euskal diaspora eta kultura
2007/03/23
Euriak Tres Arroyoseko 38. Gariaren Jai Probintzialaren lehen egunean behar baino protagonismo handiago izan zuen, baina zaparraden mehatxuak ez zuen lortu ondo pasatzeko gogoz bildutako lagunak kikiltzea. Talde askok ezin izan zuten behar den moduan emanaldirik eman, ordea, eta arduradunek jaialdia egun batez luzatzea erabaki zuten. Horrela, martxoaren 7tik 11ra izan behar zuen jaialdiak 12an, astelehenean, izan zuen bere azken eguna. Hiru Erreka Euskal Etxeko dantzariek astelehenean egin zuten azkenik euren emanaldia, eta txalo ugari jaso ere.
2007/03/22
Gaur hasiko da Korrika 15a Karrantzan eta 10 egunetan 2.279 kilometro korrituko ditu Euskal Herriko zazpi lurraldeetan barrena. Iruñean
amaituko den lasterketak euskararen aldeko kontzientzia bultzatzea du helburu eta banako zein talde ugariren babesa jaso du dagoeneko.
Diasporak ere bere ekarpena egingo dio ekimenari eta mundu osoko euskal etxeek ekintzak antolatu dituzte. Ekimenak interneten ere presentzia handia izango du Ziberkorrika eta abarrekoen bidez.
2007/03/22
Gero eta gehiago dira Boisen euskarak euskaldunen kulturan eta nortasunean duen garrantziaz jabetu eta hizkuntza ikasteari ekiten diotenak. Aspalditik ematen ziren euskara klaseak Euskal Museoan, baina 1998an guraso talde batek urrats berri bat eman eta Boiseko Ikastola sortzea erabaki zuen, euren seme-alabek haurtzaroan euskara ikas zezaten. Egun bi ekimen hauek bide sendotik jarraitzen dute, haur eta nagusiak bilduz. Estatu Batuen bihotzean euskara irakasle, Izaskun Kortazarrek bere esperientziaren berri ematen digu.
2007/03/22
Euskal Herriak eta Chubut izeneko probintzia argentinarra akuikultura arloko proiektuak garatzeko elkarlanean arituko dira, Mutrikuko eta Camarones herri argentinarreko akuikultura eskolek sinatu duten elkarlan hitzarmenari esker. Lankidetza horren barruan ikasle eta irakasle trukaketak egingo dituzte eta lehen fasean Camaroneseko lagunak izango dira Mutrikura joango direnak. Elkarkidetza hau Argentina eta Euskal Herriak bultzatzen duten Trukaketa eta Lankidetasun Proiektuaren barne kokatzen da.
2007/03/22
Lanpetuta ibili da FEVA joan den asteburuan Buenos Airesen, argentinar hiriburuko Laurak Bat-en egoitzean egin baititu Ezohiko Biltzar Orokorra, Zuzendaritza Batzordeko bilera eta Euskal Etxeetako buruzagiak trebatzeko komunikazio tailerra. Ezohiko Biltzar Orokorrean Zuzendaritza Batzordeko zenbait kide berritzeko hauteskundeak egin eta, espero zen bezala, aurkeztutako zerrenda bakarrak egin zuen aurrera, gehiengo zabalez. Biltzarrarren ondotik, Zuzendaritza Batzorde berritua bildu zen. Bazkalostean, berriz, komunikazio gaiei buruzko bi eguneko ikastaro-tailerrari ekin zitzaion, Iñaki Aramayo kazetariaren eskutik.
2007/03/21
Datorren apirilaren 26ean 70 urte beteko dira 1937an Hitlerren hegazkinek Gernika bonbardatu zutenetik. Gertaera latz honek oihartzun handia izan zuen eta neurri batean bakearen nazioarteko ikur bihurtu zuen Gernika. 70. urteurrena dela-eta ekitaldi bereziak prestatu dituzte Euskal Herrian, eta munduko euskal etxe asko bilduko dira bakearen aldeko aldarrikapen honetara. La Plata edo Buenos Aires (Argentinan), Montevideo (Uruguain), Santiago (Txilen), Bogotá (Kolonbian) edota Mexiko (Mexikon) dira horietariko batzuk. Estatu Batuetan, San Frantziskoko Basque Cultural Centerrek ere bere ekitaldien berri eman du: apirilaren 17 eta 36 bitartean egingo dituzten mintzaldi, dokumental erakusketa eta haritz baten landaketa, besteak beste.
2007/03/21
Oraindik xehetasun batzuk konfirmatzeke badaude ere, Brasilgo Euskal Etxeak Gernikako bonbardaketaren 70. urteurrenaren ekitaldiei batzeko asmoa agertu du, eta egitarau oparo eta orijinala prestatu. Euskal Etxetik datozen proposamenen artean, hauetxek: Sao Pauloko unibertsitate garrantzitsuenetan mintzaldiak, Gernikan inspiratutako grafitti bat egitea Euskal Etxeko horman, eta herri bazkaria euskal elkartean.
2007/03/21
Udalbide Elkarlan Elkarteak bere atxikimendu eta babesa eskainiko dizkio bihar Bizkaiko Karrantzan hasi eta apirilaren lehenean Iruñean amaituko den Korrikaren edizio berriari. Julian Eizmendi Azpeitiko alkate eta Udalbide eta Udalbiltza ofizialeko presidenteak eta Edurne Brouard eta Mertxe Mujika AEKko ordezkariek hala adierazi zuten atzo Azpeitiko Udaletxean eskainitako prentsaurrean. Udalbidek Korrika-15ean parte hartzeko deia luzatu die herritarrei, euskara 'guztion ondare' eta 'Europako bertako kultur ondasun' gisa aldarrikatuz, 'hiztun izan ala ez'.
2007/03/21
Martxoaren amaieran egingo da aurten Xiru festibala. Jaialdia gazte baina eskarmentuz beterik heldua da 18. ediziora. Ohi moduan elkarretaratzeak Gotaineko eragileak eta sorkuntza uztartzea du helburu eta lurra eta horren jabetzaren inguruko hausnarketa eginez ekingo dio aurtengo
egitarauari. Topagune izan nahi duen ekimenak Gipuzkoa, Paris edota Errumaniako bisitariak izango ditu. Mixel Etxekopar antolatzaileak, bestalde, bere hurrengo proiekturako, Estatu Batuetan pastoral bat egiteko, kide bila dabilela azaldu du.
2007/03/20
'Jose Antonio Agirre: Proiektu kultural bat' izeneko liburua plazaratu du Hamaika Bide elkarteak. Liburuan Jaurlaritzaren aurreneko Lehendakaria izan zenaren lan ez politikoa aztertu nahi izan dute egileek. Horretarako erbestean eta Diasporarekin harremanetan egindako hainbat lan eta ekimenen berri aztertu eta bildu dituzte dituzte argitalpen honetan. Sei egile ezberdinek hainbat alor jorratuta, Agirre lehendakariaren ikuspegi berri bat eman nahi izan dute egileek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
