euskal diaspora eta kultura
2010/04/13
1936-46ko euskal erbestea, gerla denbora, justizia eta eguneroko bizimodua aztertuko ditu datorren ostegun eta ostiralean Estatu Batuetan, Nevada-Renoko Unibertsitateko Euskal Ikasketa Zentroak (CBS) Renon egingo duen IX. Hitzaldian. Europako eta Estatu Batuetako hamabost bat aditu partaide, bi eguneko hitzordu akademiko hau CBSko aurtengo 'Douglass Distinguished Scholar' den --eta beraz aurten Renon ikerle/irakasle ari den-- Santiago de Pablo EHUko euskal historialaria eta Sandra Ott CBSko zuzendarikide eta Ipar Euskal Herriko historia garaikidean aditu dena koordinatzaile gauzatuko da. Emaitzekin liburua emango du argitara Renoko CBSek eta Estatu Batuetako bostehun bat unibertsitate eta zentro akademikotan banatuko.
2010/04/12
Buenos Aires probintzian, Olavarriako euskaldun talde batek egin berria du joan den astelehenean, apirilaren 5ean, bilera bat, bertan indar handia zeukan 'Gure Etxe Maitea' euskal etxea berrabiatu eta biziarazten. Euskal Etxeak 2002-03an hautatu zuen bere azkenenko Zuzendaritza Batzordea eta geroztik bere jarduna erabat jaitsi zen, ia erabat desagertzeraino. Izan ere Eusko Jaurlaritzak munduko euskal etxeen zerrendatik ezabatzea erabaki zuen 2008an. Bere burua berrabiatze lanetan ezarri duen talde berriak Behin-behineko Batzorde bat osatu du dagoeneko, Maria Susana Mendizabal buru, eta 90 eguneko epea ipini du Biltzar Nagusi bat deitzeko, guztia elkartea berreskuratu eta Olavarriako euskal gizatalde antolatuaren ekimena normaltzearren. Gaur bertan lan-bilera batera deitu dute, arratsaldeko zortzietan, Moreno 3078 helbidean.
2010/04/12
Maiatzaren 10ean errezibituko du La Platako Unibertsitate Nazionalak (UNLP) Juan Miguel Gutierrez euskal zinegilea. Gutierrezek bost eguneko ikastaro bat emango die ikasgune honetako zinemagintza eta ikus-entzunezko arte arloko ikasleei. 'Euskal Zinema, tradizioa eta modernitatea' izeneko ikastaroaren helburua Euskal Herriko zinemagintzaren historian murgiltzea da; astean zehar bost gai ezberdin hartuko ditu ardatz. Klaseak maiatzaren 10etik 14ra arte izango dira, arratsaldeko 4etatik 8etara. Maiatzaren 15ean, berriz, umeei zuzendutako ekintza bat burutuko du Gutierrezek La Platako Euzko Etxean. Hitzordu honetan, umeentzako film animatu bat bota eta aztertuko da euskal etxean.
2010/04/12
Oldarra korala, gizonezko euskal kantu talde biarriztarra, etorri berria da Saudi Arabiatik. Gauza da erresumaren hiriburuan Janadriyah deitu azoka egiten dutela urtero eta aurtengoan Frantziari dedikatu diote. Hori dela eta, Frantziako enbaxadak Oldarrari luzatu dio gonbita, besteak beste bertako erregearen aitzinean kantatzeko, Oldarrak ekitaldiaren estreinaldian kantatu baitu. Argazkia eta datuak Oldarrako kideek berek eman dizkiote Herria astekariari eta honek apirileko bere lehenengo zenbakiak eman ditu argitara. Hona Oldarrakoen laburpena Saudiar erresumatik itzuli eta gero.
2010/04/09
Seigarren urtez segidan, Kuban bizi den euskal komunitateak eta euskal jatorria daukaten kubatarrek Aberri Egun trinkoa bizi izan dute joan den asteburuan, azkeneko urteotan bezala Habanako Vedado auzoan dagoen Centro Vasco jatetxean. Habanako 'Asociacion de Beneficencia Vasco-Navarra' elkarte historikoa izan da antolatzaile, eta babesle Uhartean lanean ari den enpresa talde bat, batere ahaztu gabe Kubako Athletic Futbol Taldearen Peña gazte baina dinamikoak izan duen lankidetza eta eragiletza lana. Ospakizunak larunbat eta igandekoak izan ziren eta, ekitaldi herrikoi bat, II Mus Txapelketa izan zuten abiapuntu larunbatean, apirilaren 3ko arratsaldean, ondoren senidetze afari bati ekiteko. Hori eta gero, euskal eta kubatar arteko uztarketa eta giro onak ez zuen amaierarik izan asteburu osoan, EuskalKultura.com-en lekukotasunak baiezta dezakeenez.
