euskal diaspora eta kultura
2010/12/10
'Antzinako' euskal genealogia eta tokiko historiaren elkarteak antolatuta, Genealogiari buruzko mintegi bat egingo da bihar Bergaran. Jardunaldiaren gai nagusia hauxe izango da: 'Genealogiarako iturri dokumentalak: Artxiboak'. Bilaketa genealogikoetarako erabilgarriak diren Euskal Herriko artxiboen berri emango dute bertan, eta horrez gain genealogian hasi nahi dutenentzako tailerrak egingo dituzte. Bestalde, Antzinako elkarteak sarean jarri du jada Antzina bere aldizkariaren azken alea. Jardunaldia zein aldizkaria libre eta kitorik dira.
2010/12/10
Mikeldi talde eno-gastronomikoak zazpigarren urteurrena bete zuen abenduaren 2an. Elkarte hau euskal gastronomiaz gozatu nahi duen euskal-mexikar talde batek osatua da eta kideak urtean hainbat aldiz elkartzen dira Mexiko DF hiriburuan eta inguruetan, mahai baten inguruan beti. Azken afari-batzordean taldeak 2010eko txostenaren balioespena egin zuen eta Jon Ruiz de Azua aukeratu zuen 2011 urterako presidente gisa. Mikeldik kide berri bat ere onartu zuen, Julen Ruiz de Azua.
2010/12/09
Olentzero motorduna, ordenagailuak zaintzen dituen artzaina, rotaflexa darabilen aizkolaria... Euskal arketipoak mende honetara ekarri ditu, ironia apur batekin, 'XXI. mendeko euskaldunak' erakusketak, eta larunbatetik aurrera ikusgai izango dira Londresen, bertako Basque Society elkartearen babesarekin. Berangoko elkarte bat da ekimenaren sustatzailea eta argazki eta bideo sorta ari dira biltzen tradizioa eta modernitatea batuz bizi den herriaren ikuspegia munduan zehar erakusteko. Abenduan Londresen izango da eta urtarrila eta otsailean Bartzelonan.
2010/12/09
Txileko zatia bertan behera gelditu ostean, aurrera darrai Argentinan Miguel Sanz Nafarroako presidentea bertara egiten ari den bisitak. Astelehenean iritsirik, asteartea izan zuen aurreneko bisita egun ofiziala eta egun horretan nafar etxeetako arduradunekin eta Argentina eta Txileko Nafar Etxeen federazioko buru den Crisanto Ayanzekin bildu zen. Hogeita hamar enpresari espainiar eta nafarrekin ere bildu zen, Buenos Airesko Klub Espainiarrean. Nafar Etxean, berriz, emanaldia eskaini zioten bertako dantza taldekoek erakundearen pilotalekuan. Atzo Rosariora pasatu zen, gaur eta bihar agenda han segitzeko.
2010/12/09
Joan den azaroaren 21ean Buenos Aires probintziako Gral. Rodriguezko euskal komunitateko kideek euskal etxearen 11. urteurrena ospatu zuten urratsez urrats eraikitzen ari diren beren egoitzan. Inguruko euskal etxeetako lagunak ere bertaratu ziren 'Eusko Aterpea'ra rodrizgueztarrekin urtebetetzeko brindisa egitera. Etxeko dantzariek bazkaria alaitu zuten euren pauso eta doinuekin eta Mar del Platako Euskal Asteko lehiaketetan parte hartu eta irabazi zutenek aipamen berezi bat jaso zuten.
2010/12/09
Santiagoko kardinal artzapezpiku Francisco Javier Errazuriz Ossa buru egin zen joan den igandean hiriburu txiletarrean santu euskaldunaren eguna eta Nafarroaren eguna ospatzeko antolatutako ekitaldiei hasiera ematen zien meza. Ohi bezala, ekitaldiak Las Condesko Estadio Españolean gauzatu ziren, eta bildutakoek Nafar Etxekop dantzari txikiek egun honetan egiten zuten debuta ikusteko aukera izan zuten. Iragarrita bazegoen ere, Sanz presidenteak ezin izan zuen bertara bildu, aire kontrolatzaile espainiarren grebak lurrean utzi baitzuen, bidaia bertan behera utzi beharrean.
2010/12/08
Larunbatean, abenduaren 4ean, hil zen Donostian Xabier Lete poeta eta kantaria eta, egunean bertan, Durangoko Azokan omenaldia egin zioten herritarrek, bere kantuak abestuz Landako pabilioiaren sarreran. Euskal Herriko Kantuzaleen Elkartearen deiari erantzunez 'Xalbadorren heriotzean' bezalako kantu ezagunek indar berria hartu zuten ehundaka lagunen ahotsetan. Euskal Herriko kulturan arrastoa utzi zuen Letek bere olerki, kantu eta idazkiekin, eta bizirik dirau ondare horrek euskaldunen bihotzetan. Sarean topa dezakegu horren isla.
2010/12/08
Ohiko telebista seinalez, Ipar Euskal Herriari begira, eta internetez, mundu osoko jendeei erreparatuz, ari da ematen aste honetan Tvpi telebista joan den azaroko lehenengo astean Mar del Plata hirian grabatu zen Euskal Argentinar Aste Nazionalari buruzko erreportajea, Agustin Errotabeherek egina, 'Euskal Argentina' taldearekin bertara egin zuen bidaiako lekuko gisa. Erreportajea euskaraz ekoitzia da eta frantsesez azpititulatua. Internetez, behin eta berriro ematen dute, ordu oro, beste zenbait saio labur eta publizitatearekin batera. Aste honetan lehen zatia ikus ahal izango da, eta ondoren bigarrena.
2010/12/08
Espainiako aire kontrolatzaileen greba estaliak bertan behera uztera behartu zuen Nafarroako Gobernuko Miguel Sanz presidenteak Txile eta Argentinara asteburuan hasi behar zuen bidaia. Egoera aste honetan normalduta, Miguel Sanz Argentinara partitu eta atzo arratsaldez ekin zion aurreikusitako programa ofizialari, Txileko zati osoa atzean utzita, ordea, gogoratu behar baita igandean Nafarroako Egunaren ospakizun txiletarrean behar zuela parte hartu Santiagoko Estadio Españolean, ekitaldi horretan Karlos III.aren Gurutzea Agustin Otondori, Txileko Nafarroako Etxeko fundatzaile eta lehenengo presidenteari emanez.
2010/12/07
Guraso batek bere seme-alabek jolasen bidez euskal kultura ezagutzeko eginiko jokoa da 'Zer gara gu, nor gara gu'. Haurrentzako pentsatua da, bai, baina Gotzon Barrueta egileak EuskalKultura.com-i aitortu dionez, makina bat euskaltegitan ere ari dira dagoeneko erabiltzen, ikasleen artean euskaraz jolastu eta aldi berean Euskal Herriari buruzko jakingarriak ikasteko. Jokoan honelako galderak aurki ditzakegu: 'Nor da Bizkaiko idazlerik ezagunena, Kirmen Uribe ala Mortadelo?' Erantzuna errazegia dela? Ba, hala ere jokoak engantxatu egiten omen du. Zergatik?
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
