euskal diaspora eta kultura
2008/12/31
Otsailaren 9tik 21era Udako Euskal Unibertsitatea egingo da Buenos Aireseko Euskal Echea Institutuan, Diasporako kide argentinar zein inguruko herrialdeetakoei zuzenduta. Ikastaroaren helburua ikasle hauei euskal kulturan sakontzekoauekra eman eta ondoren euren euskal etxeetan eta inguruko elkarteetan ikasi dutena zabal dezatela da. Ikastaroak bi aste iraungo ditu, eta lehenengoan sarrera orokor bat egingo da, bigarren astean edukietan sakonduz. Ikastaroa doakoa da eta izena emateko epea urtarrilaren 31ean bukatuko da.
2008/12/31
Ez da tokirik munduan Olentzero joan ez denik egunotan, baldin eta aski ozen eta azkar gonbidatu badute. Gogor saiatzen da euskal ikazkina hitzordu guztietara heltzen, eta halaxe egin du baita ere Mexiko DFko Euskal Etxearen kasuan, azkeneko urteotan bere agendako ohitura saihestezina bilakatu baitzaio Mexikoko euskal haurrei bisita egitearena. Euskal Etxetik bertatik Maricarmen Arrecheak pozik dioskunez, "Olentzerok lur aztekak bisitatu ditu haurrei opariak utzi eta hastekotan den urte berriari buruz berri onak ekartzeko".
2008/12/31
Argentinako Ayacucho herriko Euskal Odola elkarteko Kultur Batzordeak urtean zehar eginiko ekimenen balioespen baikorra egin du, 2008rako ezarri zituen helburuak bete dituelakoan, 'aurreikuspenak gaindituz' gainera, EuskalKultura.com-i zuzendaritzako kide den Fermina Mariezcurrenak azaldu dionez. Jarduerak lau ekimen nagusitan banatu ziren: 'La Hora del Cuento' (Ipuinaren ordua), haurtzaindegietako haurrentzat; 'Juegos tradicionales vascos' (Euskal jolas tradizionalak), herriko udaletxeak 'gizarte eta kirol interesdun ekimen' bezala aintzat hartu zuena; "Qué sé yo de los vascos" lehiaketa (Zer dakit nik euskaldunei buruz), 5 eta 12 urte bitarteko haurrentzat; eta Bahia Blancako Nerea Grassi de Goicoecheak eman zuen hitzaldia.
2008/12/31
Estatu Batuetako NABO, eta Argentinako FEVA euskal etxeen federazioak urtarrilaren 9tik 12ra bilduko dira Buenos Aires probintziako Mar del Plata herrian, erakunde bakoitzeko lehendakaria buru izango duten bi ordezkaritza medio. NABOko lehendakari Mary Gaztambide eta FEVAko lehendakari Felipe Eiheragibel buru dituzten bi delegazioekin batera, Eusko Jaurlaritzako Josu Legarreta izango da mahaiaren hirugarren hanka edo zangoa, Eusko Jaurlaritzaren izenean bertaratuko baita, elkarrekin munduko euskal etxeen bi heren baino gehiago biltzen dituzten bi erakundeon arteko bilerara.
2008/12/31
Gorriz, berdez eta zuriz jantzi zen Arrecifeseko Lamadrid kalea joan den igandean. Han bertan, Euskaldunak Denak Bat elkartearen egoitzaren atarian, euskal etxeko kideek 2008 urteari agurra eman zioten. Herri osoak ikusi ahal izan zituen elkarteko talde desberdinek prestaturiko antzezlana, dantzak, Papá Noel eta Olentzero, eta, jakina, Euskal Herritik heldu berria den Maral taldearen kontzertua entzun.
