Necochea, Argentina. Hator Hona programa arrakastaz garatzen ari den bitartean, Necocheako Euzko Etxeak bere 80. ‘Iratzartze Alaia’ egin zuen atzo, Iñaki Deunaren Eguneko programaren barruan. Goiz goizean euskal etxeko kide eta agintariek, musikari eta dantzariek, eta Hator Honako partaide Euskal Herritik etorri diren euskaldunek taldea osatu eta euskal egoitzatik atera ziren, trikitixa eta panderoaren erritmora kalez kale eta etxez etxe, bisitak eginez euskal komunitateko lagun zaharrenei. Ondoren etorri zen ohiko omenaldia Mariano Necochea generalari, Angel Murga-ri, eta Gernikako Arbolaren kimuari. 80. urteurrenaren karietara, aurtengo ‘Iratzartze Alaia’k oihartzun berezia izan zuen eta prentsa eta hedabideek ere eman zuten ibilbidearen berri.
Entzun hemen 'Iratzartze Alaia'ren ('Goizeko Esnatzea' ere deitzen diote) sorrera, sortzaileetako batek, Francisco Zubillaga Iturralde errenteriarrak Necocheako irrati bati kontatua.
[2019ko Iñaki Deunaren Egunean, euskal dantzak udaletxean]
[2019ko Iñaki Deunaren Egunean egindako omenaldiak]
Iñaki Deunaren eguneko programak arratsaldean jarraitu zuen mezarekin eta gauean, baratxuri zopa plater nagusi izan zuen afariarekin. Euzko Etxetik oroitarazten dute San Inazio ospatzeko afaria nagusia larunbatean izango dela, gaueko 9:30etan.
15. Hator Hona
Baina San Inazio eguna izanik atzokoa egun berezia izan bazen, Hator Hona programan parte hartzen ari direnentzat, euren programako egun aktibo eta lanpetu bat gehiago izan zen. Gogora dezagun programa uztailaren 22an hasi zela eta bi astez musika, kantu, dantza, euskara eta sukaldaritza tailerrak zari direla eskaintzen Euskal Herritik etorritako sei gazte, Necocheako ume, azte zein helduei begira. Tailerrez gain, eta Hator Honaren 15. urteurrena ospatzeko, plaka oroigarri bat desestali zuen Euskal Etxean Kiti Zubillaga lehendakariak.
Hator Hona programaren edizio honi asteburu arteko ekintza geratzen zaizkio, besteak beste, triki-poteoa, mintzodromoa, San Inazio jaia eta azken agurra, azken hauek abuztuaren 4an.
Lagun bati bidali
Komentarioa gehitu
