euskal diaspora eta kultura
2014/04/30
Joan den asteburuan Santa Feko Rosarion, bertako Zazpirak Bat euskal etxearen eskutik, hasi zuen Joseba Gotzon kantariak Argentinara egiten ari den bira berria, oraingoan Xoán Curiel kantari galegoa lagun. Gaur asteazkena berriz ere Rosarion, baina Centro Galegoan arituko da, eta astean zehar Santa Fen, San Nicolas de los Arroyosen eta Paranan.
2014/04/30
Segitzen dute euskal etxeek munduan zehar eginiko Aberri Egun ospakizunen oihartzunek eta ekitaldiak hainbeste direnez --oraindik ere ari dira gertatzen-- pixkanaka ari gara ematen. Venezuela izango da seguruenik Diaspora osoan solemnitate handiagoz ospatzen den herrialdea. Tradizio da bertako hiru euskal etxeetan, Caracas, Valencia eta Puerto La Cruzen, eguna euskarazko meza batekin hastea eta euskal eta venezuelar banderak mastan igotzea ereserkien doinupean, lore-eskaintzak eginez, ondoren pilota partidak ikusi eta senidetasun bazkariarekin bukatzeko. Honela egin zen bi lehenengoetan, Puerto La Cruz-eko EEan aurtengo ospakizunak etxe partikularretan bilduta egin baitira.
2014/04/29
Chema Salcedo kazetari peruarra oso maitea duen proiektua ari da burutzen: 1936ko gerlan gudari izan zen bere aitari buruzko dokumentala. MAI Irrintzi batailoikoa izana eta gerraostean espetxetik pasatua, bere aita familia osoarekin Perura aldatu zen 1951ean, egun kazetari den Chemak bost urte zeuzkala. Jose Salcedo Molinuevo 2012an hil zen eta azkeneko hilabeteotan semea Euskal Herrian errodatzen ibili da eta orain Liman amaitzen ari da dokumentala, aste gutxi barru, ekainean dirudienez, estreinatzeko.
2014/04/29
Munduko hainbat euskal etxetatik 2014ko Aberri Eguneko argazki andana ari zaigu heltzen, EuskalKultura.com-eko irakurleekin partekatzeko. Atal berri honetara ekarri ditugu Txileko Santiago hirian Gure Etorkia elkarteak eta Hilario Olazaran txistu eta dantza taldeak antolatu zuten festa, aurten ere San Cristobal muinoa euskal giroarekin alaitu zutelarik. New Yorken ere giroa bikaina izan zen euskal etxeak egin zuen afarian, eta Miamin bertako euskal elkarteak Joseba Andoni mutikoaren aldeko kanpainarekin jarraituz, bazkide eta lagunak piknik batean bildu zituen.
2014/04/29
‘Buenos Aires celebra’ izenarekin ezaguna den ekitaldia, Buenos Aires Hiriak bertan bizikide bizi diren kolektibitateen omenez antolatzen duen festa da. Hiriko leku esanguratsuenetako batean gauzatzen da, Mayo Plazaren inguruan hain. Euskal kolektibitateari dagokionez, bitan egokitu zaio jaialdi erraldoi honetako protagonista izatea eta 2014koa hirugarrena izango du, aurrekoetan legez Laurak Bat euskal etxea antolatzaile eta FEVA eta beste hainbat euskal etxe lagun. ‘Buenos Airesek Euskal Herria ospagai’ datorren maiatzaren 11an ospatuko da, eta euskal erakundeen partaidetza handiagoarekin batera, proposamen berriak ere eskainiko ditu hiriburuaren bihotzean.
2014/04/28
Ezusterik gabe, joan den larunbatean egindako hauteskundeen ondorioz, orain arte FEVAko diruzain eta Junin hiriko Arbola Bat Euskal Etxeko lehendakari zen Hugo Andiazabal hautatu dute Argentinako euskal etxeek FEVAko lehendakari berria. 20 aldeko eta 3 bozka txuriko emaitza berarekin, Javier Ederra idazkari eta Pedro Mauregui Larranda diruzain atera dira. Biltzarra bukatuta, Sara Pagola eta Asier Vallejorekin bildu ziren Laurak Bateko bilkurara. Euskal etxeetako kideen aurrean izan zuen agerraldian, diru laguntzei buruz, Gaztemunduz eta Memoria Historikoa berreskuratzeko programei buruz hitz egin zuen Vallejok.
2014/04/28
Berlingo Euskal Etxeak Ben Wagin artistaren arte-adierazpen batekin gogoratu zuen larunbatean Gernikako Bonbardaketa, erasoaren 77. urteurrenean. Elkarteko kideak eta lagunak alemaniar hiriko leku oso berezi batean bildu ziren: 1934 eta 1936 bitartean alemaniar aire armadako pilotoen trebakuntze gunea izan zen lekuan. Elkarteak aditzera eman duenez, bertan prestatu zituzten erasoa burutu zuten pilotoak, eta, Waginen esanetan "hau da Gernikako bonbardaketa hasi zen lekua". Artistak zuhaitz bat landatu zuen bertan bakearen alde eta indarkeriaren aurkako seinale gisa.
2014/04/25
EHAAk atzo eman zuen argitara Eusko Jaurlaritzak "atzerrian dauden euskal gizataldeetako partaideak diren eta egoera larrian eta asistentzia faltan dauden pertsonei laguntzeko" deialdia. Kanpoan den Euskal Komunitatearentzako Zuzendaritzak ezarritako lehentasunen arabera, diru kopuruak ez du jaitsirarik izango iazkoari erreparatuta eta deialdiak 202.000 euro banatuko ditu. Eskera aurkezteko epea maiatzaren 24an amaituko da.
2014/04/25
Apirilaren 9ko edizioan iragarri genuen bezala, bihar gauzatuko dira FEVAko agintari berriak aukeratzeko hauteskundeak. Berritzea partziala izango da baina kargu garrantzitsuenak hautatuko dira, tartean, lehendakari, idazkari eta diruzainarena. Hauteskundeetara zerrenda bakarra aurkeztuko da aurten ere, gaur egun Federazioko Diruzain Hugo Andiazabal buru. Biltzarra bukatu eta gero, Asier Vallejo eta Sara Pagolarekin elkartuko dira euskal etxeetako kideak eta Federazioko agintari berriak. Gogora dezagun gaur bukatuko den biraren baitan Necochea, Mar del Plata eta Chascomus hiriak bisitatu dituztela euskal ordezkariek.
2014/04/25
Oraindik garaiz zaude Euskal Kultur Erakundeak eta Azkue Fundazioak antolatu duten "Irudimena" lehiaketan parte hartzeko. Euskaldunen artean sormena sustzeko helburua du "Irudimenak", eta erronka berezia dakar: Euskal Herriko soinu-mapa egitasmotik ateratako bederatzi soinuen artean bat aukeratu eta hortik abiatu, beste zerbait, berria eta orijinala, sortzea. Animatuko al zara? Maiatzaren 16a arte duzu epea!
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
