euskal diaspora eta kultura
2008/07/28
Bizkortasuna eta indarra, horietxek dira palan jokatzeko beharrezko kualitateak IdahoStatesman egunkari estatubatuarraren esanetan. Berripaperak gertutik jarraitu ditu pilotarien ahaleginak Boisen aurtengo San Inazio Festival jaialdiaren barruan egin den Pala Txapelkan. Jaialdiak ekitaldi kultural ugari bildu ditu, dantzak, funtzio erlijiosoak, kontzertuak, bazkariak... baina zalantzarik gabe pilota partidak izan dira askorentzat deigarrienak. Gainera aurten zirkuitu itxi baten bidez Euskal Etxetik ere segitu ahal izan dira zuzenean.
2008/07/28
Museoak Ameriketako hainbat herrien independentzian berebiziko eragina izan zuen Simon Bolivarren ondarea jasotzen du eta bere familiaren jaioterria izan zen izen bereko herri bizkaitarraren historia ezagutaraztea du helburu. Mende laurden honetan erakundeak Euskal Herrian bizi den euskal-venezuelar komunitatearekin harreman estua izan du eta, elkarteko zuzendari Ana Arriagak azaltzen duenez, gero eta gehiago dira museora etortzen diren Venezuela, Kolonbia, Peru, Bolivia, Panama eta Ekuadorreko bisitariak.
2008/07/28
Argentinako La Platatik mundura, bertako Euzko Etxea-k bere ekimenen berri ematen du, paperean zein internet bidez, 'Hargatik!' aldizkarian. Elkarteko euskara taldeak egiten duen berri boletinak gainera ezaugarri bereizgarria du, zoritxarrez Argentinako toki gutxietan ikusten dena: informazioa euskaraz eta gazteleraz eman du. Azken zenbakiak iragan hilabeteetan elkarteak egindako jarduerei buruzko informazioa biltzen du, tartean San Fermin jaia eta, esaterako, Jon Baguesen mintzaldia, eta baita ere historia eta gai orokorrei buruzko artikuluak.
2008/07/28
Euskaraz kantatzen dute eta bi CD badauzkate dagoeneko. Eurena euskal emaitza da bai, baina ez ziren eurak Europako Euskal Herrian sortu eta ez dira bertan bizi. Noka dira: euren aritze esparrua gehienbat Estatu Batuak daukan Cathy Petrissans, Andrea Bidart-Oteiza eta Begoña Echeverria euskal-kaliforniarrek osatzen duten hirukotea. Taldea, bi kiderekin bakarrik ordea, lehenengoz abiatu da Europara eta Larrañen (Zuberoa), Erratzun (Nafarroa), Kanbon (Lapurdi) eta Alduden (Baxenabarre) aritu dira euren kantu-itzulian. Hona EuskalKultura.com-ek haiekin euskaraz eta ingelesez eginiko solasa eta Aldudeko emanaldiko bideoa, uztailaren 13an grabatutakoa.
2008/07/28
'Oso elkarretaratze positibotzat' jo zuten bertaratutakoek aurten hirugarrenez egin den Gizatalde Liburutegien Topaketa, aurreko biak La Platan --bertako 'Matxin Burdin' Liburutegia antolatzaile--, eta aurtengoa Buenos Airesen, 'Matxin Burdin' eta 'Biblioteca Galega' delakoa antolatzailekide. Izan ere lan handia egiten ari da azken urteotan liburutegi euskal-platensea Argentinako gizatalde edo kolektibitate liburutegiak bil daitezen, arazo amankomunak elkarrekin solastu eta aurrerabidean jar daitezen. Aurtengo bilerako proposamenen artean, zerrenda elektroniko propioa sortzea elkarren arteko komunikazioa hobetzeko. Datorren urteko elkarretaratzeari begira, Buenos Aireseko 'Jardin Japonés' liburutegia aipatu zen egoitza legez.
