euskal diaspora eta kultura
2007/08/23
NABOk salgai jarri du jadanik bere egutegi ezagunaren 2008. urteko edizioa eta eskaini ere aita Martxel Tillous-i, Estatu Batuetako euskal komunitateen apez edo omonierra den kapelau ibiltariari eskaini dio; aldi berean Robert Laxalt-en Sweet Promised Land ('Dominique, artzain xiberotar bat Nevadan', euskarazko bertsioan) liburuaren 50. urteurrenari ere eskaini dio tarte berezi bat. Laxalt-en nobelak aro berri bat ireki zuen eta AEBetako euskal artzainen irudi erromantikoari bide eman zion, euskal eta amerikar heldu ziren belaunaldi berrien literatura arloko notaritza lana eginez. Egutegiaren koordinatzaileak, Renoko Mary Lou Urrutiak, gehienbat bi gai hauekin zerikusia daukaten argazkiak aukeratu ditu.
2007/08/23
Xabier de Felipe, 20 urteko biolinista bilbotar gaztea, uztailetik Schleswig-Holstein Mundu mailako Gazte Orkestran dabilena, aukeratua izan da orkestrako bibolin jotzaileen artean Peter von Wienhardt pianista hungaro-aleman handiarekin Beethovenen kuarteto bat jotzeko. Kontzertua datorren larunbatean, abuztuaren 25ean, izango da, Salzauko Jauregian, Alemaniako Iparraldean, eta Peter von Wienhardt (piano) eta Xabier de Felipez (biolin) gain, Sang Hyun Yong biola korearra eta Justin Lewis cello estatubatuarra izango dira laukoteko partaide, Beethovenen op. post. WoO 36 # 1 interpretatuko dutelarik.
2007/08/22
Egun gutxi da zabaldu dela Boisen, bertako Euskal Museo eta Kultura Etxeak antolaturik, Basque Whaling izeneko erakusketa, balearen eta euskal baleazaleen historia aurkezten duen Euskal Museoaren exhibizio berria. Urte bete bederen egongo da ikusgai Idahoko hiriburuan, eta orain arte neurri handi batean desezagutzen zuten mundu bat irekiko die bertako hainbat biztanleei: euskaldunen harreman sakona itsasoarekin, eta kasu honetan, euskaldunen ekarria balearen industriari, zeinean euskaldunak nagusi izan baitziren munduan XVII. mendean.
2007/08/22
Las Floreseko alkateak, Alberto César Gelené-k, 'Loretako Euskaldunak' Euskal Etxeko bazkide eta lagunekin ospatu zuen herri argentinar honetako euskal erakundearen 11. urtebetetzea. Ehunda berrogeita hamar bat jende bildu zituen elkarte euskal-florestarraren ospakizunak, tartean Lapridako Euskal Etxetik etorritako lagunak, Mónica Azpiazu presidentea buru, eta dantzari-taldea. Ekitaldian zehar, Las Floreseko alkateak zorionak eman zizkien Loretako Euskaldunak-eko kideei, urtean zehar egiten duten lanagatik, eta bi liburu eta Hiriaren 150. urteurreneko domina eta banderatxoa eman zien.
2007/08/21
Nazio txikien gaia hausnargai hartuko dute datorren asteburuan Quebec-en, Miren Azkarate Eusko Jaurlaritzako Kultura sailburua Euskal Herriko ordezkari. Euskal Herriaren kasua, Quebec, Kanada, Eskozia, Katalunia eta Belgikako nazioen ondoan aztertuko dute herri horietako zenbat ordezkari partaide. Ekitaldiak bi izango dira: lehenengoa 'Nazio txikiak munduan, nola aurkitu lekua handien artean' bataiatu dute eta bigarrena, berriz, hau ere Quebec-eko Unibertsitateko Montrealeko kanpusean, 'Nazio txikiak: abertzaletasuna, aitortza eta autonomia'.
