euskal diaspora eta kultura
2007/06/07
San Francisco hirian banatu dira Estatu Batuetako euskaldunei banatu zaizkien lehenengo hamabi EHNA agiriak, Kaliforniako hiri honetan karia hortarat zabaldu den ordezkaritzak banatu dituen lehenengo hamabiak bederen, zehatzago esateko. Zeremonia txiki batean, ikurriña baten azpian eta Christian Iribarren eta Juan San Mames-ek txistuz Eusko Gudariak jo ondoren banatu zaio lehenengo agiria Monserrat San Mames gaztetxo kaliforniarrari. Bertan egon ziren, era pertsonalean, San Franciscoko bi euskal etxe nagusietako lehendakariak eta horietako batek irakurri zuen EHNAri atxikitako naziotasun aitorpena.
2007/06/06
Nevada Renoko Unibertsitateko Euskal Liburutegia munduko euskal gaietako artxibategi garrantzitsuenetakoa da. Orain mundu osoko ikerlari eta historialariek liburutegiko artxiboak kontsultatzeko erraztasun gehiago izango dituzte, Basque Library-k sarean jarri duen webgune eraberrituari esker. Site berriak eskaintzen dituen berrikuntzen artean liburutegiko fondo desberdinetan kontsulta orokorra egiteko bilatzaile bat, euskaraz, ingelesez, gazteleraz eta frantsesez.
2007/06/06
No faltes (Etzazu hutsik egin) gomendatzen du Mexikoko Euskal Etxeak antolatu duen Mendeurren Bazkariaren afitxeak. Gomendioari kontu egin eta 300 lagun eta bazkide bilduko dira larunbat honetan Euskal Etxean elkartearen ehun urteak behar den moduan ospatzeko. Eguna oso berezia izango da, urte horietan zehar Euskal Etxeari bizia eman dioten belaunaldi desberdinen oroitzapena jaiaren parte izango baita. Giroa berotzen hasteko, Vascosmexico.com webguneak 70. hamarkadako Euskal Etxea erakusten duen bideoa sareratu du, Iñaki Azuak prestatuta.
2007/06/06
Colectividad Vasca de Concordia --hala du izena Concordiako Euskal Etxeak-- aurtengo bere lehenengo festa ospatu du Argentinako Mesopotamia izeneko erregioko izen adiskidetsuko hiri horretan. Bertako prentsak Mauro Real de Azúa, Botnia enpresa finlandiarreko Baso Garapenerako kudeatzaileak bertan izan zela azpimarratu du. Urte berezia izango da honakoa Concordiako euskaldunentzat, euskal elkartea sortu zuteneko 25. urteurrena ospatuko baitute, propio antolatzen ari diren egitarau landu batekin ospatu ere.
2007/06/05
Euskal Diasporako koru, talde edo besterik gabe kantatzea maite duten lagunek, edota Euskal Herritik kanpoko abesbatza ez-euskaldunek, parte hartu dezakete Eusko Cantat lehiaketa berrian. EuskoSarek antolatu du ekimena, Eresbil (Euskal Musika Artxiboa) eta Euskadiko Abesbatzen Elkartearen laguntzarekin. Grabaketei botoa Internetez emateko aukera egongo da eta 2.000 euro banatuko dira saritan.
2007/06/05
Eusko Argentinar Bazkun Alkartasunak (FEVA) urtarrilean jarri zuen abian bere kideentzako karneta diseinatzeko lehiaketa. Irabazlearen izena orain eman du aditzera: Horacio Marotto Etxezahar. Epaimahaiak aho batez aukeratu du Marottoren lana prozesuak izan dituen hiru ataletan. Marotto euskal argentinar komunitateko kide gogotsua da eta gaur egun Jose C. Paz-eko Toki Eder Euskal Etxeko lehendakaria. 'Agiri berriaren diseinuan agertu dudana aspaldian buruan bueltaka zebilkidan ideia izan da: Diaspora 'Zortzigarren Herrialdea' dela iruditan azaltzea', esan dio Marottok BasqueHeritage.com-i.
2007/06/05
Azkeneko urtebetean Argentinako hainbat herri eta aretotan aterpe lortu duen 'Eusko irudiak' erakusketa ibiltaria Buenos Aires probintziako Saladillo herrira iritsi da eta bertan zabaldu ditu ateak ekainaren 12ra arte, Saladilloko Euskal Etxearen eta Udaletxearen lankidetza tarteko. Inaugurazio ekitaldira, besteak beste, Jose Luis Salomon alkatea eta Silvina Bordenave Euskal Etxeko lehendakaria bildu ziren. Euskal Herria, eta partikularzki Donostia, bisitatua duen Salomon alkateak euskal paisaien edertasuna eta bertako jendeen atsegina azpimarratu zituen inauguraziora inguratu ziren bisitari eta hedabideen aurrean.
2007/06/04
Aurkeztu berria du Euskadiko Filmategiak iazko bere balantzea. Euskal Herrian eginiko filmekin eta euskaraz edo euskal gaiez eginiko filmen ondarea gordetze lanetan ahalegin berezia ipintzen duen sostengu publikoko erakunde pribatu honek 541.020 metro film errezibitu zituen 2006an, orotara ia 5 milioi metro film-eko fondo edo funtsa osatzera iritsi delarik. Diasporako izenburu gutxi batzuk ere baditu Filmategiak. Aukera hau baliatuz, erakundeak dei egiten die Diasporako euskaldunei euskal gaiez zein euskaraz edota euskaldunek eginiko filme zaharrak badituzte, etxean egindakoak barne, Filmategira zuzen daitezen, ondare hori kontserbatua izan dadin, egoera txarrean dauden filmak hobetu, kopiak egin eta gordetzeko aukera ugari baitaukate gaur egun. Hona Xabier Martin kazetariak Peio Aldazabal Filmategiko zuzendari-zaintzaleari egin elkarrizketa, iragan larunbatean Berriak argitara ekarri zuena.
2007/06/04
Montevideoko Haize Hegoa Elkarteak aurrera darrai bere inguru uruguaiarrean euskal kultura sustatu eta ezagutzera emateko ahaleginean. Datozen hilabeteotan eta urtea amaitu artean prestatu duen egutegian aipa daitezke bere Kultur Zikloaren kultur hedapen hitzaldi sorta berria, partaidetza Immigrazioaren XI Olinpiadan, San Juan gaueko ekitaldia, Eusko Indarra dantza taldearen 25. urteurreneko ekintzak..., beste hainbaten artean.
2007/06/04
Erakundearen araudiak dioenari segituz, Buenos Aires probintzia argentinarreko General Villegas herriko Euskal Etxeak bere Zuzendaritza Batzordea berritu du, datozen bi urteko agintaldia beteko duten karguak hautatuz. Euskal Etxeak berak plazaratu duen idazkian azaltzen duenez, Rodolfo Ernesto Esaín izan da hautatua 'Villegas-ko Euskaldunak'eko lehendakari, Nekane Olazar Bereau idazkari, eta Yanina Castro Montoya diruzain, beste zenbait karguren artean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
