euskal diaspora eta kultura
2007/04/18
Datorren uztailean 10 eta 13 urte bitarteko gaztetxoak abentura eta naturan murgildu ahal izango dira astebetez Urbasako Parke Naturalean, Udalbide Elkarlanean Elkarteak antolatu dituen Udalekuei esker. Zortzi herrialdeetako gazteek parte hartu ahal izango dute bertan, hau da, bai Euskal Herriko eta baita Diasporako gazteek ere. Eskalada, espeleologia, bizikleta eta mendi txangoak egingo dituzte, besteak beste, euskara hutsezko testuinguruan. Astebeteko kanpalekuaren prezioa 100 eurokoa da eta izena emateko epea maiatzaren 11an bukatuko da.
2007/04/17
Ekitaldi xume baina emozioz betearekin, garai desberdinetako dantzariak bildu ziren Arrecifeseko Euskal Etxean egoitzako areto nagusiaren inaugurazioaren 60 urteurrena ospatzeko. Joan den apirilaren 7an izan zen ekitaldia eta aspaldiko 'Itxarkundia' dantza taldeko kideak eta gaur egungo 'Ugarritzak'-eko dantzariak batu ziren hainbeste saio eta dantzaldi hartu zituen aretoan. Afalostean Euskal Etxeko egoitza eraiki eta euren lanarekin mantendu zuten hainbat euskal-argentinar belaunaldiengatik topa egin zuten bertan bildutakoek.
2007/04/17
Datorren apirilaren 26ean 1937ko bonbardaketa gogoratuko dute Gernikan, 70 urteurrena betetzean. Munduko herrialde desberdinetatik euskal etxe asko batuko zaizkio urteurrenari. Horietariko batzuk, Lapridako Arturo Campion Zentrua eta Villegasko Euskal Etxea bezala, hasiak dira jada ekitaldiekin eta beste batzuk, San Frantziskoko Basque Cultural Center-a kasu, gaur bertan hasiko dira. Baina gehiago dira, hala nola, Río Cuarto, La Plata, eta datozen egunotan informazioa hain segur bidaliko diguten beste hainbat. Gehienek apirilaren 26aren inguruan egingo dituzte ekitaldiak.
2007/04/16
Magdalena Mignaburu irakaslea da eta Diasporan aditua. 2005ean FEVAk botatako erronka hartu zuen bere gain: erakundearen mende erdiko historia jaso eta liburu batean biltzea. Lan horren fruitua Buenos Aireseko Liburu Azokan aurkeztuko du idazleak bihar zortzi, 24an. Egun, beste bi proiektuetan murgilduta dabil Mignaburu, hauek ere FEVAren eskutik: Argentinan euskarak zein euskal dantzek izan duten bilakaeraren historia ikertzea. Guzti hau Diaspora Vasca Argentina webgunetik egiten duen lana albora utzi gabe. 'Gure memoria gordetzea izan da nire betiko kezka', azaldu dio BasqueHeritage.com-i.
2007/04/16
Buenos Aires probintziako Maipú herrian finkatu dute datorren igandean hitzordua Argentinako Alza familiakoek. 1875 eta 1885 bitartean argentinaratu ziren Pedro, Juan Mari eta Francisco Alza Elosegui-ren ahaideak, eta apur bat geroago gauza bera egin zuten euren bost iloben ondorengoak daude bertara deituta. Alza edo Altza konexio honetako kideak Gipuzkoako Irunen daukate jatorria eta eutsi nahi diote familia harremanari. Elkarretaratzea, 'geure familiaren jatorriarekin eta geure erro euskaldunekin batzen gaituzten loturak sendotzearren' antolatu dutela aitortu diote BasqueHeritage.com-i antolatzaileek.
2007/04/16
Parana hiritik astero aireratzen den 'Presencia Vasca' irratsaioak, uhinetan egindako 17 urteak ospatu berri ditu, saioko lagun eta kolaboratzaileak bilduz bi orduko 'irrati ireki' emanaldi batekin. Saio berezia Federico Borras esatariaren hitzekin hasi zen, Mikel Ezkerro kolaboratzailea alboan zuela. Raúl Alcain, saioaren sortzailea ere bertan egon zen, 94 urte beteta baina beti bezain gogotsu, saioaren hasierako urteak gogoratuz.
2007/04/14
Amelia, Gabriel Arestiren alarguna, eta poetaren alaba Lyonen izan ziren joan den ostegunean 'Gabriel Aresti' izenarekin bataiatu duten Cervantes Institutuko liburutegiaren inaugurazio ekitaldian. Henrike Knörr euskaltzainak eta Jon Kortazar, Euskal Herriko Unibertsitateko Literatura katedradunak euskal kultura eta Arestiren lanaren inguruko mintzaldiak eman zituzten. Lyongo Cervantes Institutuak poeta bilbotarraren lanen fondo berezia sortu du eta antologia bat argitaratu, euskaraz, frantesez eta gaztelaniaz.
2007/04/13
Buenos Aireseko Nazioarteko Liburu Azokak ateak irekiko ditu astelehenean, azken 30 urteetan betetako hitzorduari helduz. Azoka maiatzaren 7ra arte luzatuko da eta aurtengo nobedadeen artean euskal kulturak izango duen tarte garrantzitsua aipatu daiteke, liburu aurkezpen, mintzaldi, liburu sinatze eta dantza eta musika ikuskizunekin. 33. edizio honetan Juan de Garay Fundazioaren parte hartzeari FEVA eta Eusko Jaurlaritzarena batuko zaizkio.
2007/04/13
Bideak agentziak --euskaldunentzako bidaietan eta Diasporako kideentzakoetan espezialdua dagoen agentzia-- uda honetarako euren sustraiak aurkitu nahi dituzten Estatu Batuetako gazte euskal amerikarrentzako bidaia programa berezia antolatu du. Bidaiak uztail eta abuztuan izango dira eta gazteek Euskal Herria ezagutu eta bisitatu ahal izango dute, euskara landu eta euskal kulturaren protagonistakide diren idazle, kirolari eta artistetako batzuekin harremandu. Egonaldiak 2, 3 edo 4 astekoak izango dira, eta prezioak luzeraren arabera aldatuko dira, 1.485 euro 15 egun edota 3.069 euro hil osoa, ostatu eta jarduera guztiak barne.
2007/04/13
Euskal Etxeko Zuzendaritza Batzordea berritu du Argentinako Patagonian, Rio Negro probintziako San Carlos de Bariloche hiriko 'Mendiko Euzko Etxea' euskal erakundeak, barne araudiak markatutakoari segituz. Ondorioz, Castor Leopoldo Garate da agintaldi berri baterako Euskal Etxeko lehendakaria, eta besteak beste berarekin batera ari dira batzordekide Hector Graña, lehendakariorde; Ana Torrontegui, idazkari; Electra Larrañaga, idazkariorde; Juan Carlos Odeon, diruzain; Maria Ines Garate, diruzainorde.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
