Euskal Diasporari buruzko ikastaroa eskainiko du uztailaren 5etik 9ra UEUk Biarritzen, '...ta ibili munduan! Euskal Diaspora gaur egun' izenburupean

'Geroz eta gehiago komunitate transnazionalez mintzo garen garaian, migrazioek geroz eta pisu handiagoa duten honetan, egungo euskal diasporaren nondik norakoak aztertzea' proposatu eta halaxe hartu du helburutzat UEUko Antropologia sailak uztailaren bostetik bederatzira arte Biarritzen egingo duen ikastaroak. Aitzpea Leizaolak eta Araitz Rodriguezek koordinaturik, jardunaldiok Diasporaren gaia aztertu eta Zortzigarren Probintzia deitu izan den horren eskarmentu zuzena duten hainbat irakasle eta ikerleren lekukotasuna bilduko dute.

EUSKAL KULTURA. Ikastaroak UEUko webgunean egiten duen aurkezpenean dioenez, "Txapela buruan ta ibili munduan", horra euskaldunok hitzetik hortzera darabilgun esapidea. Euskaldunak munduan barrena barreiaturik bizi gara, zenbaitzuetan aspaldidanik finkatutako komunitateak osatuz sorterritik urrun: Ameriketan, Ipar zein Hego, Australia, zein Europan barrena topa ditzakegu ibilbide luze edo laburragoko euskal etxeak. Sakabanatuago bizi direnak ere badira, bai eta etengabeko joan-etorrian direnak ere. Ibilbide desberdinak izan arren, guztiek osatzen dute euskal diaspora, egoera eta herrialde desberdinetara egokituz. Geroz eta gehiago komunitate transnazionalez mintzo garen garaian, migrazioek geroz eta pisu handiagoa duten honetan, egungo euskal diasporaren nondik norakoak aztertzea dugu helburu.

Ikastaroaren xede hurbilei dagokienez, hauek Diaspora eta migrazio fenomenoak aztertu eta euren dinamikak hobeto ulertzea dira, eta horrekin batera euskaldunon hurbileko historiari erreparatuz, euskal diasporaren egungo aldaerak aztertzea, ikerketa metodologia aldetik, ahozko historia eta bizi-istorioen garrantziaz ohartaraziz'.

Ikastaroa Biarritzen izango da, uztailaren 5etik 9ra bitartean, eta 22 ordu iraungo ditu, hogeita hamar ikasle onartuko ditu gehienez eta 120 euroko prezioa izango du. Parte hartuko duten hizlari eta irakasleen artean, Txomin Peillen, Benan Oregi, Argitxu Camus-Etchecopar, Begoña Pecharroman, Mielanjel Elustondo, Oskar Alvarez Gila, Nekane Otarbide, Imanol Galfarsoro eta Aitzpea Leizaola bera daude, besteak beste.

Esteka osagarriak

Udako Euskal Unibertsitatearen (UEU) webgunea
www.ueu.org

Ikastaroaren programa eta xehetasunak
'...ta ibili munduan! Euskal Diaspora gaur egun'

euskalkultura.eus

Noticias

Euskal Diasporari buruzko ikastaroa eskainiko du uztailaren 5etik 9ra UEUk Biarritzen, '...ta ibili munduan! Euskal Diaspora gaur egun' izenburupean

Las más leídas

Últimos comentarios