euskal diaspora eta kultura
2007/06/16
Idahoko Homedale herriak bere Euskal Etxearen egoitza inauguratuko du gaur, bi urte inguru iraun duten eraikitze lanak bukatu eta gero. Txoko Ona Basque Clubaren egoitza izango dena 700 metro karratuko etxea da eta bertan hasiak dira jada euskarako klaseak eta beste jarduerak egiten. Gaur hasiko den irekiera ofizialean 250 bazkide eta lagun bildukodira, herrikoak zein inguruetako euskal etxeetatik etorriak. Izan ere jai handia izango da AEBetako mendebaldeko euskal komunitate osoarentzat.
2007/06/16
Olga Muniain eta Lili Garro margolarien eskutik Buenos Aireseko Eusko Kultur Etxeak (Eusketxek) elkartearen bigarren arte eta margolaritza erakusketa zabaldu zuen joan den astelehenean México 1880ko bere egoitzan. Oraingoan erakusketan bildutako lanek Argentinako baserri eta landa giroa, gauchoen bizitza eta Panpako paisaiak irudikatzen dituzte, tartean euskal gaiak ere agertuz. Erakusketa datorren uztailaren 11 bitartean izango da ikusgai, astelehenetik ostiralera, Eusketxen.
2007/06/15
Egun gutxi daramatza Caracasen Rafael Kutzek, Ibarretxe lehendakariak Venezuelan Euskadiren ordezkari izendatu berri duen gizonak. Bere erronka datozen hilabeteetan, Eusko Jaurlaritzak herri karibearrean izango duen egungo lehenengo ordezkaritza sortu eta garatzea izango da. Donostiarra da Kutz eta aurreko urteotan Txileko Euskadiren Ordezkaritzan jasotako esperientzia baliagarri izango du lantegi honetarako. Joan den astelehenean euskal komunitatearen ordezkaritza batekin bildu zen Caracaseko Eguzki institutuan hartu duen behin-behineko bulegoan. Caracaseko Eusko Etxeko Zuzendaritza Batzordekoak errezibitu zituen, Pedro Arriaga lehendakaria buru.
2007/06/15
Maipú-ko Anaitasuna Euskal Etxearen sortzaileetako bat izan zen, eta bertako dantza taldeko zuzendaria; are gehiago, iraultza moduko bat bultzatu zuen 80. hamarkadan dantza talde euskal argentinarren molde eta errepertorioan. Euskal Etxeetako dantza taldeen artean aski ezaguna izan da Maria Julia Ercoreca. 1996ean Puerto Madrynera bizitzera etorri zen eta egun bertan zabala den euskal komunitatearekin dihardu lanean, euskal etxe bat sortu nahian. Datorren urrirako deitu ditu lehenengo bilkurak. Abentura honetan parte hartu nahi duen orori luzatzen dio bertaratzeko gonbitea.
2007/06/15
Munduko edozein puntako euskal genealogia maite dutenek sarean dute jada Antzina aldizkariaren 3. alea. Seihilabetekaria da Antzina, gaztelaniaz dator gehienbat --artikulu bakarra euskaraz-- eta doan jaitsi daiteke 'Antzinako' Euskal Genealogisten Elkartearen web gunetik. Azken zenbaki honek, Conchi Ainciburuk koordinatuta, itsasoa hartu du ardatz. Bertan, 'Antzinako' elkarteko arduradunek datorren urrirako iragarri dituzte euskal genealogia topaketa batzuk, Hondarribia-Irunen.
2007/06/14
Ameriketan jokatu gabe 69 urte eman eta gero euskal selekzioak Atlantikoa zeharkartuko du datorren astean, Venezuelako selekzioaren aurka aritzeko. Partida datorren asteazkenean (ekainak 20) izango da eta
San Cristobaleko Pueblo Nuevo estadioan jokatuko da. Venezuela Amerika Kopako egoitza da aurten eta euskaldunen aurka jokatuko duen partida txapelketa horren aurretik jokatuko duten azken froga izango da. Venezuelako euskal komunitatea interes handiz jarraitzen ari da euskaldunen bisitaren gaia eta Caracaseko Eusko Etxeak bertaratu ezin dutenek partida behar bezala ikusteko pantaila erraldoi bat jarriko duela iragarri du.
2007/06/14
Ekainero bezala Jose C. Paz herri argentinarreko Toki Eder Euskal Etxeak bere urtemuga ospatu du. Joan den igandean izan zen ekitaldia eta 250 lagun bertaratu ziren elkarteak antolatutako bazkarira. Urteurrena ospatzeko jaian elkarteko dantza taldea aritu zen eta alkate berria aukeratu zuten. Horacio Marotto Etxezahar Toki Ederreko egungo lehendakariak eta María Ángeles Oñederrak, aurreko lehendakaria eta egun elkarteko idazkaria denak, eskertu egin zuten euskal komunitatearen etengabeko sostengua eta lana egiteko gogoa, batez ere egoitzaren egokitze lanei segida eman behar izan dieten orduan.
2007/06/14
NABOko Biltzar Nagusiak Mary Gaztambide berrautatu zuen AEBetako euskal erakundeen federazioko lehendakari, elkarte honek joan den ostiralean Nevadako Winnemuccan eginiko saioan. Berarekin batera hautatu zituzten Pierro Etcharren, lehendakariorde, eta Grace Mainvil, diruzain. AEB osotik etorritako ordezkariek federazioan bi bazkide berri onartzea deliberatu zuten, hala nola Washington DCko Euskal Etxea eta Nevadako Paradise Valley-ko Santa Rosa delakoa. Bildutakoek NABOren lan arlo guztiei gainetiko begirada eskaini, txostenei balekoa eman eta Lau-Urteko Planaz deliberatu zuten, baita ere hilabete barru Bilbon egingo den Munduko Biltzarrera euren ordezkariek eramango dituzten proposamenez.
2007/06/13
2001eko irailaren 11an Anita Glesta artista newyorktarrak Dorre Bikien erasoa zuzenean ikusi zuen World Trade Centerren parean daukan apartamentutik. Beldurrak, Manhattanetik seme-alabekin egin behar izan zuen ihesak eta zentzugabeko biolentziaren biktima izatearen sentsazioak aurretik gertaturiko beste trajedia bat ekarri zion burura: Gernikaren bonbardaketa. Sufrimenduaren unibertsaltasuna, horixe da Glestak bihar inauguratuko duen 'Gernika/Guernica' ikusgarriarekin azaldu nahi duena. Horretarako Gernikako biktimen ahotsa eramango du Zero Gunearen inguruetara.
2007/06/13
Bidaiak eta motorrak maite ditu Mikel Etxeberria kazetari lapurtarrak eta gaur biak batzen dituen abenturari ekingo dio, munduari bira emango baitio motorrean. Luhusotik (Lapurdi) aterako da eta bidean Errusia, Mongolia, Korea, Kanada eta Estatu Batuak zeharkatuko ditu. Jules Verne idazleari omenaldia eginez, bidaia 80 egunetan betetzeko asmoa du. Kanadan geldialdi berezia egingo du, Vancouverreko Euskal Etxeko lagunei bisita egiteko.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
