euskal diaspora eta kultura
2010/07/02
Orain arte zabaldutako datak urriaren 25etik 31era bitarteko astekoak izan badira ere, 2010eko Euskal Argentinar Aste Nazionaleko antolatzaile den Mar del Platako Denak Bat Euskal Etxeak oharra zabaldu berri du, data aldaketa bat adieraziz. Aste horretan Mar del Platan nazio mailako kirol elkarretaratze handi bat egin behar dela-eta, arrazoi ugari medio, Euskal Astea astebete atzeratze erabaki dute, data berria, beraz, azaroaren 1etik 7ra izango delarik. Bestalde, eta Euskal Asteari begira baita ere, Argentina osoko euskal dantza talde zuzendarien bilera egin zen Mar del Platan ekainaren 5 eta 6an.
2010/07/02
Argentinako euskal etxeak sortu zirenean, Euskal Herritik etorritako euskaldunek ahalegin handia egin zuten euskara ez galtzeko. Asko, euskal etxeen magalean biltzen ziren euskaraz mintzatzeko eta batek baino gehiagok ikusi zuen euskal jatorrizko jendearen artean euskara irakasteko beharra. Taldeak txikiak ziren hasieran, eta irakasleek ez zioten programa finko bati jarraitzen: zekitena irakasten zuten. Denboraren poderioz, eskaria handituz joan zen eta baita ekintzaren formalizazioaren beharra ere eta Argentinan Euskaraz proiektua jaio zen. Hogei urte joan dira geroztik eta arrakasta bistan dago: ehunka lagunek ikasi dute euskara Aregentinan HABEk eta FEVAk kudeatzen duten programa honi esker. Ehunka ikasle izan dira, eta dudarik gabe milaka pasadizo ere. Orain, idaztea gustukoa dutenentzat proposamen bat luzatzen du FEVAK. Programa honen bidez euskara ikasi dutenek euren esperientziak konta ditzakete, euskaraz edo gaztelaniaz, "Argentinan Euskarazen 20.urteurrena"ren idazlan-lehiaketan.
2010/07/02
Gaur hasiko da Heletan 'Euskal Herria Zuzenean' festibalaren hamasbosgarren edizioa. Urtero legez, musikaz gozatzeko asteburu biribil bat antolatu da asteburu osoan, gaurtik igandea bitartean eta ehundaka pertsona espero dira, bertakoak zein kanpotik etorritakoak. Orain arteko edizioetan bezala, musika estilo ugaritako talde eta jendeak bilduko dira festibalera, tartean Napoka Hiria, Berri Txarrak eta Bizardunak bezalako euskal taldeak edota Broken Social Scene, 2 Many DJ'S eta Jim Jones Revue kanpotarrak, esaterako.
2010/07/01
Bihar, uztailaren 2an, iritsiko dira Loiuko aireportura --eta ondoren Gasteizera-- munduko hainbat euskal etxetatik abiatuta 2010eko Gaztemundu programan parte hartzera etorriko diren hogeita hamar gazteak, 18 eta 30 urte bitartekoak. Euskal Herriko hamaika txoko ezagutzeko aukera izango dute eta hainbat kultur-ekintza, irteera turistiko eta ekitaldi instituzionaletan parte hartuko dute hamabost egunetan zehar. Lehenengo astean Gasteizen hartuko dute ostatu hiriburuaz eta inguruaz gozatzeko eta ondoren Bilbon egingo dute bigarren astea, bertatik Donostiara, Irunera, Donibane Lohizunera, Elantxobe, Gallartara... irteerak eginez.
2010/07/01
Bogotako Euskal Etxean pozik daude, Euskal Herritik propio bidaiatutako Kepa Pinedo musikari eta euskal instrumentu eta folklorean aditu denak Kolonbian egin dituen egunetan emandako tailer eta hitzaldiek lortutako arrakastarekin, Bogota Nazioarteko Ikuskizuna ekimenaren baitan. Musikari euskalduna Bogotako Euskal Etxeko 'Munduko Umeak' haur abesbatzarekin aritu izan da bertan. Gaur, berriz, despedida kontzertua izango dute Bogotako Euskal Etxean.
