euskal diaspora eta kultura
2007/07/03
Bihar amaituko da La Plata Buenos Aires probintziako hiriburuan 'Euskal Nazioa: Jatorri eta garapen historiko-politikoa. Egungo gatazka' izenburupean azkeneko lau asteotan eskaini izan den ikastaroa, La Platako Unibertsitate Nazionalean (UNLP) Cesar Arrondo irakasleak emana. Antolatzaile, La Platako Euskal Ikasle Unibertsitarien Taldea, iaz UNLP eta Euskal Herriko Unibertsitateko errektoreen artean sinatutako akordioaren berrestearekin bere jarduna sendotu zuen elkarte euskal argentinarra.
2007/07/03
Leku berria estreinatu du Utah Basque Club elkarteak egin berria duen bere urteroko piknikean, hain zuzen ere Salt Lake inguruko Sandy herrian dagoen Big Bear parkea. Ekitaldiak ia ehun lagun --haur eta nagusi-- bildu zituen. Antolatzaileak pozarren agertu ziren, aspaldian elkartean ibilitako kideak ere bertaratu eta partehartze aktibo bat izateko gogoa erakutsi zutelako. Elkarteko dantza taldeak, Utahko Triskalariak, dantza erakustaldia eskaini zuen.
2007/07/02
Ignazio Argiñarena errazkindarraren bizitza liburu batean jaso zuen iaz Alberto Irigoyen historialari uruguaiarrak eta Ttartalok argitaratu zuen El requeté que gritó ¡Gora Euskadi! izenburuarekin. Izan ere 36ko gudan erreketeekin borrokatu zen nafar honek azkar asko ikusi zuen gudak samina eta irabazleen errepresio latza baino ez zekarrela. 1949an Uruguaira alde egin zuen eta euskal komunitateko partaide izan da bertan, hil artean. Orain, Alvarez Gilak eta Irigoyenek Argiñarenak Uruguaiko Diasporan egin zituen bertsoak bildu eta liburu batera isuri dituzte.
2007/07/02
Argentina, Uruguai, Peru, Kolonbia eta AEBetako hogeita hamar gaztek hasiko dute gaur goizean Bilbon Eusko Jaurlaritzak urtero antolatzen duen Gaztemundu programako edizio berria, aurtengoan euskal etxeetako zuzendari gazteei eta barne eragileei eskainia. Arrecifeseko Euskal Etxetik etorria, Marianela Rimini Azarola da partaideetako bat. Bere euskal etxetik azpimarratu digutenez, Marianelak 'mereximendu osoz' lortutako aukera du Gaztemundukoa. 'Bizitza osoa darama gurekin, lan handia egiten du eta harro gaude oso berarekin eta bera hor gure ordezkaria izateaz'.
2007/07/02
Ikurriña eta Argentinako bandera hurrenez hurren ibili ziren Saladillo herri argentinarreko kaleetan zehar, bertako 'Itxaropen' Euskal Etxeko dantzari eta ordezkarien eskutik, Maiatzaren 25a ospatzeko bertan antolatutako parada edo kabalkadan zehar. Saladilloko elkarte, batasun eta erakundeetako ordezkariak bildu ziren batetik urteroko deialdi honetara, herritar andana batek egin zuen bezalaxe. San Martin hiribidea jendez mukurru bete zen Argentinako Independentziaren jai abertzalea ospatzeko eta Euskal Etxeak ere hala egin zuen.
2007/06/30
Etzi hasiko da Gaztemunduko 2007. edizioa. Programako partehartzaile gehienak gaur bertan helduko dira Euskal Herrira, eta azkenak bihar, Bilboko aireportura. Euskal Diasporako 30 gazte dira, Argentina, Uruguai, Peru, Kolonbia y Estatu Batuetatik etorriak, trebakuntza programa honetan parte hartzeko. Aurtengo edizioa uztailaren 2tik 8ra luzatuko da, eta gazteek euskal etxeetako jarduerak dinamizatu eta bultzatzeko trebakuntza jasoko dute.
2007/06/29
Egun batzuk besterik ez dira webgunea zabaldu duela eta aipagarria da honezkero bere disenuek lortu duten arrakasta. Ez dago begiratu besterik konturatzeko zergatik. Elastikoak, katiluak eta eranskailuak dira, euskal diseinudunak, Argentinan euskal arimaz eginak. Begibistakoa dute euskal inspirazioa, eta abilki emendatzen diote horri jatortasuna, xinpletasuna, modernotasuna eta freskotasuna. Lauburuak, ikurriñak eta euskarazko esaldiak ardatz harturik, Maria Virginia Laborde euskal-argentinarrak euskal kultura bizirik eta lanean dela nahi dio iragarri munduari. 'Begi komunikazioa kultura komunikatzeko bide bat da, dantza eta musika izan daitezkeen bezala', azaldu dio BasqueHeritage.com-i.
2007/06/29
Euskaldunek Filipinar irlen historian izan duten eragina handia da eta azken hilabeteetan harreman hori berreskuratzeko asmoz ekimen ugari jarri dira abian. Horietako bat da adibidez Euskal Herriko Unibertsitateak eta Nueva Vizcaya probintzia filipinarreko hiru unibertsitatek sinatu duten lankidetza hitzarmena. Aste honetan, aldiz, Davao hiriko egunkari batek Jose Oyanguren bergararraren historia dakar gogora. Oyangurenek 1848 egun Davao dena Nueva Vergara izenaz sortu eta Nueva Guipuzcoa izena eman zion probintziari.
2007/06/29
Chaco probintzia argentinarreko Diario Norte egunkariak artikulu batera bildu duenez, bertako María Fátima Soliz Eceiza kazetari gaztea Argentinatik Euskal Herrira bidaiatu eta Azkarateko (Nafarroa Beherea) gaztelua zaharberritzen arituko da heldu den uztailean, munduko zenbait lekutako 20 gaztek osatutako taldean, besteak beste EuskoSarek egin duen udako gazte lantegi bateko partaide. Gazte chacotarra abiatua da dagoeneko Euskal Herrira eta uztailaren 6an hasiko den ekimen honetan aritzeaz gain, Gipuzkoan kokatzen diren bere arbasoen herria eta sortetxea bisitatu nahiko lituzke. Chacoko 'Kotoiaren Lurra' Euskal Etxeko kide da Soliz Eceiza.
2007/06/28
Nevadako Elko hiriko 18 futbol jokalari gaztek Euskal Herrirako bidea hartuko dute bihar, Donosti Cup futbol txapelketa irekian parte hartzeko. Topaketa honek 256 talde eta 5.000 jokalari bilduko ditu aurten, bost kontinenteetatik etorriak. Horietako bat izango da Elko Indar. Bere entrenatzailea Ramon Zugazaga euskal amerikarra da, Gernikan jaioa. Jokalari eta entrenatzailearekin batera Elkoko euskal amerikar talde handi bat bidaiatuko da, Euskal Herrian euren familiak bisitatzeko asmoarekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
