euskal diaspora eta kultura
2007/06/11
Chivilcoyko Beti Aurrera Euskal Etxeko kideek hamaika lan eta ekimen egin dituzte azken urteotan euren elkartearen egoitza eraikitzeko. Bidea nekez eta ilusioz josia izan da eta azkenik euren ahaleginen emaitza ikusi ahal izango dute datorren 23an, Euskal Etxearen inaugurazioarekin. Elkarteko kideak eta Chivilcoyko lagun asko izango dira bertan, bertako euskal jarduera eta ekimenei babesa emango dien eraikina barrutik ezagutzeko gogo biziz. Biharamunean, Arantzazuko Ama Birjina jargiratuko dute.
2007/06/11
Gaur bukatuko da Bartzelonan Euskal Etxeak antolatzen duen Zinemaldia'07, 'Nomadak TX' dokumentalaren emanaldiarekin hain zuzen. Bartzelonaraino inguratu ezin dutenentzat, ordea, Euskal Etxeak oparia utzi du bere blogean: elkarteko euskara ikasleek egin dituzten laburmetraiak sareratu ditu. Sei bideo dira guztira, gai eta estilo desberdinekin, baina beti ere mundu osoko euskara ikasleek ederki ulertuko dituzten egoerak jorratuz.
2007/06/11
Ekitaldiak ekaineko lehenengo ostiralean hasi ziren, Nafarroari buruzko erakusketa baten zabaltzearekin Aurizko Kultura Etxean. Larunbatarekin heldu ziren ordea hitzordu nagusiak. Egunari Orreagan eginiko meza batekin ekin zitzaion, eta eguraldi txarrak egitarauko zenbait punturi dizdira kendu bazien ere, antolatzaileak gustura gelditu ziren bertaratu ziren bi mila bat jendeekin. Agintarien artean, Iñaki Zilbeti bertako alkateaz gain, Nafarroako Parlamentuko presidentea, Rafael Gurrea, eta Gobernuko bi kontseilari, Jose Andres Burguete eta Alberto Catalán. Horiekin batera, nafar etxeetako ordezkariak eta publikoa. Txupinazoa, Logroñoko Nafar Etxeko presidente Antonio Díaz de Ceriok bota zuen.
2007/06/09
San Franciscoko (Kalifornia, AEB) euskaldunek urteroko piknikaren besta eta boz giroan banatu zituzten joan den igandean bertako Basque Club-ek sortu eta aurten lehenengoz banatu diren 'Claude Berhouet Lagun Ona' Sariak. Sari-emate ekitaldia Petaluman gauzatu zen, Euskal Etxeko lehendakari Christian Iribarren eta ohorezko lehendakari Jean Gorostiague buru zirela. Omenduak, EuskalKultura.com-ek aurreratu zuenez, Alphonse Acheritogaray, Jean Belleau, Pierro Etcharren, Jean-Leon Iribarren, Jeanne Mazeris eta aita Martxel Tillous izan ziren. Igandeko hitzorduko musika-itxiera Euskal Herritik heldutako Luhartz talde durangarrak ipini zuen.
2007/06/09
Erakundearen araudiak dioenari segituz, Buenos Aires probintzia argentinarreko Junin herriko 'Arbola Bat' Euskal Etxeak bere Zuzendaritza Batzordeko kideak berritzeari ekin dio eta agintaldi berri baterako barne buruzagiak hautatu ditu. Euskal Etxeak zabaldu duen idazkian jakin arazten denez, Daniel Oscar Sarobe izango da agintaldi berrian elkarteko lehendakari, eta Hugo Andiazabal eta María Carmen Armendariz lehendakariorde lehenengo eta bigarrengo, beste zenbait karguren artean.
2007/06/08
Diáspora Vasco Argentina elkarteak eta Avellanedako Hezkuntza Teknikoko Eskolak gonbidatuta, hitzaldia eskaini du Buenos Aires ondo-ondoko hiri honetan Pedro Azcoiti diputatu nazionalak. Giza Eskubideei buruzko sarrera bat egin ostean Azcoiti Gernikan 1937ko apirilaren 26ean gertatutakoari buruz mintzatu zen, bonbardaketaren eragina aztertuz. Hitzaldi ostean ikasle eta irakasleek Euskal Herriaren egoerari buruzko eztabaida egin zuten.
2007/06/08
Maialen Errotabehere baxenabartarra (Arrosa, 1983) gaztea da, baina ez hasi berria. Zortzi urterekin hasi zen Ezpeletako Ezpela abesbatzan, eta 11 urterekin bakarlari gisa. Laukote batean ere ibili da, ahizparekin. Euskal Kultur Erakundeak (EKE) muntatu Hegalka proiektuan ere parte hartu zuen. Ekimen horrek artista gazteak lagundu nahi zituen, baita sorkuntza sustatu ere. Disko bat atera zuten eta hainbat kontzertu eman. Berriak ahots ozen eta ederreko kantari gazte honi Nora Arbelbidek eginiko elkarrizketa karrikaratu zuen atzo, Maialenek CD berria atera duela-eta.
2007/06/08
Txileko hogeita hamar nekazari gaztek Euskal Herrira etorri eta bertan trebatzeko aukera izango dute, Eusko Jaurlaritzako Nekazaritza eta Arrantza sailak eta Txileko Nekazaritza Ministeritzak sinatutako hitzarmen bati esker. Ikasketa-beka hauek 6 eta 9 hilabeteetako iraupena izango dute, ikasle bakoitzaren lan arloaren arabera. Ekimena ardi-aziendan, ardogintzan edo negutegietako landaketan aritzen diren gazteei zuzendua dago eta Euskal Herrirainoko bidaia, egonaldia eta ikastaroa bera ordaintzen ditu.
2007/06/07
Juan Bautista Istilart Euskal Herrian jaio zen 1867an eta hamar urte zituela heldu zen Argentinara senitarteko batek ekarria. Lapurdiko Makea herrian zuen jatorria Istilartek eta Argentinan bizi oparoa izan zuen, bere sormenari eta lanerako gaitasunari esker. 1989an Istilart lantegia sortu zuen Tres Arroyosen, arrakasta handiz, gaur egun ekimentsu jarraitzen baituen enpresa baita. Bera hil zela 73 urte betetzen direnean lehendabiziko lantegiaren lursaila urbanizatzeko erabakia hartu du Tres Arroyoseko udaletxeak. BasqueHeritage.com-en Argentinako makear honen bizia eta ibilbidea gogoratu nahi izan ditugu.
2007/06/07
Datorren ekainaren 27an Juan Bautista Istilarten heriotzaren 73 urteurrena beteko da baina bere oroitzapenak bizirik dirau Tres Arroyos hiri argentinarrean. Istilarten bizitzak self-made man soslaiari erantzuten dio: ezer gabe Argentinara heldu zen umeak nazioarteko arrakasta lortzen du berak sortutako lantegiarekin. Asmalaria, berritzaile, langile nekaezina eta eskuzabala, gaur egun ere pertsonaia mirestua segitzen du Tres Arroyosen.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