2010/07/01
Pasa den ekainaren 18an, La Platako Unibertsitate Nazionalean, omenaldia egin zitzaion Pello Mari Otaño Barriola poeta, bertsolari eta Argentinako lehen euskara irakasle legez hartua denari, berenheriotzaren mendeurrenean. Otaño Zizurkilen (Gipuzkoa) jaio zen 1857an eta Rosarion (Argentina) hil zen 1910ean. Aztarna utzi zuen Otañok bere poesia eta bere jarrera abertzale, euskaltzale eta euskaldunen eskubideen eta identitatearen segidaren aldekoarekin.
2010/07/01
Mikel Urmeneta marrazkilari eta sormen-lan zuzendariak eta Javier Agirresarobe fotografia zuzendariak Euskaldun Unibertsalaren 2009ko saria jasoko dute gaur osteguna, uztailaren 1ean, arratsaldez, Patxi Lopez lehendakariaren eta Txomin García Euskadiko Kutxaren presidentearen eskuetatik. Argazki-zuzendaria ez da sari banaketan izango, Euskaditik kanpo baitago lan kontuak direla-eta eta bere emazteak jasoko du saria bere izenean.
2010/06/30
New Yorken denetatik aurki daiteke eta urriaren 9tik aurrera bertako hotel batean bizkaitar sukaldaritza dastatzeko aukera ere izango du bisitariak. Izan ere, euskal eta bizkaitar sukaldaritza eskainiko duen Bar Basque delakoa zabalduko da Manhattanen. Pasa den asteazkenean akordioa sinatu dute Bizkaiko Foru Aldundiak eta New Yorkeko Seigarren Hiribideko 851.ean ireki berria den luxuzko Eventi Kimpton hotelak. Hitzarmen hori medio, hotelak aukeratutako bertako sukaldariak Bizkaira bidaiatuko dira eta aldi berean Bizkaiko bi sukaldari bi hilean behin New Yorken izango dira, Etxeorratzen Hirian bizkaitar eta euskal gastronomiaren astea antolatu eta hoteleko ohiko kartan bi plater txertatzeko.
2010/06/30
Xabier Iñaki de Arza Blanco musikari argentinarra familia euskaldun batean jaio zen. Gaztetan hasi zen musika ikasten Buenos Airesko Cervantes kUdal Kontserbatorioan, berehala biolontxelo-jole bihurtzeko. Musikaren beste arlo batzuetan ere murgildu zen Arza, abesbatzen zuzendaritzan esaterako. 2007an 'Asociación Cultural Denak Bat' elkartea sortu zuen Buenos Airesen eta ordutik hona musika tailerrak eta kontzertuak eskaini dizkio euskal kolektibitateari. Zuzentzen dituen abesbatzen artean, “Coral Todos los Santos” da gaur egun bere proiektu nagusia eta eurekin aurkeztuko da bihar, uztailaren 1ean, Alemaniako Hanburgo hirian, 'Hamburger Orathorienchor'ek luzatutako gonbite bati esker. Beethoven-en “Meza Do Maiorrean, op. 86” obra zuzenduko du hiriko St. Michaelis Basilikan.
2010/06/30
Boiseko 'Amuma Says No' euskal bandak gonbidapena hartu du uztailaren 14ean bere euskarazko errepertorioarekin Estatu Batuetako hiriburuan bi emanaldi egiteko, Kongresuaren Liburutegiko aretoetako batean lehena, eta Kennedy Center-en bestea. American Folklife Center-ek antolatutako emanaldiak dira, Estatu Batuetako musika aberastasuna bildu eta erakusteko helburua duten ekimenak. Eguerdiz egingo da AEBetako Kongresuko Coolidge Entzutegian izango dena, eta ordu batzuk geroago, seietatik aurrera, Kennedy Center famatukoa, biak Washington DCn.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
