euskal diaspora eta kultura
2007/03/24
Miarritzeko Theatre du Versant antzerki konpainiak 'Diaspora Bidaian' proiektuaren lehen fasea burutu berri du. Kultur trukaketa eta lankidetzaren aldeko apostua da 'Diaspora Bidaian' eta Quebec, Venezuela, AEB eta Argentinako taldeekin hartuemanak ditu oinarri. Versanteko bi kide Quebec-en izan dira bertako Le Cochon Souriant taldeko lagunekin lanean; apirilean, berriz, Venezuelara abiatuko dira.
2007/03/24
Nafarroako Gobernuko Kultura eta Turismo sailburua, Juan Ramon Corpas, eta Pirineo Atlantikoetako Kontseilu Orokorreko lehendakariorde den Barthélemy Aguerre baxenabartarra Orreagara bildu ziren atzo, 'Bi Nafarroen Mintegia' izeneko bilkuraren hirugarren edizioan, Pirineo bi aldeetako beste zenbait ordezkari politiko eta profesorerekin batera. Gogoan eduki behar da bi Nafarroak 1512an banatu zirela, Gaztelako Fernando Errege Katolikoaren tropek ordura arte Nafarroako Erresuma independentea zena konkistatu eta egun Nafarroako Foru Komunitatea dena orduan sortzen ari zen Espainiako parte bilakarazi zutenean, geroago Nafarroa Beherea ere, bere aldetik, Frantziako Koroako parte bilakatuko zelarik.
2007/03/23
Euskal Zinemagintzaren egoitza bilakatuko da datorren astean Manhattango (New York) Tribeca Cinema. Astezkenetik ostiralera Basque Filme and Media Arts
Festival izenekoaren lehen edizioa burutuko da bertan Eusko Jaurlaritza eta
Bilboko Udalaren ekimenez. Filmeak, baina, ez dira bakarrik joango
industriako eragile eta zuzendariak ere bidaiatuko baitira Estatu
Batuetara. Egitaraua ikus-entzunezkoen emanaldiek, bi herrialdeetako sektoreko
enpresarien arteko bilerek eta errealizadore berriek ikasle amerikanoei emango dieten mintzaldiek osatuko dute.
2007/03/23
Hasiak dira munduko euskal etxeak Gernikako bonbardaketaren urteurrenerako prestatu dituzten ekitaldien berri ematen. Lapridako Arturo Campion Ikasketa Zentroa horietako bat da eta Argentina iparraldeko El Chaco probintziako Komunikabideen Museoarekin batera hil osoko programa antolatu du Resistentzia hiriburuan. 1936ko guda eta frankismo garaiari buruzko pasarteak biltzen dituen zinemaldia eta Gernikari buruzko erakusketa bat egitarautu ditu.
2007/03/23
Euriak Tres Arroyoseko 38. Gariaren Jai Probintzialaren lehen egunean behar baino protagonismo handiago izan zuen, baina zaparraden mehatxuak ez zuen lortu ondo pasatzeko gogoz bildutako lagunak kikiltzea. Talde askok ezin izan zuten behar den moduan emanaldirik eman, ordea, eta arduradunek jaialdia egun batez luzatzea erabaki zuten. Horrela, martxoaren 7tik 11ra izan behar zuen jaialdiak 12an, astelehenean, izan zuen bere azken eguna. Hiru Erreka Euskal Etxeko dantzariek astelehenean egin zuten azkenik euren emanaldia, eta txalo ugari jaso ere.
2007/03/22
Gaur hasiko da Korrika 15a Karrantzan eta 10 egunetan 2.279 kilometro korrituko ditu Euskal Herriko zazpi lurraldeetan barrena. Iruñean
amaituko den lasterketak euskararen aldeko kontzientzia bultzatzea du helburu eta banako zein talde ugariren babesa jaso du dagoeneko.
Diasporak ere bere ekarpena egingo dio ekimenari eta mundu osoko euskal etxeek ekintzak antolatu dituzte. Ekimenak interneten ere presentzia handia izango du Ziberkorrika eta abarrekoen bidez.
2007/03/22
Gero eta gehiago dira Boisen euskarak euskaldunen kulturan eta nortasunean duen garrantziaz jabetu eta hizkuntza ikasteari ekiten diotenak. Aspalditik ematen ziren euskara klaseak Euskal Museoan, baina 1998an guraso talde batek urrats berri bat eman eta Boiseko Ikastola sortzea erabaki zuen, euren seme-alabek haurtzaroan euskara ikas zezaten. Egun bi ekimen hauek bide sendotik jarraitzen dute, haur eta nagusiak bilduz. Estatu Batuen bihotzean euskara irakasle, Izaskun Kortazarrek bere esperientziaren berri ematen digu.
2007/03/22
Euskal Herriak eta Chubut izeneko probintzia argentinarra akuikultura arloko proiektuak garatzeko elkarlanean arituko dira, Mutrikuko eta Camarones herri argentinarreko akuikultura eskolek sinatu duten elkarlan hitzarmenari esker. Lankidetza horren barruan ikasle eta irakasle trukaketak egingo dituzte eta lehen fasean Camaroneseko lagunak izango dira Mutrikura joango direnak. Elkarkidetza hau Argentina eta Euskal Herriak bultzatzen duten Trukaketa eta Lankidetasun Proiektuaren barne kokatzen da.
2007/03/22
Lanpetuta ibili da FEVA joan den asteburuan Buenos Airesen, argentinar hiriburuko Laurak Bat-en egoitzean egin baititu Ezohiko Biltzar Orokorra, Zuzendaritza Batzordeko bilera eta Euskal Etxeetako buruzagiak trebatzeko komunikazio tailerra. Ezohiko Biltzar Orokorrean Zuzendaritza Batzordeko zenbait kide berritzeko hauteskundeak egin eta, espero zen bezala, aurkeztutako zerrenda bakarrak egin zuen aurrera, gehiengo zabalez. Biltzarrarren ondotik, Zuzendaritza Batzorde berritua bildu zen. Bazkalostean, berriz, komunikazio gaiei buruzko bi eguneko ikastaro-tailerrari ekin zitzaion, Iñaki Aramayo kazetariaren eskutik.
2007/03/21
Datorren apirilaren 26ean 70 urte beteko dira 1937an Hitlerren hegazkinek Gernika bonbardatu zutenetik. Gertaera latz honek oihartzun handia izan zuen eta neurri batean bakearen nazioarteko ikur bihurtu zuen Gernika. 70. urteurrena dela-eta ekitaldi bereziak prestatu dituzte Euskal Herrian, eta munduko euskal etxe asko bilduko dira bakearen aldeko aldarrikapen honetara. La Plata edo Buenos Aires (Argentinan), Montevideo (Uruguain), Santiago (Txilen), Bogotá (Kolonbian) edota Mexiko (Mexikon) dira horietariko batzuk. Estatu Batuetan, San Frantziskoko Basque Cultural Centerrek ere bere ekitaldien berri eman du: apirilaren 17 eta 36 bitartean egingo dituzten mintzaldi, dokumental erakusketa eta haritz baten landaketa, besteak beste.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
