euskal diaspora eta kultura
2007/10/05
Ska taldea bete-betean dago 'Ska-republik Tour' biran iragan den martxotik eta Latinoamerikan emango dituzten kontzertuekin agur esango diote euren ibilbideari. Bihartik aurrera eta hileko 14arte Mexiko eta Costa Rican izango dira aretoak musikaz eta giro onez betez. Mexiko DF-n hasiko dute bira, El Rayo aretoan. 5000 pertsona sartzen dira bertan eta dagoeneko ia sarrera guztiak saldu dituzte. Mexikon jarraituko dute 7an, Guadalajaran, eta 13 eta 14an San Josén arituko dira, Costa Rica. Hilaren 12rako kontzertu bat zuten hitzartuta Txilen baina bertan behera gelditu denez eta sarreren salmentan izan duten arrakasta ikusiz, baliteke 11an ere Mexikon errepikatzea, hala ere oraindik ez da ezer ziurtatu.
2007/10/05
Kabalkada joan den igandean egin zen Buenos Aires probintzia argentinarreko Arrecifes-en, hiriko kale nagusitik Mitre plazaraino. Urtero egiten den erregina eta bere printzesa laguntzaileen hautaketaz gain, edota suhiltzaile bolondresen eta auto berezien partaidetzaz gain, aurtengoan bertako Euskaldunak Denak Bat-eko txikienak nabarmendu ziren ekitaldian, publikoaren arreta erabat berenganatuz. Haurrek loreak banatu zizkieten kabalkadaren zio eta izenari ohore eginez zinez udaberrikoa zabaldu zen eguraldi ona baliatuz desfilea ikustera hurbildu ziren arrecifestar eta bisitariei.
2007/10/04
Robert Laxalt Estatu Batuetan famatu egin zuen Sweet Promised Land liburuaren argitalpenaren 50 urteak betetzen diren honetan, Renoko Unibertsitatea hainbat ekitaldi egiten ari da euskalamerikar komunitatearen erreferentzia bihurtu zen idazlearen omenez. Horien artean Unibertsitateak David Rio EHUko literatura irakaslearen 'Robert Laxalt, la voz de los vascos en la literatura americana' liburuaren ingelesezko bertsioa argitaratu du. Rio, Renon da egunotan eta datorren asteartean Laxaltek amerikar literaturan utzitako arrastoari buruz mintzatuko da Unibertsitatean.
2007/10/04
Udabiltza ofizialeko eta Udalbideko --haren 'euskal lurraldearteko elkartasun fondoa'-- ordezkaritza bat Argentinan da eta gaur bertan ekingo dio Buenos Airesen datorren asteko iganderaino Argentinan eta Uruguain barrena gauzatuko duen bisitaldiari. Hamaika egunotan, udal ordezkariok FEVA eta FIVUko buruzagiekin bilduko dira Buenos Aires-Rosario eta Montevideon eta kontaktuak garatuko dituzte bi herrialdeotako diasporarekin 'elkar hobeto ezagutu eta plangintza amankomunak garatzeko aukerak aztertzeko'. Ordezkaritzako buru, Julian Eizmendi Udalbiltza-Udalbideko presidentea doa, eta berarekin batera Mª Eugenia Arrizabalaga, Vale Tena eta Bixente Arozena, hirurak Udalbideko Diaspora Batzordekoak.
2007/10/04
Iaz Cordobako Euskal Astean lortu zuen arrakasta ikusirik, FEVAk eta Buenos Aireseko Euskaltzaleak elkarteak, euskararen stand-a datozen hiru egunetan Rosarion gailurra hartuko duen Euskal Astean berriro ipintzea erabaki dute. Bihartik hasita eta iganderaino egongo da zabalik, euskarari buruz edota euskaraz argibideak emanez, publiko euskaradun zein euskaragabeari jolasak proposatuz hizkuntzara hurbil daitezen, Euskaltzaleak-eko, Rosarioko Euskal Etxeko eta Argentinan Euskaraz programako ikasle eta irakasleen eskutik.
2007/10/04
Euskal antzerkiak hitzordua du aurten ere Manizaleseko Antzerki Jaialdiarekin. XXIX. edizioa du aurten jaialdiak eta bihar ostirala hasi eta urriaren 15a bitartean iraungo du. Oraingoan euskal presentzia Euskal Plataforma Eszenikoaren eskutik helduko da. Arte eszenikoak bultzatzeko ekimen berria da hau eta Manizalesekoa izango du bere lehen irteera. Sei ikuskizun aurkeztuko dituzte: hiru antzezlan, bi dantza ikuskizun eta musika kontzertu bat.
2007/10/04
Euskal Astearen testuinguruan eta iazko arrakasta ikusirik, FEVAk, Buenos Aireseko Euskaltzaleak-en laguntzaz, euskera stand-a ipiniko du aurten ere. Ostirala 5etik hasita, larunbata 6 eta igandea 7rarte mantenduko da irekia eta bizirik dirauen Europako hizkuntza zaharrena den hau zabaldu eta informatzeaz arduratuko da.2007/10/04
Euskal Astearen testuinguruan eta iazko arrakasta ikusirik, FEVAk, Buenos Aireseko Euskaltzaleak-en laguntzaz, euskera stand-a ipiniko du aurten ere. Ostirala 5etik hasita, larunbata 6 eta igandea 7rarte mantenduko da irekia eta bizirik dirauen Europako hizkuntza zaharrena den hau zabaldu eta informatzeaz arduratuko da.2007/10/03
Arantxa Urretabizkaia eta Edorta Jimenez idazleak Frankfurteko Azokan izango dira aurten, Kuaderno Gorria' eta 'Kilkerren Hotsa' euren eleberrien alemanezko bertsioak aurkezteko. Lan hauekin Pahl-Rugenstein argitaletxeak euskal literaturari buruzko Zubiak bilduma jarri du abian. Frankfurteko aurkezpenez gain --datorren 10etik 14ra da azoka--, euskal idazleek irakurraldiak eskainiko dituzte Hannover-en eta baita Zurichen (Suitzan) ere.
2007/10/03
Eusko Jaurlaritzako sailburu eta bozeramalea Ipar Irlandara abiatuko da gaur goizean, gazteria eta bake gaietako bi gobernuen arteko lankidetza jorratzeko. Azkaratek
bilerak izango ditu, besteak beste, Ian Paisley ministro nagusiarekin eta Martin McGuinnes ministro nagusiordearekin. Ipar-irlandar eta euskal harremanen arlo honetan, gatazkan dauden gizarteetan mintegia egingo da urriaren 18-20an Euskal Herrian, Arantzazun, Eusko Jaurlaritzak eta Ipar Irlandako Public Achievement-ek antolatuta, Baketik erakundearekin elkarlanean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
