euskal diaspora eta kultura
2010/09/30
Eusko Jaurlaritzaren Txile eta Perurako ordezkaria, Ana Urchueguia, Limara bidaiatu da aste honetan, joan den otsailean kargu horretarako izendatu zutenetik bertara egiten duen lehenengo ostera ofizialean. Jakina denez, Lopez lehendakariak Euskadiko Ordezkaritzetan eginiko birmoldaketan, Ordezkaritza bakarra partekatzen dute bi herrialdeek, egoitza Txileko Santiagon. Urchueguiaren agendak Limako Euskal Etxea, espainiar legazioa, administrazio perutarra eta enpresariekiko kontaktuak biltzen ditu.
2010/09/30
Gaur abiatu eta datorren larunbata bitartean Bilboko Euskalduna jauregian nazioarteko aditu talde bat bilduko da, Migrazioen Elkarte Europarrak (AEMI) deituta, migrazioa eta teknologia berriak gaiaren inguruan gogoeta egiteko. Jaurlaritzako Kanpoan diren Euskal Herritarrentzako eta Gizataldeentzako Zuzendaritza, AEMIko kidea, izan da jardunaldien koordinatzailea. Helburuen artean AEMI Europa hegoaldeko elkarteengana irekitzea aipatzen dute antolatzaileek.
2010/09/30
Euskal Sustraiak Euskal Etxeak antolaturik, datorren urriaren 16an gauzatuko da Trenque Lauquen hiri argentinarrean Urdaiazpiko Jaiaren II. edizioa. Antolatzaileek 500 gonbite txartel egin dituzte baina eskaria ikusita, beldur daude ez ote diren nahikoak izango. Hitzordua bertako Barrio Alegre klubean izango da eta janari onenaz gozatzeaz gain, bi bidaia zozkatuko dira gonbidatuen artean.
2010/09/30
Joan den irailaren 11 eta 12an Argentinako Cordoba hiriak bere sorreraren mendeurrena eta baita Gipuzkoako Idiazabal herriarekin senidetzearen X. urteurrena ospatu zituen. Cordobako Gerora euskal kultura elkarte gazteak bere aurkezpen ofiziala egiteko probestu zuen asteburua eta hainbat ekitaldi antolatu zituen, horien artean Baietz taldearen kontzertua eta Txotx! Cordobako Euskal Dantzarien ikuskizuna.
2010/09/29
Aurrera darrai Patxi Lopez lehendakaria Txinara egiten ari den bisitak eta burututako ekitaldien artean euskal enpresen lekutzea bultzatuko duen Kunshan eta Qiandeng-eko gobernuekin akordioa aipatu daiteke. Era berean Lopezen ordezkaritzak Basque Culinary Center fakultatea eta euskal moda ezagutzera eman zituen. Gaur lehendakariak hitzaldia emango du CEIBS Negozio Eskolan eta Jiangsu-ko gobernadorearekin bilduko da. Bihar Expoa eta Shanghaiko Euskal Etxea bisitatuko ditu.
2010/09/29
Nafarroa Behereako Irisarrin euskal bertsolariek eta argentinako payadore batek saioa egingo dute gaur, Lanku eta EKE elkarteek antolatu duten kultur arteko topaketetan. Horrez gain bisitariek 'Euskaldunen Argentina' erakusketa ikusteko aukera izango dute eta 'Kultur arteko bertsu bira' bideoaren emanaldia ere egingo da. Bideo honetan bertsolariek eta payadoreek 2008an Argentina, Uruguai eta Brasilen egin zuten bira jasotzen da.
2010/09/29
Joan den irailaren 19an gauzatu zen Buenos Aires probintziako Cañuelas herrian 'Kilometroak' lasterketaren IV. edizioa. Aurreko urteetan bezala, 10 kilometro ibili behar izan zituzten parte hartzaileek eta nahiz eta gizonezko eta emakumezko kategorietan irabazle bakarra izan, korrikalari guztiek jaso dute sari bat Denak Bat Euskal Etxearen eskutik.
2010/09/29
Barakaldarra da Hermogenes Rebolleda eta 1936ko gerlak, lehenik, eta II. mundu gerlak ondoren, markatu zuten bere bizitza. Gaur, 81 urte dituela, atzerabegirakoa ematen dio bere ibilbideari bizileku duen Guatemala Hiritik. 1959tik 1990. hamarkada erdira arte euskal etxe aktiboa izan zuen Guatemalak. Egun, euskaldun gutxi batzuk eta euren ondorengoak bizi dira bertan, horietako bat Hermogenes.
2010/09/28
Askok Don Garate euskal kaliforniarra Juan Bautista de Anza esploratzailearen papera egiten gogoratuko dute: 1775ean egun San Frantzisko den lekura heldu zen esploratzailea bezala zaldi gainean eta uniformea jantzita. Garatek Anzaren papera egiten zuen --euskarazko, gaztelerazko eta ingelesezko hitzak tartekatuz-- ikasle eta turistentzako 'Anza Days' historia jaialdian eta Arizonako historia guneetan. Joan den irailaren 21ean hil zen Kansasen.
2010/09/28
Izen-deiturarik ez da jakitera eman berri hau idazteko momentura arte bederen, baina Espainiako Polizia Nazionalak operazio bat hasi du bart gauez, astelehenetik asteartera arteko gauean Askapena mugimenduaren kontra, hainbat atxiloketa eta miaketa eginez Euskal Herrian, talde hori 'ETAren nazioarteko aparatua' delakoan, adierazi dute borroka antiterroristako iturriek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