2010/04/09
Aurrera darrai Elvira Kortajarena Euskadiren Argentina, Brasil, Paraguai eta Uruguaiko Ordezkari berria bere lan-arlo den eremuko euskal etxe guztiak bisitatzearren daraman ibilbideak. Joan den asteartean, Kortajarena Buenos Aires bereko beste hiru elkarte --Ekin argitaletxea, Euskaltzaleak eta Eusketxe-- bisitatu zituen, horietarik azken biak Eusko Jaurlaritzak Euskal Etxe gisa erregistratuta dituen erakunde. Bisita egiterakoan, elkarteetako buruzagitzak egin zioten ongietorria eta eraikinak biltzen dituen eta bertan garatzen diren ekimenak azaldu zizkioten. Ordezkaria Mar del Platara lerratuko da gaur, bertako euskal etxea bisitatu --aurtengo Argentinako Euskal Aste Nazionaleko antolatzaile da Mar del Platako Denak Bat-- eta turismo arloko aurkezpen batean parte hartzeko, Euskal Autonomi Erkidegoa Argentinako turismo profesionalei azaltzearren.
2010/04/08
Urtero bezala, Berpizkunde Igandearekin bat eginez ospatun zen joan den igandean Aberri Eguna Caracasen, El Paraisoko Txokoan, hau sortuz geroztik gertatu legez, bertako euskal komunitate osoari luzatutako deiari jarraiki. 2010eko Aberri Egun caracastarra goizeko 11etan hasi zen, tradizioak agindu bezala Meza batez, El Paraisoko Etxeko Areto Nagusian, Migel Odriozola apez josulaguna emaile. Ofizioa edertzen, Egibar ibili zen organujole, eta ahotsetan, Euskal Etxeko gizon abesbatza, tartean Carlos Otaño, Xabier Azpiritxaga, Xabier Odriozola eta Koldo Ruiz de Agirre. Hasten polita eman zion egunean zehar barreiatu zen festa egun alaiari, beti ere "aurreko belaunaldiek lur venezuelarrean erein zuten euskal hazia eta Gernikako zainetan oinarritutako euskaltasuna" ospatuz, "Euskadiren hemengo segidari ahal dugun arte eutsiz, katea oraindik ez baita eten Venezuelako euskaldunen artean", adierazi dio buletin honi bertako euskaldun batek.
2010/04/08
Roberto Arizmendi zuzendari euskalargentinarraren 'Gora Vasco! (Milonga de Temple y Carretilla)' dokumentalak zabalduko du gaur arratsaldean Buenos Airesen, hiriburu argentinarreko Santa Cruzko Etxeak hasiko duen Zine Ziklo berria. 'El Vasco de la Carretilla' ezizenez ezagunagoa zen Guillermo Larregui iruinsemearen istorioa kontatu eta Argentinan zehar oinez orga txiki bat lagun egin zituen bidaiak berregiten dituen dokumentalaren emanaldi berezi honek filmaren ekoizle izan zen Cesar 'Toti' Arizmendiren presentzia eta partaidetza bilduko du Buenos Airesera. Toti Arizmendi Santa Cruz probintziako 'Hegoalde Argentinarra' Euskal Etxeko lehendakari ere bada, zinema arloko ekile izateaz aparte. Emanaldia gaur arratsaldean izango da, lauetan, 25 de Mayo 279 helbidean.
2010/04/08
Mar del Platako Denak Bat Euskal Etxeak, 2010ko --eta beraz Argentinaren Bigarren Mendeurreneko-- Euskal Aste Nazionalaren antolatzaile legez, zabaldu berria du euskal-argentinar elkarretaratze nagusi horren iragarle eta identifikatzaile izango den logoa erabakitzeko lehiaketa, Argentinan egoitza duten 18 urtetik goragoko pertsona zein taldeei zuzendua. Aurretik argitaratugabeko lanek 9 x 6 zentimetroko neurriak izan beharko dituzte eta '2010: Semana Nacional Vasca del Bicentenario en Mar del Plata' gaztelaniazko esaldia baitaratu beharko dute. Egokiak izan beharko dute paperean inprimatzeko, baita arropetan zein edozein publizitate materialetan. Originalak entregatzeko epea Maiatzaren 15a da. Hautatzen den diseinuak 200 euroko saria jasoko du.
2010/04/07
Koldo Agarraberes eta Josu Zapata pintore iruinsemeak Mexikora helduak dira 'Jainkoak lilietatik jaiotzen dira' izeneko murala egitearren. Helburua, Mexikoko kultura hispaniar-aurrekoa eta Euskal Herriko indoeuropar-aurrekoa elkartzea. Mexiko Hiriburuko Tláhuac Arte eta Lanbideetako Fabrikaren (Faro) instalazioetan (avenida La Turba s/n, colonia Miguel Hidalgo), larunbat honetan, eguerditik aurrera erakutsiko dute euren proposamena, Mexiko Hiriburuko toki honetan egingo den lehenengo erresidentzia artistikoan. Merry MacMasters-ek idatzitako artikulua da hau, joan den asteburuan La Jornada egunkari mexikarrak argitara emana.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