2008/07/28
Gaur astelehena seigarren eta azken saioa izango du, ekainaren 23tik hona Buenos Airesko Eusketxe-Eusko Kultur Etxea garatzen joan den "Euskal Herriari buruzko ikuspegi orokorra" tailerrak. Mariana Fernandez Castellik koordinatuta, ikastaroa kitorik eman da astelehenero hiriburu argentinarreko Mexiko 1880ko euskal egoitzan. Tailerrari amaiera berezia emanez, ordea, gaurkoaz gain, saio estra bat prestatu dute Eusketxekoek datorren astelehenerako, euskal dantzei eskainia, Buenos Airesen bizi den Aitor Alava dantzari arabarraren eskutik.
2008/07/26
Buenos Aires hiriburuko ospitale batetik bost hilabeteko haurdunaldia daraman gaztearen familiak zero RH negatibo motako bost odol-emaile itxarole eskatu ditu, "amarekiko (Carolina Larreguy) odol bateragarritasun analisiak egitearren, geroago uneko umetoki barneko transfusioak egin ahal izateko, momentuan alegia, ezin baitu odol bankuetatik datorren odola erabili". "Horregatik eskertuko dizugu emaile izan bazaitezke edo emaile izan daitekeen norbait ezagutzen baduzu, datuak helarazten badizkiguzu edo Ramon Sarda Ama-Haurren Ospitalera hurreratzen bazara, dagozkion analisiak egin eta bateragarritasuna finka dezagun".2008/07/25
Iragarpen txarrenak bete dira eta hilik agertu da Tijuana aldeko hotel baten gelan, duela bi astedanik familia eta lagunak bila zeuzkan 28 urteko Igor Aristegi gazte beasaindarra. Bere ingurukoak batetik autoritateekin eta bestetik euskal komunitateko hainbat kiderekin harremanetan jarriak ziren, harekiko kontaktua San Diego (AEB) eta Tijuanako (Mexiko) Unibertsitateak bisitatu ostean galdu ondoren. Familia heldua da AEB eta Mexiko arteko mugako herria den Tijuanara, gorpuaren behin-betiko identifikazioa egiteko. Igor Aristegi Filosofian doktoregaia zen eta Cambridge-ko Unibertsitatean ari zen lanean tesia burutzen. Duela bi urte irabazi zuen Elhuyar Saria, zientzia arloko zabalkunde kategorian.
2008/07/25
Larunbat honetan abiatuko da Argentinako Arrecifesen aurten lanean hasi den nazioarteko euskara taldearen lehenengo barnetegia. HABEren eskutik, Hego Ameriketako zenbait herrialdetako ikasle --tartean Txileko lau, Uruguaiko zortzi, Peruko bat, Brasilgo bi, eta Kolonbiako bat-- Argentinatik gehituko zaizkien beste hamaseirekin batera, aurrez aurreko eskoletan arituko dira, joan den martxoan hasi zuten ikasturtea orain artean urrunetik ikasi ondoren.
2008/07/25
San Inazioren omenezko jai eguna datorren astean, uztailaren 31n, ospatuko da Gipuzkoa eta Bizkaiko herri eta hiri gehienetan eta Diasporan ere hainbat euskal etxe eta komunitatek parte hartuko dute hamaika ekitaldi antolatuz. AEBetako Boiseko 'San Inazio Festival' delako hitzordua izango da seguruenik goiztiarrena: gaur bertan hasi eta igandera bitartean garatuko baita hiri estatubatuarrean. Datozen egunotan makina bat euskaldun bilduko da mundu osoan saninaziotara, izan Madrilgo Euskal Etxean (Espainian), Miamiko Txoko Alain (AEBetan), Mexikoko Euskal Etxean, Argentinako euskal etxe mordoan, hala nola Buenos Aireseko 'Laurak Bat', Mar del Platako 'Denak Bat', Arrecifeseko 'Euskaldunak Denak Bat', San Nicolaseko 'Euskal Etxea', Rosarioko 'Zazpirak Bat', La Platako 'Euzko Etxea', Chacoko 'Kotoiaren Lurra', Necocheako 'Euzko Etxea'n... edo beste hainbat herrialdetako euskal etxeetan: Txile, Venezuela, Australia, Peru, Uruguain...
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
