euskal diaspora eta kultura
2013/10/18
Ospakizuna bihar da, urriaren 19an, Argentinako Trenque Lauquen hirian. Urtero bezala, asmoa lagun arteko momentu goxoak pasatzea da, kalitate handiko janariaz eta aldi berean euskal folkloreaz disfrutatuz. Urdaiazpikoaren Jaia Trenque Lauquengo Euskal Sustraiak Euskal Etxearen ekimena da eta aurten, Jaiaren bosgarren edizioaren baitan, 'probintziaren interesekoa' izan da izendatua. Antolatzeko helburua herri mailan euskal festa handi bat finkatzea izan zen eta komunitatearen erantzunari begira, helburua ederki bete dela esan daiteke.
2013/10/17
New Yorkeko Eusko Etxearen Mendeurrenaz hasia dugun argazki-kronikarekin jarraituz, joan den astelehenean, urriaren 14an, Bosgarren Hiribidean zehar euskaldunak partaide egin zen kabalkadari buruzko bigarren partearekin gatoz. Euskal zatiko partaide izan ziren: NYeko euskal etxeko kideak, Eusko Jaurlaritza, NABOko kideak, beste zenbait lekutatik etorritako euskaldunak --hala nola Quebec, Uruguai eta Paris-- eta Euskal Herrikoak, baita dantzari, musikari eta kantariak ere, ozeanoz bi aldeetakoak. Taldea St Patrick katedral aurretik igarotakoan, Josu Iriondo apezpikua atera zitzaien errezibitzera, Timothy Dolan hiriko kardinalarekin. Horren eta guztiaren irudiak, jarraian.
2013/10/17
Caracaseko Eusko Etxeak lanean darrai, jo eta su, eta Jazoera albistari digitalaren bidez elkartean egin diren ekitaldien berri zabaldu du. Urriko ale honetan irailean zehar egin ziren ekitaldiak jaso ditu buletinak, esaterako San Antolin eguneko ospakizunak. Zineak ere tartea du oraingo honetan, Imanol Zubizarreta bazkideak Valdiaviako Zinemaldian (Txilen) eman zuen hitzaldiarekin eta Donostian saria jaso zuen "Pelo Malo" filmarekin. Horrez gain, azaroan Andoni Ortuzar EAJko EBBeko presidenteak Eusko Etxean emango duen mintzaldia ere iragarri du.
2013/10/17
Hiru Erreka Euskal Etxea eta 'Pampa Vasca' Landa Turismo elkartea antolatzaile, 400 bat lagun bildu ziren San Francisco de Bellocq herri argentinarrean 'Zelai eta itsasoaren arteko' izeneko I. Euskal Sukaldaritza Festan. Proposamenak Buenos Aires probintziako zelaietako paisaiak eta euskal kulturaren adierazpen tipikoak batzeko helburua izan du, eta hori dela eta ekintza nagusiak zaldi-ibilbideak eta Mus Txapelketa eta Tortilla Lehiaketa izan ziren. Hiru Erreka euskal etxeak esker beroak adierazi nahi dizkie partaideei, bereziki Cnel. Pringles eta La Platako euskal etxeetako ordezkariei.
2013/10/16
Lizarzaburu familiak kide asko ditu Ameriketan, gehienak Peru, Ecuador, AEB, Brasil eta Mexiko artean sakabanatuta. Halarik ere, azken urteotan teknologia berriak baliatuz elkartu egin dira eta Lizartza Klan izeneko taldea sortu dute sarean. Orain, Euskal Herriko senitartekoak ere bildu dituzte bertara eta topaketa handia ari dira prestatzen 2014rako: aurreneko aldiz, familiaren sorburu izan zen baserria bisitatuko dute elkarrekin, Gipuzkoako Lizartza herrian. Han hasi zen familiaren historia XVI. mendean; aurki, etxean bueltan izango dira munduko Lizarzaburutarrak.
