euskal diaspora eta kultura
2010/09/22
Artisau teknikak praktikatu eta ikasi nahi dituzu, eta zeure bizimodua --nork daki-- zeramikagile gisa, brontzea lantzen, egurra edo harria zizelkatzen edo metalak grabatzen atera? Debako Arte Eskola aukera polita eta bakarra da zaletasun duzun horretan trebatzeko, teknikak modu erabat praktikoan ikasteko eta, nahi edo behar izanez gero, etorkizun profesionala ere hemendik bideratzeko. Sartzeko ez da titulurik eskatzen, 16 urtetik gorakoa izatea besterik ez. Diasporako lagunak ongietorriak dira. Ikasturtea irailaren 26an hasiko da.
2010/09/22
1512. urtean Gaztelako Erresumak Nafarroa konkistatu zuen, geroztik ezagunak diren ondorioak ekarriz. Kari horretara eta 2012ra begira, San Miguelgo 'Askatasunaren Bidea' elkartea murgilduta dago efemeride hau ospatzeko antolakuntzan. Alde batetik, joan den larunbatean honekin lotuta dauden ekitaldi guztien logotipoa izango dena aurkeztu zuten elkarteko arduradunek. Beste alde batetik eta egun berean, zerrenda luze baten lehenengo ekimena izango den topaketa gauzatu zuten sanmigueldarrek hiriko 'Domingo Faustino Sarmiento' liburutegian.
2010/09/21
Sergio Nicolás Gutiérrez historialari mexikarrak Esponda eta Olaechea sendiak Chiapasen izan zuen eragina jasotzen du 'Casa, crisol y altar. De la hidalguía vasconavarra a la hacienda chiapaneca: Los Esponda y Olaechea, 1731-1821' liburuan. Lan honetan sendiaren hiru belaunaldien historia ikertzen du eta ondorioen artean nafar gizarteko ohitura eta baloreak Chiapasera eraman eta bertan, eragin indigena eta afrikar handia zuen inguruan, ezarri zituztela azpimarratzen du egileak.
2010/09/21
Madrilgo Euskal Etxeak lehen aldiz 40 urteko ibilbidean Euskal Aste bat egingo du aurten, irailaren 27tik urriaren 3a arte. Hainbat ekimenen artean, 'Euskaldunak Madrilen' izeneko mahainguruak egingo dituzte eta hirian bizi diren euskaldun ezagunek euren esperientzia pertsonal eta profesionalaren berri emango dute.
2010/09/21
Ikasturte berri honetan ere Euskal Herriko Unibertsitateak AEBetako ikasle talde bat izango du Leioa eta Ibaetako kanpusetan, USAC (University Studies Abroad Consortium) programari esker. 1983an sortu zuten programa hau Renoko euskaldun batzuk, euren seme-alabek Euskal Herrian ikasi eta gure kultura ezagutzeko aukera izan zezaten. 27 urteotan 7.000 ikasle baino gehago igaro dira Euskal Herritik eta programa 25 herrialdetara zabaldu da.
2010/09/21
Cordobako Gure Txokoa Euskal Etxeak, Argentinan, ohar batez jakinarazi du Euskal Etxeak ematen dituen euskara eskoletako irakasle eta arduradun izendatu duela Marina Urriza Larraioz irakaslea, Euskal Herrian sortua berau. Bestalde, eta musika arloari dagokionez, abesbatzen arloan garatu duen ekimen baten berri eman du, Javier Bustoren euskal kantuak Cordobako abesbatzetako errepertorio barnean sartzea emaitza izan duen ekimena.
2010/09/20
Lehendakari batek Txinara egiten duen lehen bidaia izango da, Shanghaiko Expora egingo den bisitaldiaren aitzakian. Bidaiak merkatal helburua du eta euskal ordezkaritzan Industria sailburua, Bernabé Unda, eta Euskal Herriko 70 enpresen ordezkariak izango baitira. Eurekin hiru merkataritza-ganberen buruak eta Confebask, MCC eta Bilboko Portuko presidenteak ere joango dira. Bidaia urriaren 1ean bukatuko da eta lehendakariak Shanghaiko Euskal Etxera bisitaldia ere egingo du.
2010/09/20
Munduko Pilota Batzarrak antolatu duen Lurralde Arteko Igo Pilota Txapelketa etzi abiatuko da Arabako Mendizorroza, Lakua eta Zaramaga frontoietan. Udalbide Trofeoa jokoan, Gipuzkoa, Bizkaia, Araba, Nafarroa, Iparralde eta Errioxako federazioak lehiatuko dira txapelketa honetan.
2010/09/20
Cordobako jende talde batek --guztiak edo ia guztiak hiriko 'Gure Txokoa' Euskal Etxeko bazkideak-- euskal elkarte berri bat sortu dute hiri argentinar honetan "euskara eta euskal kulturarentzat gune berriak eraikitzearren", "Euskal Herriaren eskubide historikoak aitortuz" eta "Eskubide Estatuari engaiaturik, indarkeria mota guztiak gaitzetsiz", eta sustatuz aldi berean "erabakimena testuinguru etiko eta demokratiko batean". Taldeak oso begi kritikoz ikusten du Alejo Martin buru duen Batzordearen jarduera gaur egun.
2010/09/20
Irailaren 15etik 19ra gauzatu da San Juan hirian Nazioko III. Kultur Kongresua. Kultur ekitaldi honen markoan foro, hitzaldiak, mahai-inguruak eta Maiatzeko Iraultzaren Bigarren Mendeurrenari buruzko hainbat ekintza antolatu dituzte hiriko agintariek. Testuinguru honetan egin da San Juanen Liburu eta Eskulan II. Azoka, eta bertako euskaldunak partaide izan dira bisita ugari jaso dituen stand batekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
