euskal diaspora eta kultura
2007/08/13
Hiru urte da, 'Amaren Alabak' Zuberoako talde gazteak, «AndereGatik» ikusgarria eratu zuenetik. Urte horietan guztietan plazarik plaza ibili dira sei zuberotar gazteak, haien ahots ederren indarraz, Mauleko espartin lantegietara lan egitera jindako «enarak» gogoan izanik. Zikloa bururatzeko, diskoa atera dute, ZTK disketxearen laguntzaz. Diskoa, taldearen espirituaren miraila da, kantuen soiltasuna eskaintzen baitu soilik eta osorik, estudioko aldaketarik gabe. Eneritz Zabaletak sinatzen du Garak joan den asteburuan argitaratu artikulua.
2007/08/13
Antolatu ohi dituen kultur zabalkuntza arloko ekitaldi gisa, La Platako Euskal Etxe argentinarreko 'Matxin Burdin' Liburutegiko kide eta lagun talde batek bisita egin zion abuztuaren 3an, ostirala, La Serenísima esne lantegiak General Rodriguez herrian dauzkan instalazioei. Antolatzaileen esanetan, 'gure herrialdeko esne lantegi handienetako eta ospetsuenetakoak' diren hauek Mastellone fam,iliak kudeatzen ditu eta Buenos Aires hiriburutik 52 bat kilometro mendebaldera daude kokatuta, aipatu General Rodriguez hirian.
2007/08/11
Joan den igandean San Inazio jaia egin zuten Arrecifesen, San Jose parrokian eskaini zen meza elizkizun batekin eta Euskal Etxean egin zen bazkariarekin. Bazkalostean Ana Idigorasek, elkarteko presidenteak, hitz batzuk egin zituen Potxolo Loyola txistulariaren gomutan. Joan den maiatzean zendu zen Potxolo, euskal etxearen alde makina lan eginda, eta oroitzapen ederra utzi zuen Arrecifeseko euskaldunen artean. Bere eta euskal etxeetatik pasa diren txistularien oroimenez maiatzaren 15a Txistulari Eguna bihurtzea proposatu zuten elkartekoek.
2007/08/11
Lehenengo eskola joan den asteartean eman zuen bertako San Miguel Institutuan, Las Floreseko Euskal Etxeko lehendakari eta aldi berean institutu bereko informatika irakasle den Graciana Goicoechandiak. Hitzaldiak Euskal Herria eta euskaldunen aurkezpen orokorra egitea zeukan helburu eta Polimodaleko lehenengo mailako berrogeita hamar ikasle baino gehiago izan zituen entzule. Ekimena, Loretako Euskaldunak-eko lehendakariak joan den urtean Jaurlaritzako Gaztemundu programan parte hartzeko egindako plangintza bati dagokio, landa eremuko eskoletan euskaldunen eta euskal kulturaren ezagutza areagotzea xede.
2007/08/10
Nevadako Gardnerville herriak, bertako Mendiko Euskal Kluba antolatzaile, 'Euskal Kantari Eguna' ospatuko du bihar. NABOren babespean AEBetako euskal kantu eta bertsozaleak biltzen dituen urteroko hitzordu hau bi urtean behin egiten da Gardnervillen, herriko euskal piknikarekin batera. Euskal mezarekin hasiko da eguna, Minden-eko CVIC aretoan, bazkari herrikoia eta Kantu saioari ekiteko ondoren, eta Etchechury-tarren euskal berbena musikarekin amaitzeko bihar gauez. Guztiaren sarrera gisa, musika eta Oesteko euskal giroa gaur gauez, Gardnervilleko karrika nagusiko JT kantinan.
2007/08/10
Euskaldunak est de retour, Euskaldunak bueltan da, iragartzen du Quebeceko Euskal Etxeak. Joan den apirilean zuzendaritza batzorde berria aukeratu zuten --Jean Goyhenetche da lehendakaria-- eta orain bazkideentzako piknika antolatu dute biharko cabane á sucre batean (astigar ziropea egiten zuten aspaldiko landetxeen ondorengo jatetxea). Quebeceko euskal etxeko bazkideek lagunekin bildu eta egunpasa polita egiteko aukera izango dute, dantza, mus eta petanka txapelketa eta guzti.
2007/08/10
Aurten ere munduko euskal etxe askok eta askok ospatu zuten San Inazio Eguna, Bizkaia eta Gipuzkoako patroiaren ohoretan. Mexiko DFko Euskal Etxean, adibidez, bazkaria egin zuten, Toño Barberena soinujolearen musikarekin girotuta. Madrilen, aldiz, Euskal Etxeak San Ignacio elizan egin zen meza elizkizunean parte hartu zuen. Francisco García Ansak organua eta Hector Gardek txistua jo zuten elizkizunean.
2007/08/09
Buenos Aireseko Iparraldeko Euskal Etxeak bat egin zuen joan den larunbatean Baionako jaiekin. Urtetik urtera gero eta jende gehiago biltzen dute lapurtar hiriburuko jaiek eta, nahiz eta urrun egon, Buenos Aireseko euskaldunek ez zuten pestaz gozatzeko aukera galdu nahi izan. EEko Kultura azpibatzordeko kide Juan Carlos Ibarrolak eman zuen mintzaldiarekin hasi zen jaia eta ondoren, dantza, kanta eta giro aparta izan ziren nagusi Iparraldeko Euskal Etxearen egoitzan.
2007/08/08
Eusko Jaurlaritzak kanpoko gizatalde eta euskal etxeen eremuan pertsonak espezializatzeko beken deialdia egin du, Lehendakaritzaren idazkari nagusiaren bidez. Aukeratutako bekadunek Kanpo Harremanetarako Idazkaritzan egingo dute eta beka bakoitzarengatik jasoko duten diru kopurua 15.450 eurotakoa izango da. Eskabideak aurkezteko epea irailaren 13an itxiko da.
2007/08/08
Josu Legarreta, Euskal Gizataldeekin Harremanetarako zuzendariak, Ekin Argitaletxeak, Euskaltzaleakek eta Eusketxek 2005az geroztik duten egoitza bisitatu zuen. María Elena Etcheverry de Irujok, Eusko Kultur Etxea (Eusketxe) elkartearen presidente eta Ekin Argitaletxeko arduradunak, eta Teresa de Zavaletak, Euskaltzaleakeko presidenteak, egin zioten harrera Mexico 1880ko egoitzan. Legarretak elkartearen instalazioak ezagutu eta bertako kide eta euskara eta dantza ikasleekin afaldu zuen.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
