euskal diaspora eta kultura
2010/09/09
Argentinako Maiatzaren Iraultzaren Bigarren Mendeurreneko urtean eta Immigrantearen Eguneko ospakizunen testuinguruan Buenos Aires Hiriak omenaldi berezi bat egin zien atzo, bertan bizi diren kolektibitateei. Ekitaldia hiriburuko Kultur Etxeko Urre Aretoan gauzatu zen, eta Antonio Pujia eskultoreak egindako dominak eman zitzaien gizatalde bakoitzeko ordezkariei. Euskaldunen izenean, eta Juan Bernardo Etchegoin instituzioko lehendakariak ordezkatuta, Euskal Echea erakundeak, 'Gizarte-laguntza arloan egiten duen lan eta zaharren egoitza izateagatik' jaso zuen bere saria.
2010/09/09
Txertoa argitaletxeak 'Kaixo!' gaztelera-euskara mintza-liburuaren arrakasta ikusita --zortzigarren edizioa kalean da jada-- liburuxka honen bertsio ingeles eta frantsesa ere plazaratu ditu. Frantses edo ingeles hiztunak direnentzat izan daitezke bereziki baliagarriak. Edota frantsesera edo ingelesera hurreratu nahi duten euskaldunentzat. Oro har, eskuliburuok euskara ikasle, Euskal Herrira datozen turista zein euskararen munduan sakontzeko interesa duen edonorri gure hizkuntzara hurbiltzeko eta zergatik ez, erabiltzen ausartzeko gonbitea ere egiten diote.
2010/09/09
Chivilcoyko 'Beti Aurrera' euskal etxe argentinarrak bat egingo du gaur, katolikoentzat Arantzazuko Ama Birjinaren Eguna, munduan zehar euskal izeneko Andra Mari honen ohoretan egingo diren ospakizunekin. Arantzazuko Amak zale eta deboziodun asko eta hainbat kapera eta irudi ere izan ditu Ameriketan zehar azkeneko bostehun urteetan. Horren segida, Chivilcoyko Beti Aurrera-koek Euskal Herritik Arantzazuko Basilikan dagoen Arantzazuko Ama Birjinaren irudiaren replika bat ekarrarazi zuten 2007an eta urte horretako ekainean jargiratu edo entronatu zuten Euskal Etxean. Bestalde, Chivilcoyn oraindik, bertako euskal dantzariek parte hartuko dute igandean Gorostiaga herriaren Mendeurreneko ekitaldietan.
2010/09/09
Aurten ere Urrundik elkarteko gazteriak elkartasuna eta eskuzabaltasuna erakutsi du, Paranako Ospitale Geriatrikoan ingresatuta dauden nagusiei bisitaldi bat eginez. Alaitasuna eta umore ona zabaldu zituzten gazteek, aiton-amonek zinez eskertu eta gozatu zuten ekitaldian. Dantza taldeko kideek euskal dantza erakustaldia egin zuten eta Juan Carlos Borras zuzendaritzako kideak kantu folklorikoak eskaini zizkien nagusiei, gitarrakin lagundurik.
2010/09/08
Joan den uztailaren hondarrean Patxi Lopez lehendakariak Idahora egindako bidaiaren ondotik, estatu estatubatuar hartako ordezkaritza bat, Brad Little gobernadoreordea buru, iritsiko da gaur Euskadira, harremanak sendotu eta areagitzeko asmotan. Little-rekin batera enpresari bi datoz eta baita ere euskaldunekin konexio handia duen Boiseko Bishop Kelly ikastetxe katolikoko arduraduna ere. Jaurlaritzatik bi bulego zabaltzeko asmoa lukete, bat Euskadirena Idahon eta bestea Idahorena Euskadin, bi lurraldeon arteko harremanak bultzatzeko. Bulegoa edo egitura handi bat baino gehiago pertsona bat litzateke harremanon dinamizatzaile aritzeko.