2008/12/31
Urtean zehar bertako komunitatearen alde eta baitan egindako ekimen sortari amaiera ipintzeko, Chascomuseko 'Zingirako Euskaldunak' Euskal Etxeko 'Eusko Hazia' dantzari taldeko gaztetxoek bisita egin zioten joan den astean, Gabon gau bezperan, herriko Udal Zaharretxeari, egoiliarrek eta gonbidatuek Urte Zahar gaueko afaria ospatzen ari zirela. Euskal dantzak, batetik, eta valtsak eta bestelako dultzemeneoak, bestetik, nagusitu ziren giro alai eta animazioz beterikoan.
2008/12/31
'Gernika' aldizkaria euskal hizkuntza eta kulturari buruzko komunikabide digitala da eta aurten eman ditu lehen pausuak. Hasiera guztiak zailak dira baina 'Gernika'-k bederatzigarren alea kalean du jada, abenduari dagokiona hain zuzen ere. Urteko azken ale honetanen 'Gernika'-ko lantaldeak besteak beste Kirmen Uribe idazle ondarroarraren testu bat dakarkigu --'Sekretua'-- euskaraz eta errusieraz. Horrezaz gain Bilboko Arte Ederretako Museoari buruzko informazioa edo 'txirlak marinel erara' errezeta ere badakar. Aldizkaria sustatzen duen taldeak Gabriel Aresti, Harkaitz Cano edo Uribe bera bezalako idazleen testuen liburu bat, elebitan, Errusian argitaratzeko asmoa du datorren urterako.
2008/12/30
Euskal Diasporak opari berezi batekin bukatuko du 2008 urtea, batzuek aspalditik espero zuen berri batekin: Oroimen Historikoaren Legeak dioenari jarraiki espainiar gobernuak espainiar nazionalitatea emango die 1936 eta 1955 bitartean erbesteratu zirenen ondorengoei eta Espainian jaiotakoen seme-alabei. Atzo bertan ireki zen eskabideak aurkezteko epea eta ordu gutxitan Buenos Aireseko Espainiako kontsulatuak gestioak egiteko 10.000 txanda eman zituen. Kuba, Mexiko, Txile eta Uruguaien ere neurriak harrera oso ona izan du. Eskabideak aurkezteko epea bi urtekoa da, 2010eko abenduaren 27a arte. Ondorengo artikuluan interesatua dagoenak inprimakiak non eskatu eta kontsulatuan txanda eskatzeko zer egin behar den azaltzen dugu.
2008/12/30
Euskal Herriko Laborantza Ganbara (EHLG) Iparraldeko nekazari eta abeltzainak biltzen dituen elkartea da eta 2005 urtean laborariek beraiek sortu zuten, Paueko Ganbara ofizialak euren arazoei erantzunik ematen ez ziela-eta, euskaldunen aburuz Paueko Ganbarak nekazaritza industriala soilik sustatzen baitu, Iparralden egiten den mendi nekazaritzaren kaltetan. Azkeneko hiru urtetan modu eraginkorrean euskal laborari eta abeltzainen sostenguz lanean aritu ostean, epaiketa bati aurre egin beharko dio Laborantza Ganbarak urtarrilaren 29an Baionan: elkartea desegitea ere erabaki liteke bertan. EHLGren aldeko kanpaina --internetez ere sina daiteke-- sostengu handia ari da biltzen, Euskal Herriko zein kanpoko pentsamolde eta ideia tarte zabal bateko pertsonen artean.
2008/12/29
Txileko Santiagoko Euzko Etxea ekimenez beteriko urte bat bukatzen ari da eta euskal elkarte santiagotarraren bazkideei zuzendutako Berriketari bere barne buletin digitalaren abenduko zenbakiak 2008ko azken hilabeteotako ekitaldi nagusiak biltzen ditu atera berria duen bere zazpigarren alean. Hainbat ekimenen artean Pilota Txapelketaren arrakasta aipatzen du (aldizkariak gazte asko hasi direla pilotan euskal etxean diosku), baita dantza taldearen emanaldiak ere, Gabonetako kontzertua... eta bateko eta besteko beste zenbait saio.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