2007/08/21
Euskaria Fundazioko hiru kidek zortzi hitzaldi eskainiko dituzte bihartik hasi eta datorren irailaren 5era arte Argentinako beste hainbeste euskal etxe eta unibertsitatetan 'Panorama general del conflicto Euskal Herria-Estados desde la construcción Nación-Estado' izenburu orokorrarekin. Hizlariak Euskariako Joseba Mikel Agirre Oar, Patxi Asparren eta Txema Landadaran dira eta hitzaldiak eskainiko dituzten herriak La Plata (UNLP), Buenos Aires (UBA, Eusketxe, Iparraldeko Euskal Etxea), Suipacha, San Nicolás, Rosario eta Paraná.
2007/08/21
Lujan-eko Basilika Argentinako elizik ospetsuena eta bisitatuena da doaike. Bere baitan, toki propioa dauka, duela zazpi urte jargiratu edo tronuratu zutenetik Arantzazuko Ama Birjinak. Orain, Arantzazuko Amaren irudia prozesioan ateratzea erabaki dute, datorren irailaren 9an, bere Kriptatik Basilikako aldare nagusira eramanez, bertan Lujan-eko Amaren ondoan Meza Santua ospatzeko. Hau dela-eta, gonbidapena luzatu zaio bereziki komunitate euskal-argentinar fededunari, ekitaldi honetan parte har dezan. Deialdia fededunen elkarretaratze batekin hasiko da, irailaren 9an 14:45etan, Basilikaren ate nagusian.
2007/08/20
Aurrera segitzen du Joseba Azkarraga Eusko Jaurlaritzako Justizia, Lan eta Gizarte Segurantza sailburua Argentina eta Uruguaira egiten ari den bisitak. Itzuliak ekarriko dituen emaitzen artean Plaza de Mayoko Amonen Elkartearekin sinaturiko akordio bat eta beste zenbait, Mendoza eta Santa Fe probintzietako erakunde desberdinekin. Santa Fen izan ere, ostegunean Gernikako Haritzaren Plaza inauguratuko du, Arrasaterekin senidetua den Sunchales herrian. Azkarraga Uruguain egon zen joan den asteazkenean eta Eusko Jaurlaritzaren eta Uruguaiko Botere Judizialaren arteko 2004ko protokoloaren 2007ko gauzapen plana izenpetu zuen.
2007/08/20
Villa Mercedes-eko Euskal Etxe argentinarrak elastiko sorta eman dio, EEaren logo eta ikurriñaren koloreekin, Cuyoko Unibertsitate Katolikoaren tokiko futbol taldeari. Ekimena Euskal Etxeak 'maila ertaineko instituzioekin daraman erlazio eta anaitasun loturak ezartzeko jokamoldearen baitan' kokatzen da, 'geure jatorriko kultura eta euskal izatea ezagutarazi eta zabaltzen joan gaitezen', azaldu dio EuskalKultura.com-i Julio Esnaola Villa Mercedeseko Euskal Etxeko lehendakariak.
2007/08/20
Concordia hiri argentinarrean, Entre Ríos probintzian, aurkeztua dute jadanik 2007ko Immigrantearen Festa Probintziala, honako edizioan irailaren 2tik 9ra bitartean egingo dena. Aurkezpen ekitaldian Gizatalde edo Kolektibitateen Erregin Probintzialaren hauteskundea ere aurkeztu zuten, parte hartuko duten hogei bat herrialdeen hautagaiak aurkeztuz, horien artean euskalduna, Gimena de Ibarra, irabazten badu erregin koroa iazkoan erregin hautatu zuten Maria Pía Mario-Irigoyenen eskutik hartuko lukeena. Euskal Etxean esperantza dute aurtengoan lekukoa euskaldunak euskaldunari pasatuko dionaz. Euskal Etxeak, bere aldetik, ohiko kultur standa eta arrakastatsu gertatzen den 'bazkari patioa' ere ipiniko ditu, euskaldunen eta Euskal Herriaren erakuslehio gisa.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
