euskal diaspora eta kultura
2007/03/09
Sabino Arana Fundazioak Mezu@ buletin elektroniko berria jarri du abian, publikoaren eta fundazioaren arteko harremanak estutu asmoz. Buletinak Arteako Euskal Nazionalismoaren Artxiboko edota fundazioaren museoari buruzko nobedadeak aurkeztuko d¡tu --erakusketak, ekitaldiak...-- eta fundazioaren web orrialdean dauden baliabideen berri ere emango du. Arduradunen agiantzaren arabera buletinak fundazioaren eta erabiltzaileen arteko erlazioa dinamikoagoa egingo du, erabiltzaileek zuzenean euren e-mailean jasoko baitute fundazioaren berri. Buletina doanekoa da eta jasotzeko Sabino Arana fundazioaren webgunean behar da egin harpidetza.
2007/03/09
Gabriel Ceballos gazte mexikarra Euskal Etxeko euskara irakaslea izan da azken bi urteotan, 12 ikaslek osaturiko talde 'txiki baina egonkor' batekin. Ceballos bera, ahaleginarekin ikasi eta gozatu daitekeenaren froga bizia da: Mexikon euskara ikasi eta Euskal Herrian eginiko egonaldi bakarrean hobetu zuen. 'Mexikarrentzat euskara ikastea oso erakargarria da, Euskal Herriak eragin handia izan duelako gure historian eta gure kulturan. Nire ustez euskararen bidez Euskal Etxeak Mexiko eta Euskal Herriaren arteko zubi garrantzitsua eraiki dezake', esaten digu.
2007/03/08
FEVAk, Argentinako euskal erakundeen federazioak, bere buruzagitza taldearen zati bat berritzeko hauteskundeak deitu zituen, datorren asteko larunbatean, martxoaren 17an, gauza daitezen. Berritzea tokatzen den karguak bi lehendakariordetza, lau zuzendaritza batzordekide --eta kideorde-- postu, kontu ikuskariak eta hiru ohorezko epaimahaikide eta kideorde dira. Guzti horietarako zerrenda bakarra aurkeztu eta ofizialdu da, Jose Orbaiceta laplatarra eta Mariano Ayesa mardelplatatarra lehendakariorde lehena eta bigarrena postuetarako hautagaiburu dauzkana hain zuzen.
2007/03/08
Diasporako euskaldunek irakurketa entretenigarria topa dezakete abian ipini berri den 'Euskarazoak' blogean. Euskara ikasle batek ikasketa prozesuan bizi dituen arazoak eta eguneroko arrakasta txikiak kontatzen ditu bertan. Boga sistema erabiltzen du, eta bere egunkari birtualeko mezuetan hizkuntzaren inguruan sortzen zaizkion zalantzak edota gramatikako edo esaldien egiturei buruzko gaiak jorratzen ditu. Diasporako euskara ikasle askorentzat ezagunak izango diren gai, zalantza eta esperientziak.
2007/03/07
EuskalKultura.com eta BasqueHeritage.com kolaboratzaile finko baten beharrean daude Argentinan, orain arte bestela eramaten diren zenbait gairen ardura hartu eta euskal Diaspora eta kultura ukitzen dituen ekimen hau aurrera daraman taldean integra dadin. Ez da sobera gauza eskatzen baina bai taxuz lan egitea, Argentinako euskal mundua ezagutzea, modu egokian idaztea gaztelaniaz eta ahal eta egokien euskaraz, kazetari sen pixkat izatea eta lan egiteko gogoa eta ilusioa. Interesatuak, artikulu honetan apur bat aurrerago ematen den e-mail helbidera idatz dezakete.
2007/03/07
1877an sortua, zabalik segitzen duen munduko euskal etxerik zaharrena da Buenos Aires-ko Laurak Bat eta datorren asteartean ospatuko dute bertako bazkide eta lagunek urtebetetze biribil hori, esker-emate meza batekin, ikasgela berrien inauguratzearekin eta lagunarteko afari batekin hain zuzen. Horrekin batera, datorren astean bertan hasiko diren euskara eskolak ere urtebetetzeari edukia emateko beste modu bat izango dira. Ostegunak 15 ekingo zaio 'Sarrera Euskara eta Euskal Kulturaren Ikasketei' izeneko bost asteko ikastaroari, eta pixkanaka oinarrizko euskarakoari, hirugarren eta bostgarren urratsei, Boga-koei eta 'Euskal Kultura eta Identitatea' izeneko tailerrari.
2007/03/07
Zergatiak ez dira oraindik eman aditzera, eta informazio hau idazteko tenorean --goizaldeko bostak, Euskal Herriko ordua-- ez dago Eusko Jaurlaritzan iturririk egoeraren xehetasunak baieztatzeko, baina Mexikoko Euskal Etxeak premiazko ohar batean kaleratu duenez, Juan Jose Ibarretxe lehendakariak Mexikora, Mexiko hiriburuko Euskal Etxearen Mendeurreta zela-eta, egin behar zuen bidaia bertan behera gelditu da. Horrekin batera, baita ere larunbat honetako plaka 'desestaltze' ekitaldia. Ez, ordea, Mendeurrenaren gainerako hitzorduak.
2007/03/07
Eusko Jaurlaritzak Aitor Sotes, orain arte SPRIko Estatu Batuetako zuzendari izan dena, AEBetako Euskadiko Ordezkari izendatu zuen atzoko Gobernu Kontseiluan. Arlo ekonomikoko lizentziaduna Euskal Herriko Unibertsitatean, Sotes-ek (Donostia, 1973) eskarmentua dauka Ipar Ameriketako industria eta ekonomia munduan eta zenbait urtez bizi izan da Chicagon. Orain Illinois estatua utzi eta New Yorkera aldatu beharko du, Etxeorratzen Hiria izango baita Eusko Jaurlaritzak bere Ordezkaritza estatubatuarra zabaltzeko hautatu zuen hiria, bulego zabaltze lan hori Sotesen lehentasun bilakatuko delarik datozen hilabeteotan.
2007/03/06
Guztia prest da Mexiko DFko Euskal Etxean martxoaren 10etik 18ra garatuko den Euskal Etxearen Mendeurren ospakizun programaren hasierarako. Aurretik iragarritako bilera, plaka desestaltze eta Kontzertuari, martxoaren 16an Donostiako Txistulari bandarekin antolatutako elkarretaratzea eta igandean egingo den kalejira gehituko zaizkio. Bisita ofizialak, kontaktuak eta industria alorreko egitaraua ere izango ditu Ibarretxek. Ordezkaritza artistikoari buruz, 'Euskal Herri osoko piezak joko ditugu, txistuarekin zenbat gauza egin daitezkeen erakusteko', adierazi dio EuskalKultura.com-i Jose Ignazio Ansorena txistulari banda donostiarraren zuzendariak.
2007/03/06
Hego Hemisferioko opor edo bakantza egunak bukatuta, Argentinako 'Euskaltzaleak' --euskara irakasten erakunde eskarmentuduna, 1944an helburu jakin horrekin sortu baitzen Buenos Airesen-- prest dago dagoeneko beste urte batez euskal hizkuntza eta kultura zabaltzen hasteko, edo segitzeko. Datorren astelehenean abiatuko dituzte aurtengo euskara klaseak, lau mail desberdinetan, eta Euskara eta Euskal Kultura Lantegi bati ere ekingo diote. Klaseekin batera, 'giro gazte eta euskaltzalea' eskaintzen duen elkarte honek toki berria moldatu du interneten eta, oraindik aurkeztu ez badu ere, abian jarria du sarean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
