Liburu aurkezpena azaroaren 20an, osteguna, Bergarako Olaso Dorrean. Aurkezgai, 'We are plenty in here–Euzkadin eginak' eta 'Viaje a Idaho 1938'. Lehenengoan, Joseba Sarrionandiak Simón “Sam” Gandarias bertsolari eta emigrantearen bizitza berreraikitzen du, XX. mendearen hasieran Estatu Batuetara emigratu zuen ibarrangeluarra. Bigarren liburua Manu de la Sotaren eskuizkribu argitaragabea da, 1938ko abenduan New Yorkeko Erbesteko Euzko Jaurlaritzaren ordezkari gisa egindako bidaiaren egunerokoa. Antonio de Iralak lagunduta, Utah, Nevada, Idaho eta Oregon estatuetara bidaiatu zuen mendebaldeko estatu horietako euskal komunitateen babesa lortzearren, Maitena Iragorrik eginiko edizioan.
«We are plenty in here…» hasten da abesti bat, ingelesa eta euskara konbinatuz, kaleko prostituzio harreman batzuk kontatzen dituena. Herri-abesti moduan zabaldu dena, baina norbaitek sortu zuena nonbait, eta noizbait. Autore ahaztua Simon Gandarias ibarrangelutar-elantxobetarra. Duela ehun urte, zer-eta bertsoak egiten zituen Sam Gandariasek Utah, Nevada, Kalifornia, Idaho, Oregon aldean. Zergatik alde egin behar izan zuen Euskal Herritik? Zertarako idazten zituen euskarazko bertsoak Ameriketako Far Westean? Halako galderen bidetik, testuak arakatu eta indusketa moduko gogoetak eginez aurkezten digu Joseba Sarrionandiak emigrante, artzain eta ostalari umil hori («ez zen Jaungoikoaren oiloa lako txintxoa izango») eta haren eskukada bat bertso («ez dira arte-obra handiak beharbada »). Testu arkeologia eta memoria historiko ariketa da liburu hau, dena hain laster ahazten dugun sasoi honetan. (Liburuaren kontrazaletik)
Lagun bati bidali
Komentarioa gehitu
