euskal diaspora eta kultura
2008/04/24
Euskadiko Ikasleen Orkestrako kide diren 14-18 urte bitarteko gazteek 'gau gogoangarria' eskaini zuten Bruselako Saint Michel Antzokian joan den ostiralean eman zuten kontzertuan, musika, gaztetasuna, talentua, sormena, kultura eta hezkuntza bateratuz. Europar hiriburuan finkatutako euskal komunitateaz gain, Batasun Europarraren aurreko diplomatikoak eta europar herrialdeetako eta belgikar gobernuko ordezkariak izan ziren emanaldian eta Aita Donostia, Mozart, Guridi eta Ginasteraren obrak entzun ahal izan zituzten.
2008/04/23
Euskal Herriko jatetxeak aurreratuz doaz munduko jatetxeen artean. 'Restaurant' aldizkari britainiarrak landutako 'San Pellegrino' ranking atera berriak Andoni Adurizen Mugaritz, Errenterian, munduko laugarren onena izendatu du. Arzak zortzigarren agertzen du, Martin Berasategi 29. tokia mantentzen du eta zerrendan sartzen da lehen aldiz, 44. postuan, Etxebarri, Victor Arginzonizek Axpe-Atxondon duen erretegia. Baina gainera, Iñaki Aizpitartek Parisen gidatzen duen Le Chateaubriand deskubrimendu gisa agertzen da, Subijanaren Akelarre (74) eta Mexiko hiriko Biko --azken hau Bruno Oteiza eta Mikel Alonsok gobernatua-- ere biltzen dituen zerrendan.
2008/04/23
Eusko Ikaskuntzaren Asmoz Fundazioak 2008-2009rako master eta ikastaro eskaintza plazaratu du. Aurkezten dituen proposamenen artean Diasporako kideentzako bekak eta laguntzak eskaintzen dituzten batzuk daude, horien artean Euskal Ikasgaien online ikastaroa. Beste batzuk Integrazio Politikoa eta Bateratze Ekonomikoa Europar Batasunean masterra, Ingurumen Zuzenbide masterra eta Nazioarteko Merkatal Zuzenbide masterra dira.
2008/04/23
Margolan lehiaketa bat antolatu zuen iaz Uruguai mailan 'Isusa' enpresak, sortu zela 60 urte bete zirela ospatzeko eta hortik nazioan zehar ibiltari ari den erakusketa bat atera zen. Iaz hasitako erakusketa Colonia departamentuko Carmelo herrira iritsi da orain eta bertako Euskal Etxean --'Ibai Ondoko Etxea' (sic)-- inauguratu zuten joan den ostiralean, intendentea bera, bateko eta besteko indar biziak, artistak eta publiko interesatua partaide bildu zuen ekitaldi batean. Ekimena 'interesgarri departamentuarentzat' aitortu dute eta Carmeloko Kultura Etxearen sostengua jaso du. Maiatzaren bira arte zabalduko ditu ateak Carmeloko Euskal Etxean.
2008/04/23
Joan den apirilaren 8az geroztik La Platako futbolzale gazteek entrenatzeko leku berri bat dute bertako euskal etxearen eskutik: La Platako 'Athletic Club de Bilbao' Futbol Eskola. Bilbotik, talde zurigorriak 'haurren futbol eskolak Athleticen izena erabiltzea ohore bat' dela adierazi dio bertako El Día kazetari. Eskolak 6-15 urte bitarteko gaztetxoak hartzen ditu. Marcelo Zozaya euskal-argentinarra da eskolako futbol koordinatzailea.
2008/04/22
Nafarroako zenbait udaletako euskara zerbitzuek sortutako 'Duzun onena' gidaliburua ume jaioberriak dituzten familiei zuzenduta dago hauen hizkuntza garapenerako aholku batzuk emateko asmoarekin. Ideia haurrei txikitatik euskaraz irakastea denez, bi gurasoak euskaldunak direnean, euskalduna guraso bakarra denean, euskara pixka bat dakitenean edota ez dakitenentzat jarraibideak eskaintzen die eskuliburuak. Ekimenak Euskarabidea Nafarroako Euskararen Institutuaren laguntza jaso du.
2008/04/22
Kolonbiako Kultura ministroa, Paula Marcela Moreno, Euskal Herrian izan da egunotan eta Eusko Jaurlaritzarekin lankidetza akordioa sinatu du bere herriko hizkuntza indigenen garapen eta sustapena bultzatu asmoz. Kolonbian kreolera, romanesera eta hainbat etnia indigenen hizkuntzak ofizialak dira, bakoitza bere eremuan, eta bertako gobernuak Eusko Jaurlaritzak euskararekin egindako lana eredu hartu nahi du sustapen prozesu honi ekiteko.
2008/04/22
Montevideoko Sala Zitarrosa Antzokia txiki gelditu zen euskal bertsolari eta payadore latinamerikarren arteko saio bikaina ikusteko bildu zirenen guztiak hartzeko joan den martxoaren 29an. Euskaldunen aldetik Maialen Lujanbio, Xabi Paia eta Fredi Paya zeuden, Argentinatik Wilson Saliwonczyk; Brasiletik Paulo de Freitas Mendonça eta Uruguaitik Walter Apesetche eta Gabriel Luceno. Inprobisazio eskola desberdinen arteko konexioak giro ederra sortu zuen eta ekitaldiak hizkuntzak eta mugak gainditu dituen nazioarteko birari bukaera borobila eman zion.
2008/04/22
Joseba Azkarraga Eusko Jaurlaritzako Justizia, Lan eta Gizarte Segurantza sailburuak zenbait hitzaldi, mintegi eta bileratan partaide izan da edo eskaini ditu Argentina, Bolivia eta Perura burutu berria duen bost eguneko bidaia ofizialean. Hitzaldietan, 'Euskal gatazka eta Nazio Estatu harremana' (La Platan, Argentina) edo 'Autonomia: eredu juridiko politiko ekonomikoaren azterketa' (Santa Cruzen, Bolivia) izenekoak eta Cuscoko (Peru) mandatariekin edukitako bilerak nabarmendu dira hiru lurralde horietan garatu dituen jardunaldietan. Sailburua, 'Bisitari Ospetsu' izendatu zuten La Platako Unibertsitate Nazioanlean (UNLP) eta 'Ohorezko Bisitari' Cuscoko Unibertsitate Andinoan.
2008/04/22
Elkartea bera sortu zeneko urteurren berri bat ospatzeko antolatutako egitarauaren baitan, Paraná-ko Urrundik Euskal Etxeak, Entre Ríos probintzia argentinarrean, esku pilota txapelketa bat eratu du datorren astebururako, trinkete modalitatean. Txapelketara Argentinako zenbait probintzietako pilotariak bilduko dira eta ekitaldiak larunbatez zein igandez garatuko dira, apirilaren 26 eta 27an, adierazi dute Urrundik-etik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
