehendakari izan duen aurreko zuzendaritzaren lanaren baliospen oso baikorra egin du, 'elkartea biziago eta konektatuagoa baitago orain, Euskal Herriarekin zein Sao Paulo, Brasil eta gainerako euskal etxeen inguruarekin'.
2008/03/11
Entre Ríos-eko gobernu probintzialaren gonbidapenari erantzunez, Paranako Urrundik Euskal Argentinar Elkarteak 'Emakumea eta kultura' izeneko topaketan parte hartu zuen iragan asteazkenean bertako beste zenbait elkarterekin batera, musika, dantza eta poesia emanaldiak eta janari tradizionala dastagai izan zituen ekitaldian. Larunbatean gauzatu zen Emakumearen Nazioarteko Eguna zela-eta, euskal etxeak ez zuen emakumea omentzeko aukera galdu nahi izan.
2008/03/10
Garaipen sozialista nabaria atzo Hego Euskal Herrian Espainiako Gorteetara eginiko hauteskundeetan. Igoera argia izan zuen PSOEk, Hego Euskal Herrian gainerako beste guztiak adina diputatu atereaz eta, lehenengo aldiz, Bizkaian lehenengo indarra bihurtuz. EAk bere diputatu bakarra galdu zuen eta Nafarroa Baik bereari eutsi zion. Espainiako Estatuan oro har, PSOE irabazle PPri aurrea hartuz. Bi alderdi horien artean 350 diputatuetatik 322 batzen dituzte, bipartidismoa zinez indartuz, Izquierda Unida eta Esquerra Republicana bezalako alderdien porrota ekarriz. Iparraldean, berriz, gutxiengo diren zerrenda abertzaleek aurrerakadatxo bat izan zuten Frantzia mailan eginiko herri eta kantonamendu hauteskundeetan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
