euskal diaspora eta kultura
2008/10/13
Iruñean jaio zen Itsaso Iribarren eta Bilbon ikasi zituen Arte Ederrak. Denborarekin 'performance'etan espezialdu eta gaur egun “13Días” antzerki taldearekin dabil Buenos Airesen, aldi berean dantza irakasle. Argentinara etorri baino lehen ezer gutxi zekien berak Diasporaz. Orain, berriz, aitortzen du “hemen jaiotako euskaldunen artean bizitzeko aukera izan dudalarik, nire sustraiak gehiago maitatzen” ikasi duela. "Hunkitu egin nau ikusteak hemengoek nola bizi duten beren euskalduntasuna eta zein garrantzitsua den eurentzat". Itsasok euskaraz eta erdaraz emango duen antzerki tailer bat hasiko du datorren astelehenean Buenos Airesen, Euskaltzaleak elkarteak antolaturik.
2008/10/10
Andres Urdaneta (1508-1568) itsasgizon ordiziarraren jaiotzaren 500. urtemuga dela eta ekitaldi ugari izan dira Mexikon, Euskal Herrian, Perun eta Filipinetan, Urdanetaren itsas ibilbideko portuen herrialdeetan. Egun hauetan Ordiziako alkate Jose Migel Santamaria Mexikon da eta herenegun, urriak 8an (Urdanetak aurkitutako 'Itzulbidea' itsas ibilbidearen 443. urtemugaren egunean), Acapulco hiriko alkatearekin batera Ordizia eta Acapulcoren senidetzea izenpetu zuten. Urriaren zazpian hasi ziren Acapulcon Urdanetaren omenezko ekitaldiak eta gaur, urriaren 10ean, bukatuko dira.
2008/10/10
Liburutegi Nazionala, Montevideon, euskal egoitza bilakatuko da datorren astearte, asteazken eta ostegunez, Euskal Immigrazio, Historia eta Kulturari eskainitako VII. Mintegia bere baitango José Pedro Varela Aretoan egingo baita. Hego Haizea Euskal Etxeak eratutako ekitaldi honek Eusko Ikaskuntza eta Liburutegi Nazionala dauzka partaide eta oro har euskaldunek eta jatorri horretako uruguaiarrek bertan egindako ekarpen eta emaitzak aztertuko ditu, zenbait aditu eta ikaslari Tarteko. Sarrera irekia eta kitorik du.
2008/10/10
Amuma Says No taldeak bere lehen CDa atera berri du, 'Frontoitik kalera' izenburupean. Aurkezpen lan honetan Boiseko taldeak euren euskal estilo pertsonala erakusten duten zortzi kantu biltzen ditu. Taldea Boiseko euskal komunitateko aurpegi ezagunek osatzen dute: Dan Ansotegui (trikitixa), Sean Aucutt (panderoa), Jill Aldape (ahotsa), Spencer Basterretchea Martin (perkusioa), Dave Manion (gitarra) eta Erik Snodgrass (baxua). "Euskal rocka eta Ameriketako rock/pop/country-a nahasten ditugu, euskal folk pittin bat gehituz gure estilo berezia lortu arte", azaldu dio Basterrecheak EuskalKultura.com-i. Taldeak hamaika kontzertu eman ditu aurtengo udaran AEBetako Oesteko euskal festetan eta bihar Texasen izango dira, San Antonio International Accordion Festival jaialdian. Hurrengo geltokia, Euskal Herria? "Aukera sortzen bada, pozik joango ginake!", dio Basterrecheak.
2008/10/09
Euskal kulturaren hainbat alderditan --historia, artea, geografia, etnografia...-- sakondu nahi dutenek aukera paregabea dute Asmoz fundazioak eskaintzen duen Euskal Ikasgaietako online ikastaroarekin. Unibertsitate aditu mailako graduondokoa da eta burutzen dutenek UPV-EHUk eta UNEDek ematen duten titulazioa jasoko dute. Asmozek kurtsoaren %100ko bekak eskaintzen ditu Diasporako kideentzat. Izena emateko epea azaroaren 7an ixten da, baina Asmozetik bekak eskuratu nahi dituztenek dokumentazioa urriaren 22a baino lehen bidali behar dutela gogora arazten dute.