2013/10/16
Mendeurreneko ospakizun ekitaldiek berez iragan igandean izan zuten gailurra, Manhattanen eginiko Galarekin eta, beraz, astelehenekoa, 'bonus' bat zen, New Yorkeko Euskal Etxearen 100 urteak, kalean eta agerian Etxeorratzen Hiriko jendearekin partekatzea, euskaldunen poza hirian tradizio handikoa den desfile honetara ekarriz, euskal musika, dantzariak, txistulariak, trikitixaren doinuak eta euskal kantua AEBetako banderaren eta ikurrinaren kolorez jantziz eta aireratuz. Joan den astearen errepasoa egin aurretik, asteleheneko kabalkadaren argazki-kronika prestatu du jarraian EuskalKultura.com-ek.
2013/10/16
Mugimendu handiko hilabetea da hau Arrecifeseko euskal etxe argentinarreko lagunentzat eta ez soilik hirian bertan egiten ari diren aktibitateengatik. Izan ere, azken aste hauetan Tandilen, Buenos Aires probintziako Salton eta Llavallolen izan ziren arrescifestarrak: Tandilen, bertako 'Gure Abestiak' abesbatzak antolatutako Topaketan emanaldi bat eskaintzeko; Salton, herriko Gizataldeen Jaian stand bat muntatzeko; eta Llavallolen, Umeen Topaketan parte hartzeko. Ekintza hauez gain, eta Euskal Astera joateko dirua biltzeko asmoz, ‘Chancho movil’ bat prestatu zuten euskal etxeko dantzariek, helduek lagundurik.
2013/10/15
John Ascuaga euskal amerikarrak eta bere familiak Sparks-eko Nugget kasinoa saldu egin dute, 58 urte luzez sendiaren zuzendaritzapean izan ostean. Epe horretan, kasinoa hiriko ekonomiaren motore bihurtu da eta eraikinaren 29 solairudun bi dorreak Sparks-eko irudi ezagunenetako bat bilakatu dira. Orain, beste zenbait kasino kudeatzen dituen enpresa baten esku geldituko da Nugget-a; sendiaren esanetan, hori baita kasinoaren etorkizuna ziurtatzeko bidea. John Ascuaga eta haren familia Sparks-eko kide oso ezagunak eta maitatuak dira, gizarte arloan oso aktiboak izan baitira. Reno Gazette Journal (RGJ) egunkariak plazaratu duen artikulutik ekarri dugu berria.
2013/10/15
Lehiaketak bi kategoria izango ditu, Argazki Zaharrak eta Berriak, eta irudiak Coronel Pringles hirian edota inguruan ateratakoak behar dute izan. Lanak bidaltzeko epea azaroaren 15ean bukatuko da eta irabazleen izenak abenduaren 3an ezagutaraziko dira, Euskararen Nazioarteko Eguneko ospakizunean. Beste alde batetik, Pringleseko euskal etxeak, irailean izandako bisitaren berri ere konpartitu nahi du. Irailaren 21ean eta lehendabiziko aldiz, FEVAko agintariak Eusko Biltzarren egoitzan elkartu ziren, Federazioaren zuzendaritza nazionalaren hileroko bilera burutzeko.
2013/10/15
Urteak antolatu gabe egon eta gero, datorren astean, urriaren 21etik 25era, gazteentzako (22) 'Basilio Balda' eta Lehenengo Kategoriako 'Vicente del Río' Xare Txapelketak burutuko dira Argentinan. Kirol ekitaldia Buenos Aireseko Laurak Bat eta Gure Echea, eta La Platako Euzko Etxea elkarteek antolatu dute eta Argentinako Pilota Federazioaren eta Pilota Federazio Metropolitarraren babesa du. Europa eta Hego Amerikako 25 klubeko ordezkari biltzeaz gain, lehiaketaren baitan Euskal Pilota hobeto ezagutzeko ekintzen programa oparo bat ere burutuko da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
