euskal diaspora eta kultura
2008/03/26
Amaitu berria da uda [hego hemisferioan] eta amerikar kontinenteko hegoalde honetako euskal etxeak ari dira pixkanaka sartzen ikasturte berrian. Halaxe egina du Chascomus herri argentinarreko 'Zingirako Euskaldunak' Euskal Etxeak, arrakastaz egin ere, Aberri Egunaren karietara bildu baitzituen joan den igandean itsasoz bi aldeetako payadore eta bertsolariak, 'aberria ospatzeko modurik onenean', bertan egon zirenen esanetan. Chascomuseko euskaldunek datorren larunbatean egingo dute euren EEko Biltzar Nagusia eta segidan ekingo diote euskara, dantza, pilota eta gainerako ikastaroen sasoi berriari.
2008/03/26
Udan merezitako atsedena hartu ostean, Chivilcoyko Euskal Etxeak 2008ko Jarduera Planari ekin dio. Otsailean Eusko Jaurlaritzaren eskutik jasotako makina fresatzailearen gaiarekin aritu edo FEVAko hauteskundeetara aurkeztutako bi zerrendetako kideen bisita jaso ondoren, Euskal Etxeak hasia du ikasturte berria. Besteak beste, honako ekimenei eutsiko die: euskal irratsaioa, dantza taldeak, euskara tailerrak edota urteurrenak ere antolatuko ditu datozen hilabeteetan.
2008/03/25
Venezuelako euskal komunitateak ez zion batere hutsik egin joan den igandean Caracaseko euskal etxearen jai nagusienetako bat den Aberri Egunaren urteroko hitzorduari. Elkarteko kide eta lagunak euskal etxera bildu ziren aberriaren gomutaz eta emozioz beteriko eguna bizitzeko. Eguneko ekitaldiak euskal mezarekin hasi ziren eta elkarteko frontoia berriz irekitzen zuen pilota partidaren ostean lagunarteko bazkaria egin zuten bertaratu zirenek.
2008/03/25
Datorren apirilaren 17tik 25era bitartean Amaia Mujika (Euskal Museoa) eta Adolfo Arejita (Labayru Ikastegia) Vienara abiatuko dira Museums of Europe Network and Trebitsch Project batzarrean parte hartzeko eta Euskal Museoak Vienako Kunsthistorisches Museum eta Renneseko Bretagne Museoarekin egin nahi duten katalogazio-proiekturako informazioa eskuratzeko. Rudolph Trebitsch, Vienako Zientzietako Akademia Inperialeko etnografoa, Euskal Herria bisitatu zuen 1913. urtean euskalki guztietako laginak diskoetan grabatzeko eta 60 bat piezekin itzuli zen Vienara. Euskalki guztietako grabazioak lortu zituen, baita gaur egun desagertua dagoen erronkarierakoak ere.
2008/03/25
Enrike Arozena hil zen atzo, frai Enrike, batzuentzat ezagunagoa 'motorraren fraidea' esanez, 51 urtez Arantzazu aldizkariko etxez-etxeko kobratzailea izan baitzen, orain urte gutxi osasuna tarteko utzi behar izan zion arte. Askorentzat Arantzazuko fraideen aurpegia zen, eta etxekotzat errezibitzen zuten urtean behin harpidetza kuotaren papertxoarekin joaten zitzaienean. Bera bezala frantzikotarrak zeuzkan Luis eta Jose Mari anaiek inguratuta hil zen atzo Gasteizko Txagorritxu ospitalean, azkenaldian pixkanaka itzaltzen joan ondoren. Elizkizunak gaur arratsaldean, Arantzazun, seietan.
2008/03/25
Chacoko Euskal Etxeak, Argentinan, oharra kaleratu du antzerkigintza gehituz Euskal Etxeak eskaintzen dituen ikastaroei eta adieraziz, izan ere, etzi osteguna hasiko duela aurtengo Antzerki Tailerra Komunikabideen Museoan, Resistencian, Miguel Lurbe Euskal Etxeko kolaboratzailea den antzerki irakaslearen eskutik. Tailerra kitorik eta publikoari zabalik eskaintzen da, Euskal Etxeak ohi duenez.
2008/03/25
Zenbait hedabidek Hollywoodek euskal animazio filmaren eskubideak erosi dituela argitaratu dute. Baina, Baleuko euskal ekoiztetxeko Miguel Gomez-Tejedorrek EuskalKultura.com-i adierazi dioenez, Durangoko enpresak eta Farcor Estudioak Black to the Moon euskal animazio filma Estatu Batuetan banatzeko akordioa da sinatu behar dutena, azken ikutuak zehazteke. Ardi beltz baten eta zakur baten istorioa kontatzen duen proiektu hau Europan zabaltzeko helburuarekin sortu zen, baina aurre-ekoizpen fasean oraindik, mugak gainditu eta arrakasta ugari lortzen ari da Ozeano Atlantikotik harago. 2010. urtean nahi dute estreinatu.
2008/03/24
Bazko astelehena da gaur. Duela 24 urtetik bezala, Sarako Idazleen Biltzarreko tenorea. Ehunda berrogeita hamar bat idazle eta sortzaile espero dira gaurkoan, eta publiko ugari, eguraldia lagun. Jakina denez, elkarretaratze edo biltzar honen ezaugarri nabariena seguruenik, idazle eta sortzaileekin zuzenean aritzeko aukera da, eurak baitira stand-en atzean euren obra aurkezten dutenak. Aurtengoan EuskalKultura.com bere stand-arekin hartuko du parte, proiektuko zuzendariak, Joseba Etxarrik 'Aña Etxehandi Iriartborde' Bidegileak saileko liburuñoa aurkeztuko duelarik. Diasporak izango du, beraz, zuzeneko ordezkaritza hitzorduan.
2008/03/24
Josetxo Silguero saxojole irundarrak martxoaren 12an hasi zuen Argentinako bira eta amaituak ditu dagoeneko Buenos Airesen eta Rosarion behar zituen mintegi eta kontzertuak. EuskalKultura.com-ek solas batzuk egin ahal izan ditu berarekin. Jendearengan eta, bereziki, antolakuntzarekin somatu duen hurbiltasuna azpimarratu nahi izan du Silguerok. Egunotan egindakoa errepikatu nahiko lukeela adierazi du saxojoleak.
2008/03/20
Badator Aberri Eguna eta munduan zehar asko dira data honen karietara ospakizunak antolatzen ari diren euskal etxeak. Dei honek itzal handia du Diasporako euskaldunen artean eta euskal etxe bat dagoen leku ia guztietan bazkari edo ekitaldi bereziren bat antolatzen da. Hitzordu gehienak asteburu honetan bertan izango dira, Berpizkunde Igandearekin batera. Horrela gertatuko da Madrilen, Mexikon edo Caracasen, adibidez. Beste leku batzuetan, adibidez, AEBetako Washington-en edo Argentinako General Rodriguezen, jaia atzeratu egingo dute, apirilaren 5 eta 6ra, hurrenez hurren. Jarraian hitzordu desberdinen berri ematen dugu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
