euskal diaspora eta kultura
2005/03/27
2005/03/24
'Aspaldiko' izenaz hasi ziren interneten eta 'Izaronews' izatera pasatu ziren; izaronews.org hastean, eta piskanaka izaronews.com izaterako bidea egin dute. Gaztelaniaz egiten dute lan, eta internetek ezaugarri dituen konfidentzial horietako bat dira, kasu honetan gehienbat euskal politikari buruzkoa. Sarean dabiltzan pare bat urteotan irakurlego leiala lortu dute, politika mundu barneko komentario eta esanetako batzuk Izaronews-era egiten baitute beste medio handi eta tradizionalagotara iritsi aurretik. Medio klasikoetan ere, gisa honetako albistegi txikiak gero eta gehiago bilakatu dira pista-emaile eta berri-iturri. Aste honetako Argia-k elkarrizketa egin dio Izaronews-eko zuzendari Arantza Goioagari.
2005/03/10
250 bat pertsonak bi orduko ibilbidea egin dute joan den larunbatean Montrealen (Québec) bertako Euskal Preso Politikoen Sostengu Taldea duela bi hilabetedanik egiten ari den kanpainaren barne. 1997danik Québec-en bizi diren Gorka Perea eta Eduardo Plagaro euskal herritarrek babes politikoa eskatu dute Kanadan eta Gorte Gorenaren aitzineko helegitean ezarri dituzte azken esperantzak. Manifestariek torturaren kontrako eta askatasunaren aldeko oihuak jaurti zituzten.
2005/02/28
Euskal Herriko Hizkuntza Adierazleen Sistema izena du webgune berriak eta Euskal Herri osoko datuak bilduko ditu, oraingoz EAEkoak soilik badaude ere. Aurkezpenean Miren Azkarate Eusko Jaurlaritzako Kultura sailburuak, Patxi Goenaga Hizkuntz Politikarako sailburuordeak eta Miren Mateo Hizkuntz Politikaren Koordinaziorako zuzendariak webgune hau euskararen egoeraren eta bilakaeraren inguruko datuak eta azterketak biltzeko proiektuaren lehengo lehen fasea dela adierazi zuten.
2005/02/15
Soziolinguistika Klusterrak 'Soziolinguistikaz' berripaper elektronikoa sortu berri du arlo honetako jardunaldi, argitalpen, eta ekimenen inguruko informazioa jakitera emateko. Buletin elektronikoa bi hilabetero argitaratuko dute. Lehenengo alea sarean da jada. Bertan, datozen hilabeotan euskararen inguruan egingo diren jardunaldien berri emateaz gain ikerketak, tesiak, beka deialdiak eta hainbat argitalpen ere badakarzkigu.
2005/02/02
Harpidetza bateratuari esker, irakurleak sei literatura aldizkarion (Egan, Hegats, Beterriko Liburua, Idatz & Mintz, Behinola eta Maiatz) aleak etxean jaso ahal izango ditu, esan nahi baita 14 ale orotara, 50 euro ordainduta. Arduradunek ekimen honen helburua, elkarlana bultzatu eta aldizkariok ahalik eta jende gehiagorengana helaraztea dela adierazi dute.
2005/02/01
Muskizeko Ostabe euskara taldea ezaguna da burutzen dituen ekimen deigarri eta irudimentsuengatik. Oraingoan ere aktibitate berri eta erakargarri bat dakarkigu, San Valentin eguneko ohitura zaharrei ukitu posmoderno bat emanez. San Valentin gertu dagoela eta, muskiztar talde honek maitasun gutunen lehiaketa antolatzea erabaki du, baina gaztetxoentzako erakargarriago izango den formatuan: maitasunezko e-posta mezuen lehiaketa antolatu dute. Otsailaren 10a da mezuak bidaltzeko azkeneko eguna.
2005/01/27
Mireia Gabilondo jaio zenerako (Bergara, 1964) Jorge Oteizak argitaratuta zeukan 'Quousque Tandem' (1963). Berrogei urteren buruan Gabilondok heldu die obra hari eta eskultorearen gainerakoei eta sortu du 'Otehitzari biraka' ikuskizuna, non artistaren poetikotasuna dantzaren bidez mamitzen den. Oteizaren Eskolako kimu berria genuke, eskultorearen bilobena zatekeen belaunaldikoen eskutik, hark aldarrikatzen zuen transmisioaren fruitu ezinbestean oteizarra.
2005/01/27
Hamasei urtez Euskaltzaindiko buru izan ondoren, Jean Haritxelhar baigorriarrak gaur esango dio agur lehendakaritzari, Andres Urrutia bilbotarrak gaur hartuko baitu haren lekua ofizialki. Bilboko egoitzan egingo duten ekitaldiak oroitzapen bat baino gehiago ekarriko dio Haritxelharri; izan ere, lorpen asko izan ditu hamasei urteotan. «Euskaltzaindia kate handi bat da eta gu, horretan zati txiki bat» aitortu dio baxenabartarrak Ainize Butron-i, Gara egunkariaren gaurko aleak biltzen duen elkarrizketan.
2004/12/20
'Euskal Herriko enbaxadoreak' eta Udalbiltza, distantziarik gabeko harremana izenpean, artikulu luzexka eman du gaur argitara Gara egunkariak Euskal Herriaren eta bere Diasporaren arteko harremanak aipagai. Hego Euskal Herrian deslegeztatua egon arren, Diasporarekiko kontaktu eta harremanak ez ditu batere eten Ezker Abertzalearen Udalbiltzak eta, are gehiago, harreman horiek indartzen, eta datozen hilabete/urteotan plazaratuko dituen proiektu berriak ari da garatzen.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
