euskal diaspora eta kultura
2007/07/30
Duela 70 urte 36ko gudako bonbardaketetatik ihesi 4.000 euskal haur heldu ziren Ingalaterrako hegoaldean dagoen Eastleigh herrira. Ezer gutxi zekarten eta herri txiki honetako bizilagunak buru belarri aritu ziren laguntzen euren egonaldia ahalik eta atseginen izan zedin. Orain, Eastleigh-ek esperientzia hura gogoraraziko du datorren urrian egingo den kultur aste batekin. Ingalaterra eta Euskal Herriko artista, musikari eta dantzariak arituko dira bertan, horien artean Kukai dantza taldea eta Tanttaka, '1937' antzezlanarekin.
2007/07/29
Buenos Aireseko Alkartasuna euskal koralak gonbidapena luzatu die kantuzale direnei --'euskaldunak, euskaldunen ondorengoak edota beste edozein nazionalitateetakoak izanik'-- abesbatza ezagutu eta, hala nahi balute, bere kordetara bil daitezen, batez ere kontralto, tenore eta baxuen kasuan. Alejandra Blech-ek zuzentzen duen Buenos Aireseko koral honek asteartero egiten ditu errepikak hiriburuko Gure Echea Euskal Etxean, bi orduz arratsaldeko zazpiak eta laurdenetatik aurrera. Xehetasun gehiago entsaioetara bilduz edota telefono bidez.
2007/07/28
Iritsi gara beste urte batez uztail hondarrera eta horrekin batera San Inazio egunera. Beste hamaikatxo herri eta hiriren artean euskal diasporako hainbat tokitan indar bereziz bizi den festa hau, Estatu Batuetako Boise Idahoko hiriburuan ospatzen da modu partikularrean. Izan ere, Boisen atzo arratsaldean eman zitzaion hasiera aurtengo edizioari, hiriaren erdigunean dagoen Basque Block delakoan. Kaleak festetarako moztuz, Grove karrika kolore estatubatuar eta euskaldunez bete zen. Gaurko eta biharko egitarauak musika emanaldiak, dantza ikuskizunak, euskal meza Saint John katedralean eta bi berbena ere biltzen ditu jende orori zabalik.
2007/07/28
Mendiguren familiak bere laugarren topaketa ospatuko 2008ko apirilaren 13an Amurrion, Araban. Bilkuraren helburua 'familia arteko harremanak estutzea eta elkar ezagutzea' izango da, antolatzaileek adierazi dutenez. Xabier eta Fernando Mendiguren dira bileraren antolatzaileak eta abizen hau dutenei bertaratzeko gonbitea egiten diete. Familiaren azken topaketa Gernikan izan zen, joan den apirilaren 22an, eta 130 lagun bildu zituen guztira.
2007/07/27
'Nire aita artzaina zen, eta mendiak ziren bere etxea'. Esaldi soil baina emozioz betearekin hasten da Sweet Promised Land elaberria, Robert Laxalt euskalamerikarrak 1957an argitaratua. Estatu Batuetako euskal Diasporaren literaturaren erreferentzia da gaurdaino lan hau eta bere orrialdeetan ameriketaratu ziren artzainen bizimodu gogorra islatzen du, baina baita amerikar Mendebaldeko naturarenganako miresmena ere. Bere argitalpenaren 50 urteak betetzen diren honetan Nevadako Unibertsitateko ikasleek omenaldi onena egingo diote elaberriari: udan zehar irakurriz eta unibertsitate bizian debuta egiteko liburuari buruzko eztabaidak eta lanak eginez ikasturte hasieran.
2007/07/27
Pertsona ezaguna da Oier Araolaza eibartarra euskal dantza munduan. Kazetaritza eta Gizarte eta Kultura Antropologia ikasketak egindakoa, Dantzing blog pertsonalarekin batera dantzan.com webguneko kudeatzailea eta azken honi lotutako posta zerrendako animatzailea ere bada. Eibarko Kezka Dantza Taldeko dantzari, Elgoibarko Haritz eta Donostiako Argia dantzari taldeetan ere ari da. Elkarrizketa Berriako Aritz Ibañezek egin eta joan den asteburuan eman zuen argitara euskal egunkariak.
2007/07/26
Manizalesko Teatro Jaialdian Euskal Herria izango da ohorezko gonbitua. Urte honetakoa XXIX. edizioa da eta askotariko kultur ekintzak antolatu dituzte urritik 5etik hil bereko 15era egingo den jaialdian. Horietako batzuk teatroarekin dute zerikusia, baina beste batzuk gehiago jotzen dute beste arte batzuetara, hala nola, arte plastikoak, musika, dantza, gastronomia edo kulturaren beste alor batzuei dagozkien arteetara. Jaialdian Euskal Herriko kulturari erreparatuko zaio eta baita munduko lurralde ezberdinen arteko kultur elkartrukeari ere.
2007/07/26
IV. Euskal Herria Mugaz Gaindi mintegian parte hartu nahi duten historialariak eta ikerlariak oraindik garaiz dabiltza, bertan aurkezteko lanak bidaltzeko epea abuztuaren 31ra arte irekita egongo delako. Mintegia urriaren 25 eta 26ean egingo da Baionan eta Uztaritzen (Lapurdi). Mintegiak hiru ardatz nagusi izango ditu: Emigrazioa eta Kultura; Emigrazioa eta Politika, eta Itzulerak. Antolakuntza batzordeko kide Claude Mehatsek BasqueHeritage.com-i adierazi dionez, hogei bat lan aukeratu dituzte dagoeneko, Euskal Herria, Argentina, Mexiko, Frantzia eta AEBtatik bidaliak. Lanak aurkeztu nahi dituztenek abuztuaren 31 dute epea.
2007/07/26
Iaz egin zuten bezala, aurten ere Bartzelonako eta Madrilgo euskal etxeek, HABEren laguntzarekin, barnetegia egin dute Arantzan. Uztailaren 14tik 22ra bitartean luzatu da barnetegia eta aurten, gainera, beste euskal etxe batzuetako ikasleei ere parte hartzeko gonbitea egin diete. Guztira 20 ikaslek hartu dute parte ekimenean: Bartzelonako bederatzik, Madrilgo beste hainbestek eta Valentziako bik. Klaseak goizez izan dira eta arratsaldez, berriz, ikasleek ekitaldi kulturalez gozatzeko aukera izan dute.
2007/07/26
Asmoz Fundazioak, Aita Barandiaran Fundazioa lankide, Euskal Etnografia ikastaro bat antolatuko du urriaren 15etik hasita. Klaseak internet bidez izango dira eta, beraz, Diasporako interesatuek edota hala nahi duen beste edozeinek izango du parte hartzeko aukera. Barandiaran Fundazioko arduradunek BasqueHeritage.com-i azaldu diotenez, ikastaro honekin etnografia bezalako gai bat gizarteratzeko bideak zabaltzea da euren asmoa.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