2008/10/09
Aralarko San Migelen omenez egindako lehendabiziko jai hau Puerto Madryn-eko euskal komunitate antolatu berriaren lehen arrakasta izan da, baina taldekoak gauza asko egiteko gogotsu datoz. Duela urte bete taldeko aintzindarietako batekin hitzegin zuen EuskalKulturak, María Julia Ercorecarekin. Jatorriz Maipú hirikoa da Ercoreca, baina berak zioen bezala, “Puerto Madryn-era heldu naizenetik, hemen bizi den euskal komunitatea antolatzeko gogo eta kemenez gainezka nabil”. Euskal etxe bat sortzea lan gogorra dela jakin arren, María Juliak 'gustuko lanak, aldaparik ez' atsotitza lelo gisa hartu eta oztopo guztiei aurre egitea erabaki zuen. Gaur egun, urtebete pasa eta gero, euren ahaleginaren fruitua begi bistan dago: laurehun bat pertsona –-tartean Maipu eta Necocheako taldeak-- izan ziren Puerto Madryn-eko lehenengo 'Aralarko San Migel' euskal jaian.
2008/10/09
Eusko Jaurlaritzak sustatzen duen www.hiru.com etengabeko ikaskuntza atariak euskara sarean ikasteko metodo berri bat aurkeztu du. Ikasten.net du izena eta bere ezaugarri nagusiak erabat doakoa dela eta gazteleraz zein inglesez jarraitu daitekeela dira. Munduko edozein herrialdetik egin daiteke ikastaroa, nahikoa baita internetera konektatutako ordenagailu bat izatea. Ikaskuntza bide berri hau probatu nahi dutenek webgunean izena eman baino ez dute egin behar eta sistemak berak gidatuko ditu lehen ikasgaitik azkeneraino.
2008/10/08
Patagonia argentinarreko euskal etxe honetako areto nagusia bete zuen Álvaro Vázquez Sanchari abokatuari entzuteko bildutako publikoak. Hitzaldiak 'Erabaki, eraikitzeko' zeukan izenburu eta bertaratutakoek arreta handiz entzun eta galdera sorta polita egin zioten gonbidatuari. Mintzaldia bukatuta, Vázquez Sanchak Euskal Herriko historiari buruzko hiru dvd eta Bizkaiko historiari buruzko liburu bat oparitu zizkion Euskal Etxe antolatzaileari. Antonio Baztán lehendakariak opariak jaso eta '80 Años de la Asociación Euskal Echea en Comodoro Rivadavia' liburua eman zion bere aldetik legelariari.
2008/10/08
Iñaki Rodaballo, Iruñeko Café Niza tabernako sukaldaria, izan da Euskal Herriko III. Pintxo Lehiaketaren irabazlea. Gaur arratsaldean jakinarazi dituzte irabazleen izenak Hondarribiako Hotel Río Bidasoan egin diren finalen ostean. Pintxo irabazleak izen orijinala du, "Porky, Porky”; eta berarekin Rodaballok 3.000 eurotako saria eskuratu du. Kalitatea fundazioaren saria "Txipiroi eta Gernikako piparren tenpura Getariako Eusko Label tomate zopa hotza eta lima lurrinarekin” pintxoak jaso du. Iruñeko Chelsy jatetexeko Raúl Fernández eta Antonio Cristóbal dira egileak. Azkenik, txapeldunordeak Javier Iturralde eta Matías Gicoli izan dira, Baztango Baserria jatetxekoak, “Ahate Kabia” pintxoarekin.
2008/10/08
Unai Elorriaga idazle getxoztarrak era bitxian argitaratu du bere lehenengo antzezlana: Argentinan eta euskara eta gaztelerazko edizio elebidunean, bertako Letranomada argitaletxearekin. Elorriaga euskal idazle ezagunenetakoa da eta 'S.P.-rako tranbia', 'Van't Hoffen ilea' eta 'Vredaman' eleberrien egilea da, besteak beste. Lehen antzezlan honek 'Doministiku egin dute arrainek' du izena eta bertan Elorriagak gizarte kritika eta alderdi ludikoa batzen ditu, jantoki publiko batean biltzen diren hiru koittauri jarraiki.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