2010/09/08
Finala joan den larunbatean egin zen Chino-Los Angelesen eta misterio handirik ez zuen ekarri, izan ere Mundu Txapelketan parte hartu duten muslari guztiek hamabi partida jokatu bazituzten, Euskadiko ordezkariak --Angel M. Rivero eta Juan Antonio Vicente--izan baitziren partida guztiak, hamabiak, irabazi zituen bikote bakarra. Bigarren lekuan, Frantziako ordezkariak gelditu dira, Roger eta Pierre Mendiondo anaia baxenabartarrak, 9 partida irabazi eta hiru galduta. Hirugarren, bikote argentinarra, Gustavo Perez eta Horacio Carrascal, hauek ere bederatzi irabazita eta hori galduta. Sariak larunbat gauean eman, eta igandean, Chinoko euskal piknik eta festan hartu zuten parte munduko muslariek.
2010/09/08
Eusko Jaurlaritzaren laguntzarekin hiru euskal antzerki talde --En la lona, Trapu Zaharra eta Gaitzerdi-- Tarregako Firan izango dira irailaren 10etik 13ra. Tarrega antzerki munduan azoka nagusienetako bat da eta euskal taldeek bira eta emanaldi berrietarako kontratuak eskuratu asmoz datoz. Aurreko urteetan nazioarteko bira horietan euskal komunitateek antolaturiko emanaldiak ere egiteko aukera izan dute --Jaurlaritzak laguntzak ematen ditu-- eta Euskalkultura.com-etik antzerki talde hauei eta beste batzuei jarraipena egiteko gonbitea egiten diegu gure irakurleei.
2010/09/08
Euskal Herri osoa egon da ordezkatuta joan den irailaren 5ean Argentinako hiriburuan gauzatutako Immigrantearen Eguneko jaian. Ekitaldian parte hartu zuten beste hogeita bost bat gizatalderekin batera honako euskal elkarteak aritu ziren: Buenos Airesko Laurak Bat, Iparraldeko Euskal Etxea, Eusko Kultur Etxea–Eusketxe, Euskaltzaleak, Ekin Argitaletxea, Ekin Dantzari Taldea eta San Miguelgo Askatasunaren Bidea elkartea. Eta, izan ere, euskaldunen berri emateko aukera polita izan zuten Palermo auzoko basoetan. Milaka lagun pasatu ziren euskaldunek muntatutako standetatik eta musika eta euskara entzun eta abizenen jatorriaz galdetzeaz gain, pintxo ederrak dastatu ahal izan zituzten.
2010/09/08
Euskaldunek eta beste immigrante komunitateek Argentinako eraikuntzan, eta zehatzago, Chacoko garapenean, izan zuten partaidetza eskertu zuen joan den astelehenean probintzia honetako Diputatuen Ganbarak. Horretarako omenaldi berezia egin zuten, gizatalde horien partaidetza bereganatu zuen ekitaldi batekin. Bertan izan zen Kotoiaren Lurra Euskal Etxea, Zuzendaritza Batzordeak ordezkatua. Oscar Bulacio, Xavier Canteros eta Mariana Echarri izan ziren euskal banderariak.
2010/09/08
Trenquen Lauquengo 'Euskal Sustraiak' Euskal Etxeak, Argentinako Buenos Aires probintzian, hiriburutik 445 kilometrotara, urteroko Ohiko Biltzar Nagusia egin zuen joan den abuztuaren 21ean eta, besteak beste, elkarteko Zuzendaritza Batzordea berritzeko araudiak dioenari jarraiki, buruzagitza berritu zuen, Hector Alberto Echaide hautatuz lehendakari. Berarekin batera arituko dira agintealdi berrian batzordekide: Maria Belen Santos Igartua, lehendakariorde; Alejandra Mariela Bengoechea, idazkari; Miriam Viviana Oyarzabal, idazkariorde; Alberto Oscar de Telleria, diruzain; eta Marta Tojo Setien, diruzainorde.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
